ەلوردادا بالانى ەس-ءتۇسسىز حالگە تۇسىرگەن ءتىس ەمحاناسىنىڭ زاڭبۇزۋشىلىعى انىقتالدى

نۇر-سۇلتان. قازاقپارات - ەلوردادا ءتىسىن ەمدەتكەن بالانى ەس-ءتۇسسىز حالگە تۇسىرگەن ءتىس ەمحاناسىنا تەكسەرۋ جۇرگىزىلدى.

ونىڭ قورىتىندىسىن ق ر دەنساۋلىق ساقتاۋ مينيسترلىگى تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى ءتوراعاسىنىڭ ورىنباسارى لاۋرا احمەتنيازوۆا جاريا ەتتى، دەپ حابارلايدى قازاقپارات ءتىلشىسى.

«كەشە تەكسەرۋدى اياقتادىق. ناتيجەسىندە بىرنەشە زاڭبۇزۋشىلىقتى انىقتادىق. ولاردىڭ باستىلارى - سيەۆوفلۋران پرەپاراتىمەن جاسالعان جالپى انەستەزياعا قوسا، 4 جاسقا دەيىنگى بالالارعا ەگۋگە بولمايتىن، مەپيۆاستەزين جەرگىلىكتى انەستەزيا پرەپاراتى قولدانىلعان»، - دەدى ول بۇگىن وتكەن بريفينگتە.

سونىمەن قاتار ونىڭ ايتۋىنشا، بالانى ەمدەمەستەن بۇرىن اللەرگياعا قارسى سىناما دا الىنباعان. انەستەزيولوگ-رەانيماتولوگ دارىگەر جالپى ناركوز بەرۋگە 15 مينۋت قالعاندا عانا بالانى تەكسەرگەن. ال ستاندارتقا سايكەس دارىگەر پاتسيەنتتى بولجالدى وتا جاسالاتىن ساتتەن كەمىندە 24 ساعات بۇرىن قاراۋى ءتيىس.

«كوميسسيا قورىتىندىسى بويىنشا پاتسيەنت جاعدايىنىڭ ناشارلاۋى ەگىلگەن پرەپاراتتاردىڭ بىرىنە انافيلاكتيكالىق شوكتىڭ دامۋىمەن بايلانىستى بولۋى بارىنشا ىقتيمال»، - دەدى لاۋرا احمەتنيازوۆا.

اۆتور: مارلان جيەمباي