بۇحارا يسلام مادەنيەتىنىڭ استاناسى اتاندى - شەتەلدەگى قازاق ءتىلدى ب ا ق-قا شولۋ

نۇر-سۇلتان. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

بايان-ولگيدىڭ سپورت سالاسىنداعى ۇزدىكتەرى انىقتالدى - KAZNEWS

بايان-ولگي ايماعىنىڭ سپورت سالاسىنىڭ ۇزدىكتەرىن انىقتاۋعا ارنالعان «التان بامبار - 2019» بايقاۋى ءوتتى. بايقاۋ 31-جەلتوقساندا قورىتىندىلانىپ، ۇزدىكتەر انىقتالدى. العاش رەت ۇيىمداستىرىلىپ وتىرعان بايقاۋدى ايماقتىق سپورت جانە دەنەشىنىقتىرۋ باسقارماسىنىڭ باستىعى قاينار قايساناي ۇلى اشتى، دەپ حابارلايدى موڭعوليالىق KAZNEWS اقپارات پورتالى.

سپورت سالاسىنىڭ ۇزدىكتەرى قاتارىنا «ۇزدىك جاس سپورتشى»، «ۇزدىك جاس ءوسپىرىم سپورتشى»، «ۇزدىك باپكەر»، «ۇزدىك سپورت مۇعالىمى»، سونداي-اق «ۇزدىك سپورت فەدەراتسياسى»، «ۇزدىك ارداگەر سپورتشى»، «ۇزدىك سپورت كلۋبى»، «ۇزدىك سپورت قۇراماسى» ماراپاتتالدى. سونىمەن قاتار بۇل جولعى سپورت سالاسىنىڭ ۇزدىكتەرى قاتارىنا «ۇزدىك سپورت جۋرناليسى»، «سپورتتى قولداۋشى ۇزدىك ۇيىم»، جانە «سپورتتى ناسيحاتتاۋشى ۇزدىك اقپاراتتىق اگەنتتىگى» - قاباي ۇلى ومىربەكتە (كازنيۋس اگەنتتىگى ۇزدىكسىز 8 جىل بويى سپورت سالاسىنداعى اقپاراتتاردى تاراتىپ كەلەدى) ەنگىزىلدى.

ورحان پامۋك تۋىندىلارىنىڭ قانشا تىلگە اۋدارىلعانىن بىلەسىز بە؟ - TRT

نوبەل سىيلىعىنىڭ لاۋرەاتى، تۇرىك جازۋشىسى ورحان پامۋكتىڭ تۋىندىلارى 60 تان استام تىلگە اۋدارىلعان، دەپ حابارلايدى تۇركيا راديو تەلەۆيزيا پورتالى.

«1952 -جىلى ستامبۋلدا ومىرگە كەلگەن ورحان پامۋك نوبەل سىيلىعىن العان تۇڭعىش تۇرىك رەتىندە تاريحتا قالدى. سونىمەن بىرگە ول «TIMە» جۋرنالى تاراپىنان الەمدەگى ەڭ ىقپالدى 100 تۇلعانىڭ قاتارىنا ەنگىزىلدى. جيىرما جاسىنا دەيىن سۋرەت سالىپ، سۋرەتشى بولۋدى ارمانداعان جازۋشى ستامبۋل تەحنيكالىق ۋنيۆەرسيتەتىنىڭ ساۋلەت كافەدراسىندا وقىدى. ساۋلەتشى دە، سۋرەتشى دە بولا المايتىنىن تۇسىنگەن ول جۋرناليستيكا ماماندىعىن وقىدى. ءبىراق بۇل ماماندىقتاردىڭ ەشبىرىن كاسىپ ەتە المايتىنىن ءتۇسىنىپ، 1974 -جىلى جازا باستادى» دەپ جازادى تۇركيالىق ب ا ق.

ايتا كەتۋ كەرەك، الەم كولەمىندە «كوپ ساتىلعاندار» تىزىمىندە ورىن العان جازۋشى تۇركيانىڭ كۇردەلى تاريحىن روماندارىندا حالىقارالىق ارەناعا تانىستىردى. 2006 -جىلى نوبەلدىڭ ادەبيەت سىيلىعىنا لايىقتى دەپ تابىلىپ، روماندارى الەمگە تانىلا باستاعان. جازۋشىنىڭ تۋىندىلارى 60 تان استام تىلگە اۋدارىلدى جانە 13 ميلليوننان كوپ ساتىلدى.

التايلىق سپورتشى مەملەكەتتىك جارىستا «التىن» ەنشىلەدى - «اعاجاي- التاي»

قىتايداعى حيلوڭجياڭ ولكەسىندە كونكي تەبۋ سپورتىنان مەملەكەتتىك چەمپيونات ءوتتى. بۇل سپورتتىق باسەكەگە قىتاي ەلىنىڭ جەر-جەرىنەن كەلگەن 44 كومانداداعى 318 سپورتشى باق سىناسقان. اتالعان جارىسقا التاي ايماعى كوكتوعاي اۋدانىنان كەلگەن اۋەسقوي سپورتشى ەرتاي قىران ۇلى شىنجاڭ كومانداسى اتىنان توپتىق جارىسقا قاتىناستى، دەپ حابارلايدى altxw.com.

اتالعان اقپارات كوزىنىڭ مالىمەتىنە سۇيەنسەك، بۇل جارىستا ەر-ايەلدەردىڭ 500 مەترلىك، 1000 مەترلىك، 1500 مەترلىك جارىسى، قىسقا ارالىقتى توپتىق جارىسى، ايەلدەردىڭ 3000 مەترلىك، ەرلەردىڭ 5000 مەترلىك جارىسى سياقتى 14 ءتۇرلى جارىس وتكىزىلگەن ەكەن.

«چەمپيونات وتكىزىلگەن كۇنى قانداسىمىز ەرتاي قىران ۇلى شىنجاڭنىڭ ارالاس A كومانداسى اتىنان قاتىسىپ، مەملەكەتتىك باسەكەدە «التىن» مەدال ەنشىلەدى. سونداي- اق ەرتايدىڭ جەرلەسى ەرعانات ايتناما ۇلى دا ەرلەر توبىنىڭ 5000 مەترلىك رەسپۋبليكالىق جارىسىندا 9- ورىندى ەنشىلەپ، كورنەكى ناتيجەگە قول جەتكىزدى»، دەپ تۇيىندەيدى قىتايدىق ب ا ق.

بۇحارا يسلام مادەنيەتىنىڭ استاناسى اتاندى - «ءو ز ا»

ورتا عاسىردىڭ مادەني وشاعى مەن ءدىني ءبىلىم ورتالىعىنا اينالعان بۇحارا جىل باسى 1-قاڭتاردان باستاپ يسلام مادەنيەتىنىڭ استاناسى اتاندى، دەپ حابارلايدى Uza.uz اقپاراتتىق پورتالى.

«ۇلى عۇلامالار مەن كەمەڭگەر ويشىلداردىڭ باسىن قوسىپ الەمدىك جاراتىلىستارعا ارقاۋ بولعان، ورتالىق ازيانى بىلاي العاندا شىعىس پەن باتىستاعى وركەنيەتتىڭ قاينار وشاعى سانالعان كونە بۇحارا قالاسى يسلام ىنتىماقتاستىق ۇيىمىنىڭ ماقۇلداۋى مەن بيىل 2020 -جىل ازياداعى يسلام مادەنيەتى استاناسى بولىپ جاريالاندى» دەپ جازادى «ءو ز ا» اقپاراتتىق اگەنتتىگى.

اتالعان اقپارات كوزىنىڭ مالىمەتىنشە، جىل سايىنعى ءداستۇر بويىنشا يسلام ىنتىماقتاستىق ۇيىمى الەمدەگى مۇسىلمان مەملەكەتتەرىنەن قۇرالعان ءۇش قالانى يسلام مادەنيەتى استاناسى دەپ جاريالايدى. سول تۇرعىدان ازيادان «بۇحارا» بولسا، اراب ەلدەرىنەن «كاير»، افريكا مۇسىلمان ەلدەرىنەن «بوماكو» 2020 -جىلدا يسلام مادەنيەتى استاناسى دەپ جاريالانعان.

شىڭگىل اۋدانى ءداستۇرلى مادەنيەت شاراسىن وتكىزدى - «اعاجاي- التاي»

1-2-قاڭتار كۇندەرى شىڭگىل اۋدانى ەرەكشە ءداستۇرلى مادەنيەت شاراسىن وتكىزدى، دەپ جازادى «اعاجاي-التاي» پورتالى.

بيىلعى جاڭا جىلدى قارسى الۋ «ءداستۇرلى مادەني تۋريستىك مەرەكە» دەپ اتالدى. ولاي اتالۋ سەبەبى بۇل جولعى مادەني شارا جالپىحالىقتىق دەڭگەيدە وتكەن.

شىڭگىل اۋداندىق ويىن- ساۋىق ۇيىرمەسى ارنايى دايىنداعان كونسەرت نومىرلەرىمەن مادەني شارانىڭ كورىگىن قىزدىرعان.

«ەگىنشى- مالشىلار اشەكەيلەپ جاساعان شانا، اربالارى ارقىلى تۋريستەرگە قىزمەت ءوتتى. مادەني شارا بارىسىندا، بايىرعى قار شاڭعى جارىسى، قىسقى فوتبول جارىسى، ات بايگە، شاڭعى تەبۋ، قازاقشا كۇرەس، تاس كوتەرۋ، ماشينا سۇيرەۋ قاتارلى ءارتۇرلى سپورتتىق شارالار ارقىلى كەلۋشىلەردىڭ كوڭىلىنەن شىقتى» دەپ جازادى قىتايلىق باسىلىم.

اتالعان اقپارات كوزىنىڭ دەرەگىنشە، شىڭگىل اۋدانى مادەني تۋريزم كاسىبىن دامىتىپ، سان- الۋان كوڭىل اشۋ شارالارىن ۇيىمداستىرىپ، قىسقى تۋريزم ارقىلى اۋداننىڭ ەكونوميكاسىن دامىتۋعا كۇش سالۋدا.

وزبەكستانداعى «قازاقستان جىلى» قانداي دەڭگەيدە ءوتتى؟ - «ءو ز ا»

2017 -جىلدىڭ 16-17-قىركۇيەك كۇندەرى قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆ مەملەكەتتىك ساپارمەن وزبەكستان رەسپۋبليكاسىندا بولىپ، ساپار بارىسىنداعى كەلىسسوز ناتيجەسىندە شاۆكات ميرزيايەۆ پەن باۋىرلاس ەكى حالىقتىڭ اراسىنداعى جاقىنداستىقتى ودان ءارى تەرەڭدەتۋگە سەپتىگى تيەر باستاما كوتەرىپ، وندا 2018 -جىلى قازاقستاندا وزبەكستان جىلىن وتكىزۋگە، ال 2019 -جىلدا وزبەكستاندا قازاقستان جىلىن وتكىزۋ جايلى كەلىسىم جاساسقان بولاتىن.

وسى كەلىسىمگە وراي وتكەن جىلى قازاقستاندا وزبەكستان جىلى جوعارى دەڭگەيدە ءوتىپ، وسىناۋ ءالقيسسا باستامانىڭ جالعاسى رەتىندە بيىل وزبەكستاندا قازاقستان جىلى جالعاسىن تاپتى» دەپ جازادى وزبەكستاننىڭ «ءو ز ا» مەملەكەتتىك اقپارات اگەنتتىگى.

وزبەكستاندىق ب ا ق وسىلاي ايتا كەلە وتكەن 2019 -جىلى وزبەكستانداعى «قازاقستان جىلى» قانداي دەڭگەيدە وتكەنىن، قانداي ساياسي، مادەني، ەكونوميكالىق، ىنتىماقتاستىق باعىتتاعى ءىس-شارالار بولعانى جايىندا كەڭىنەن شولۋ جاساعان.

«تۇركىنىڭ تاريحى جارالعالى تامىرى ءبىر قازاق پەن وزبەك ەلىنىڭ بىرلىگى، اسپانى ءبىر، ءدىنى ءبىر، سالت-ءداستۇرى ورتاق ەكى ەلدىڭ باۋىرلاس بولۋى مەن كورشى كەلۋى اللانىڭ بەرگەن سىيى. بيىلعى وتكەن وزبەكستانداعى «قازاقستان جىلى» اياسىندا تاريحتا بولماعان جۇمىستار اتقارىلىپ، ەكى حالىقتىڭ اراسىنداعى جاقىنداستىق تاعىدا تەرەڭدەي تۇسكەنى ءسوزسىز. ەكى حالىقتىڭ بۇگىنگى كۇنگى كورىنىسىن پرەزيدەنتىمىز شاۆكات ميرزيايەۆ: «اتا-بابالارىمىز ءبىزدىڭ قازىرگى دوستىعىمىزدى، شىنايى ءارى اشىق بايلانىستارىمىزدى كورگەندە قۋاناتىن ەدى» دەگەن بولاتىن» دەپ شولۋىن تۇيىندەيدى uza.uz.

اۆتور: بەيسەن سۇلتان ۇلى