كولىك يەلەرى قانداي جاعدايدا جۇرگىزۋشى كۋالىگىنەن ءومىر بويىنا ايىرىلادى

نۇر-سۇلتان. قازاقپارات – ق ر باس پروكۋرورىنىڭ ورىنباسارى مارات احمەتجانوۆ ماس كۇيىندە كولىك تىزگىندەگەندەر جازاسى بويىنشا جاڭا ەرەجەلەردى ءتۇسىندىردى، دەپ حابارلادى قازاقپارات.

 سپيكەردىڭ ايتۋىنشا، مەملەكەت باسشىسى قول قويعان قىلمىستىق، قىلمىستىق- پروتسەستىك زاڭنامانى جەتىلدىرۋ بويىنشا ق ر زاڭى ارقىلى ماس كۇيىندە جول- كولىك ەرەجەسىن بۇزعاندارعا جەكە باپ ەنگىزىلدى.

 «قازان ايىندا الماتىدا وتكەن جينالىستا پرەزيدەنت قاسىم- جومارت توقايەۆ ماس كۇيىندە كولىك ايداعانداردىڭ جازاسىن كۇشەيتۋدى تاپسىردى. ولاردى تۇرمەگە وتىرعىزىپ، ايىپپۇلىن ءوسىرىپ، ءومىر بويىنا جۇرگىزۋشى كۋالىگىنەن ايىرۋدى ۇسىندى. جىل سايىن قازاقستاندا 30 مىڭعا جۋىق ماس جۇرگىزۋشى ۇستالادى. سالدارىنان بولاتىن جول- كولىك اپاتىنان بيىل مىڭنان استام ادام جاراقات الدى، ءبىرازى قازا تاپتى. سوندىقتان، قىلمىستىق كودەكسكە جاڭا باپ (ق ك 345-1-بابى) ەنگىزىپ وتىرمىز»، - دەدى مارات احمەتجانوۆ ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

 ونىڭ ايتۋىنشا، بۇگىنگە دەيىن ماس جۇرگىزۋشى مەن ساۋ جۇرگىزۋشىلەرگە ورتاق ءبىر نورما قولدانىلىپ كەلگەن. بۇعان دەيىن ماس جۇرگىزۋشىگە 2 جىلعا جۇرگىزۋشى كۋالىگىنەن ايىرۋ مەن 40 كۇندىك قاماۋ جازاسى قاراستىرىلسا، ەندى ولار 1 جىلدان 10 جىلعا دەيىن باس بوستاندىعىنان ايىرىلۋى مۇمكىن.

 «ماس جۇرگىزۋشى كەسىرىنەن ادام ءولىمى بولسا، اۋىر قىلمىس سانالادى جانە تاراپتاردىڭ ىمىراعا كەلۋىنە تىيىم سالىنادى. ايىپتى ادام 10 جىلعا دەيىن اباقتىعا قامالىپ، ءومىر بويىنا جۇرگىزۋشى كۋالىگىنەن ايىرىلۋى مۇمكىن»، - دەدى م. احمەتجانوۆ.

 ايتا كەتەيىك، مارات احمەتجانوۆ ەلىمىزدەگى قىلمىس احۋالى تۋرالى، سونداي- اق قىلمىستىق، قىلمىستىق- پروتسەستىك زاڭنامانى جەتىلدىرۋ بويىنشا ق ر زاڭىنىڭ نەگىزگى نوۆەللالارى تۋرالى ايتىپ بەردى.

اتالعان زاڭعا ق ر پرەزيدەنتى 2019 -جىلدىڭ 28 - جەلتوقسانىندا قول قويدى جانە ول 2020 -جىلدىڭ 1 - قاڭتارىنان باستاپ كۇشىنە ەنەدى.

www.24.kz