ديماش قۇدايبەرگەن: دجەكي چان مەنى «جەڭىپ» كەتتى

نۇر-سۇلتان. قازاقپارات - ءانشى ديماش قۇدايبەرگەن الەمگە ايگىلى اكتەر دجەكي چانمەن كەزدەسكەن ۆيدەوسىن جاريالادى، دەپ حابارلايدى قازاقپارات ءتىلشىسى.

الەمدىك دارەجەدەگى ءانشى مەن اكتەردىڭ كەزدەسۋى وتكەن جىلدىڭ جەلتوقسانىندا وتكەن ەدى. ديماش قۇدايبەرگەن ول كەزدە ايگىلى اكتەردىڭ جاڭا ءۇن تاسپاسىنىڭ تۇساۋكەسەرىنە قاتىسقان بولاتىن. ءانشى بۇگىن ينستاگرام پاراقشاسىندا سول كەزدەسۋدىڭ ۆيدەوسىن جاريالادى.

«دجەكي چاننىڭ جاڭا البومىنىڭ تۇساۋ كەسەرىندە قوناقتامىن. ءبىزدىڭ ءار كەزدەسۋىمىز، سىيلىقتار الماسۋمەن اياقتالادى. الايدا ول كىسى مەنى وتباسىمنىڭ ءار مۇشەسىنە ارناپ ۇلكەن چەمودان تولى سىيلىقتار بەرىپ جىبەرۋ ارقىلى جەڭىپ كەتتى. تاڭعاجايىپ ادام. ول كىسىمەن سۇحباتتاسقاندا كەرەمەت اسەر الامىن. ول كىسى باسقا ارتىستەردەن تىم بولەك، دارا تۇلعا. رۋحاني تۇرعىدا باي ادام. ءبىز ءبىر-بىرىمىزبەن قولتاڭبالار الماستىق»، - دەپ جازدى ءانشى ينستاگرام پاراقشاسىندا.

ەسكە سالا كەتەيىك، ديماش پەن دجەكي چان بۇرىننان جاقسى تانىس. قازاق ءانشىسى قىتايدا وتكەن I am Singer جوباسىندا ميلليونداعان قاۋىمنىڭ جۇرەگىن جاۋلاعان بولاتىن. سوندا ايگىلى اكتەرمەن كەزدەسىپ، يىعىنا قازاقتىڭ شاپانىن جاۋىپ، قوڭىر ءۇندى دومبىراسىن دا سىيعا تارتقان ەدى.

سول جولى ديماش ينستاگرام پاراقشاسىنا: «بۇگىن مەنىڭ ومىرىمدە تاريحي ەستە قالاتىن ەرەكشە كۇن! اتاقتى اكتەر دجەكي چان مىرزا مەنى تەلەديداردان كورىپ، كەزدەسۋگە شاقىردى! كەزدەسۋدە اكتەر ماعان ءوزىنىڭ ەكسكليۋزيۆتى كۇرتەشەسىن جانە ارنايى فيرمالىق ءان تىڭداۋ قۇرىلعىسىن سىيعا تارتتى! ال مەن اكتەرگە قازاقتىڭ شاپانىن جاۋىپ، دومبىرا سىيلادىم! دومبىرامەن ءبىر كۇي شەرتىپ بەرۋىمدى وتىنگەن دجەكي چانعا نۇرعيسانىڭ ءالقيساسىنان شاشۋ شاشتىم! ءوز كەزەگىندە اكتەر ماعان سوڭعى «Kung Fu Yoga»  كينوكارتيناسىنداعى ءبي قيمىلدارىن ۇيرەتتى. بالا كەزىمنەن بەرى كەلە جاتقان سۇيىكتى اكتەرىم ماعان ءوز اقىل-كەڭەستەرىن بەرىپ، شىعارماشىلىعىمدى باقىلايتىنىن ايتتى. ءسوز سوڭىندا، بارشا قازاقستان حالقىن جاڭا جىل مەرەكەسىمەن قۇتتىقتاپ، ادەمى لەبىز-تىلەگىن ءبىلدىردى! كەلەسى كەزدەسۋدى اسىعا كۇتەمىز! ارماندار ورىندالادى!» - دەپ جازعان بولاتىن.