قازاقستان مەن ا ق ش اۋە قاتىناسى تۋرالى كەلىسىمگە قول قويدى
«ەلباسى مەن قازاقستان رەسپۋبليكاسى پرەزيدەنتىنىڭ تاپسىرمالارىن ورىنداۋ ماقساتىندا قازاقستان رەسپۋبليكاسىنىڭ ۇكىمەتى مەن امەريكا قۇراما شتاتتارىنىڭ ۇكىمەتى اراسىنداعى اۋە قاتىناسى تۋرالى كەلىسىمگە قول قويىلدى. قازاقستاننىڭ ۇكىمەتى تاراپىنان كەلىسىمگە قر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ، ال امەريكا قۇراما شتاتتارىنىڭ ۇكىمەتى تاراپىنان – ا ق ش- تىڭ قازاقستانداعى توتەنشە جانە وكىلەتتى ەلشىسى - ۋيليام ح. موزەر قول قويدى»، دەلىنگەن حابارلامادا.
وسى كەلىسىم حالىقارالىق ازاماتتىق اۆياتسيا ۇيىمىنىڭ (ICAO) اۋە كولىگىن ودان ءارى ليبەراليزاتسيالاۋ جونىندەگى ۇسىنىمدارىنا سايكەس «اشىق اسپان» قاعيداتتارىن كوزدەيتىن قازاقستان رەسپۋبليكاسى ءۇشىن ءبىرىنشى قۇجات. بۇل قازاقستان مەن امەريكا قۇراما شتاتتارى اراسىندا ۇشۋدى ورىنداۋدى جوسپارلايتىن تاسىمالداۋشىلار ءۇشىن زور مۇمكىندىكتەر اشادى. كەلىسىمنىڭ اياسىندا تاراپتاردىڭ تاسىمالداۋشىلارىنا اۋا ەركىندىگىنىڭ «بەسىنشى دارەجەسى» بەرىلىپ، مەجەلى مەكەندەردىڭ جانە جيىلىكتەردىڭ سانى بويىنشا شەكتەۋ قويىلمايدى.
كەلىسىم ەكى ەل اراسىنداعى تىكەلەي تۇراقتى رەيستەردى ورىنداۋ ءۇشىن قۇقىقتىق بازانى قالىپتاستىرىپ، سونداي- اق قازاقستان مەن امەريكا قۇراما شتاتتارى اراسىنداعى ستراتەگيالىق ارىپتەستىكتى ودان ءارى دامىتۋعا ىقپال ەتەتىن بولادى.
ەكى ەل اراسىنداعى تىكەلەي رەيستەردىڭ اشىلۋى ساياسي، ەكونوميكالىق، مادەني ءوزارا قارىم- قاتىناستار مەن ءتۋريزمدى دامىتۋعا، سونداي- اق «استانا» حالىقارالىق قارجى ورتالىعىنىڭ كولىكتىك قولجەتىمدىلىگىن ارتتىرۋعا ىقپال ەتەتىن بولادى.