قازاقستاندىق اۋە كومپانياسى سەرتيفيكات الۋ ءۇشىن مەملەكەتتىك ورگاندارعا قىسىم جاساعان
بۇل تۋرالى بۇگىن ق ر پرەمەر- ءمينيسترىنىڭ ورىنباسارى رومان سكليار ايتتى، دەپ حابارلايدى قازاقپارات ءتىلشىسى.
«Bek Air» وسى جىلدار ىشىندە لوببيستەردىڭ قاتىسۋىمەن ءتۇرلى دەڭگەيدە حالىقارالىق اۋە رەيستەرىن ورىنداۋ ءۇشىن IOSA سەرتيفيكاتىن الىپ تاستاۋعا تىرىستى. ءبىراق، مۇنداي قىسىمعا قاراماستان مينيسترلىك وعان بارعان جوق»، - دەدى ول ۇكىمەت وتىرىسىنان كەيىن ب ا ق وكىلدەرىنە بەرگەن سۇحباتىندا.
ونىڭ اتاپ وتۋىنشە، حالىقارالىق تاسىمالدى جۇزەگە اسىراتىن بارلىق قازاقستاندىق كومپانيا IOSA سەرتيفيكاتىن العان.
«ىشكى تاسىمالعا دا ونىڭ تالاپتارى قاجەت بولاتىن. الايدا، وزدەرىڭىز دە بىلەسىزدەر، 2016 -جىلى ب ا ق- تا ۇلكەن ناۋقان بولىپ، كەيبىر جۋرناليستەر مەن دەپۋتاتتار كومپانيانى قولداپ شىقتى. مۇمكىن ولاردىكى دە دۇرىس شىعار. ىشكى باعدارلاردىڭ قوسىمشا تالاپتارعا ساي بولۋى كەرەك تە ەمەس شىعار. سول كەزدە وكىلەتتى مەملەكەتتىك ورگان - يندۋستريا مينيسترلىگى ازاماتتىق اۆياتسيا كوميتەتى «IOSA تالاپتارى ىشكى دە، سىرتقى دا تاسىمالعا قاجەت» دەلىنگەن قاۋلى شىعاردى. بۇل جەردە بەلگىلى ءبىر قايتا ساقتاندىرۋ ەلەمەنتتەرى، ياعني، قوسىمشا تالاپتار بار»، - دەدى رومان سكليار.
ۆيتسە- پرەمەردىڭ ايتۋىنشا، اۆياتسيادا قاۋىپسىزدىكتى قولداۋ ءۇشىن باسى ارتىق قوسىمشا تالاپتار مۇلدەم بولمايدى.
«دەگەنمەن، تابيعي مونوپوليالاردى رەتتەۋ جانە باسەكەلەستىكتى قورعاۋ كوميتەتى بۇل كاسىپكەرلەردىڭ قۇقىعىن بۇزۋ دەگەن ۇيعارىم شىعارىپ، مينيسترلىك ىشكى رەيستەر ءۇشىن بۇل تالاپتى الىپ تاستادى»، - دەپ ءتۇسىندىردى رومان سكليار.
اۆتور مارلان جيەمباي