ب ۇ ۇ تاريحتاعى ەڭ اۋقىمدى «جاھاندىق پىكىرتالاستى» وتكىزبەكشى

نيۋ-يورك. قازاقپارات – ب ۇ ۇ ادامداردى عالامشارىمىزدىڭ بۇگىنى مەن بولاشاعى تۋرالى اڭگىمەلەسۋگە شاقىرادى.

پىكىرتالاستىڭ ماقساتى - الەم تۇرعىندارىنىڭ پىكىرىن تىڭداۋ. تاريحتاعى ەڭ اۋقىمدى «جاھاندىق پىكىرالاس» اكسياسى ب ۇ ۇ 75 جىلدىعىن تويلايتىن جىلى، قاڭتار ايىندا باستالادى، دەپ حابارلايدى قازاقپارات News.un.org سايتىنا سىلتەمە جاساپ.

كەزدەسۋلەر بارلىق جەردە - پارلامەنت ءۇيى مەن ۋنيۆەرسيتەت ءدارىسحانالارىنان باستاپ، اۋىلدىق كلۋبتاردا بولادى، وعان قوعامنىڭ ءتۇرلى توپتارى مەن بۋىن وكىلدەرى قاتىسادى. قاتىسۋشىلاردىڭ پىكىرىن سارالاۋ ارقىلى تۋىنداعان يدەيالار 2020 -جىلدىڭ قىركۇيەك ايىندا ب ۇ ۇ-نىڭ الەمدىك كوشباسشىلارى مەن باسشىلىعىنىڭ تالقىلاۋىنا جىبەرىلەدى.

سونىمەن قاتار، ۇيىم قىزمەتشىلەرى قوعامدىق ساۋالناما جۇرگىزىپ، ونىڭ ناتيجەلەرىن ب ا ق-تا جاريالاپ وتىرادى. ول قوسىمشا اقپارات جيناپ، عالامشار تۇرعىندارى الەمدى 2045 -جىلى قالاي كورگىسى كەلەتىنىن تۇسىنۋگە مۇمكىندىك بەرەدى. اۆتورلاردىڭ پىكىرى بويىنشا، وسىلايشا جەر تۇرعىندارىنىڭ كوپشىلىگى ءوزىنىڭ بولاشاعىنىڭ قۇرىلۋىنا ۇلەس قوسادى.

ب ۇ ۇ باس حاتشىسى انتونيۋ گۋتەرريشا ءقازىر بارلىعى ءبىر-بىرىمەن بايلانىستى، ال زاماناۋي ماسەلەلەردى تەك الەم بولىپ جۇمىلۋ ارقىلى شەشۋگە بولادى دەيدى.

«ەشقانداي مەملەكەت، ەشقانداي قوعام ماسەلەنى جالعىز شەشە المايدى، بىزگە كۇش بىرىكتىرۋ كەرەك. ءبىز ايتىپ قانا قويماي، تىڭداي الۋىمىز كەرەك. بۇل ماسەلەدە ءارقايسىسىڭىزدىڭ پىكىرىڭىز ماڭىزدى. ءبىز ءسىزدىڭ ويىڭىزدى بىلگىمىز كەلەدى، الەم تۇرعىندارىنىڭ ءومىرىن جاقسارتۋ ءۇشىن نە ىستەي الاتىنىمىزدى انىقتاعىمىز كەلەدى»، - دەپ مالىمدەدى ب ۇ ۇ باسشىسى.

ديالوگ پەن زەرتتەۋ ءۇش سۇراققا نەگىزدەلگەن: ادامزات بولاشاعى، الەمدەگى ءۇردىس مەن جاھاندىق سەرىكتەستىك. 6-قاڭتار كۇنى ب ۇ ۇ سەرىكتەستەرىمەن بىرلەسە وتىرىپ جاھاندىق پىكىرتالاسقا قاتىستى 38 قاتىسۋشى ويىن بىلدىرەتىن بەينەروليك جاريالايدى.