مەملەكەت باسشىسى پوپۋليستىك يدەيالارعا قاتىستى پىكىر ءبىلدىردى

None
None
نۇر-سۇلتان. قازاقپارات - الەمدە تەك جالاڭ ۇراندار ارقىلى بيلىككە جەتكىسى كەلەتىن توپتاردىڭ داۋىسى ءجيى ەستىلۋدە. 

بۇل تۋرالى پرەزيدەنت قاسىم-جومارت توقايەۆ ءوزىنىڭ «اباي جانە ХХІ عاسىرداعى قازاقستان» اتتى ماقالاسىندا جازدى، دەپ حابارلايدى قازاقپارات.

«اباي شىعارمالارىندا مەريتوكراتيا ماسەلەسىنە دە ايرىقشا ءمان بەرىلگەن. ول ادامدى مارتەبەسىنە قاراي ەمەس، تالابى مەن ەڭبەگىنە قاراپ باعالاعان. ۇلى اقىن قازاق جاستارىنا ءجون-جوبا كورسەتىپ، باعىت-باعدار بەرگەن. قازىر قازاقستاندا ساياسي جاڭعىرۋ ۇدەرىسى ءجۇرىپ جاتىر. ەلباسىنىڭ قولداۋىمەن بيلىككە باسشىلاردىڭ جاڭا بۋىنى كەلە باستادى. سوعان قاراماستان، ەلىمىزدە تۇبەگەيلى ساياسي وزگەرىس كەرەك دەگەن ويلار دا ءجيى ايتىلىپ جاتادى. ءبىراق بۇل ماسەلە بويىنشا ۇلتتىق مامىلەگە كەلۋدىڭ، مەملەكەت مۇمكىندىكتەرىن شىنايى باعالاۋدىڭ جانە جۇكتەلگەن مىندەتكە جاۋاپكەرشىلىكپەن قاراۋدىڭ ماڭىزى زور. وزگەرىس دەپ بايبالام سالاتىندار ەلىمىزدىڭ بولاشاعىن بايىپتامايدى، جاي عانا پوپۋليستىك يدەيالارعا تابان تىرەيدى»، - دەپ اتاپ وتىلگەن پرەزيدەنت ماقالاسىندا.

وسى ورايدا مەملەكەت باسشىسى پوپۋليزم تەرىس تەندەنسيا رەتىندە دۇنيەجۇزىلىك سيپات العانىن، الەمنىڭ تۇكپىر-تۇكپىرىندە ناقتى ستراتەگياسى جوق، تەك جالاڭ ۇراندار ارقىلى بيلىككە جەتكىسى كەلەتىن توپتاردىڭ داۋىسى ءجيى ەستىلىپ جاتقانىن ايتتى.

«وسىنداي داڭعازاعا قۇمار ادامدار تۋرالى اباي: «قۋ تىلمەنەن قۇتىرتىپ، كەتەر ءبىر كۇن وتىرتىپ»، - دەيدى. راسىندا، بۇل - كەز-كەلگەن ەلدىڭ دامۋىن كەنجە قالدىراتىن، ۇلتتىڭ بىرەگەيلىگىن السىرەتەتىن قاۋىپتى ءۇردىس. بىزگە، اباي ايتقانداي، ارتىق ماقتانعا سالىنۋ، وزگەنى قور، ءوزىمىزدى زور ساناۋ، داۋ قۋۋ استە جاراسپايدى. ءار قادامىمىزدى انىق باسىپ، الەمدە جانە ەلىمىزدە بولىپ جاتقان وقيعالاردى بايىپپەن ساراپتاي ءبىلۋىمىز قاجەت. تۇراقتىلىق پەن دامۋىمىزدىڭ كەپىلى بولعان تاتۋلىق پەن بىرلىكتى بارىنەن جوعارى قويعان ابزال. مەملەكەت مۇددەسىن كوزدەسەك، اۋەلى ساباقتاستىق ساقتالىپ، توگىلگەن تەر مەن اتقارعان ەڭبەكتىڭ دالاعا كەتپەۋىن ويلايىق. وسىنداي ساياسات جۇرگىزگەن كەزدە عانا بارلىق ستراتەگيالىق ماقساتتارىمىزعا قول جەتكىزىپ، قازاقستاندى وزىق دامىعان مەملەكەتتەردىڭ قاتارىنا قوسا الامىز»، - دەپ ناقتىلادى قاسىم- جومارت توقايەۆ.

ماقالا «ەگەمەن قازاقستان» باسىلىمىنىڭ بۇگىنگى سانىندا جاريالاندى.

اۆتور: رۋسلان عابباسوۆ

سوڭعى جاڭالىقتار