قوجانىڭ ءرولىن سومداعان نۇرلان سەگىزبايەۆ ەستەلىگىنەن

نۇر-سۇلتان. قازاقپارات - سول كەزدە كينوعا ءتۇسۋ، قازىر ويلاسام، قيىن بولعان ءتارىزدى. كلاستان قالىپ قالدىم. شارشايتىنمىن. كوپ ۋاقىتقا دەيىن ويىم ءبولىنىپ ءجۇردى.

فيلمدە سۇلتان ەكەۋىمىزدىڭ توبەلەسەتىن جەرىمىز بار عوي. سول كەزدە ابدوللا اعا (رەجيسسەر) «شىنداپ ۇر، شىنداپ ۇر» دەي بەرگەن سوڭ، شىنداپ ۇرىپ، سۇلتاننىڭ مۇرنىن قاناتىپ قويعانىم بار. سودان كەيىن فيلمدە تەمەكى تارتۋدى سۇلتان ماعان ۇيرەتسە، سەمكا(ءتۇسىرىلىم) اياقتالعاننان كەيىن مەن وعان ۇيرەتەتىنمىن. ول تەمەكى تارتا المايتىن. سۇلتان قايتىس بولىپ كەتتى عوي. مارات كاكەنوۆ دەگەن جىگىت. قاز ۇ ۋ-دىڭ جۋرناليستيكا فاكۋلتەتىن ءبىتىرىپتى دەپ ەستىگەنمىن. «قوجادان» كەيىن ەكى فيلمگە تۇسكەن. سودان سوڭ مەملەكەتتىك قاۋىپسىزدىك كوميتەتىندە جۇمىس ىستەپ ءجۇر ەكەن دەپ تاعى ەستىدىك. ءومىرىنىڭ سوڭىندا «جۇمىسشىلار» پوسەلكەسىندە جالعىز، اشتىق-جوقشىلىق كورىپ، قايتىس بولىپتى.

داۋلەت دەگەن قويشىنىڭ بالاسى بار ەدى عوي، جاقىندا ونى قازاقستاننىڭ بوكس قۇراماسىنىڭ باس دارىگەرى دەپ ەستىدىم. مەديتسينا ينستيتۋتىن بىتىرگەن كورىنەدى. ال جانار - گۇلنار قۇرابايەۆا پوليتەحنيكالىق ينستيتۋتتى تامامداپ، ەنەرگەتيكا مامانى بولىپ ءجۇر.

مەن مەكتەپ بىتىرگەننەن كەيىن وسكەمەن پەداگوگيكا ينستيتۋتىن ءبىتىرىپ، بەس جىل مۇعالىم بولدىم. سودان كەيىن ۆ گ ي ك-كە ءتۇسىپ، ەۆگەني گاۆريلوۆيچتىڭ شەبەرحاناسىندا سەناري كۋرسىن وقىپ شىقتىم. سودان بەرى «قازاق فيلمنىڭ» اينالاسىندامىن. تەلەۆيزيالىق فيلمدەردىڭ شىعارماشىلىق- وندىرىستىك بىرلەستىگىندە رەداكتور بولىپ، جۇمىس ىستەپ جاتىرمىن.