قازاقستاندا مال ۇرلىعى ءۇشىن جازا كۇشەيتىلدى

نۇر-سۇلتان. قازاقپارات – ق ر باس پروكۋرورىنىڭ ورىنباسارى مارات احمەتجانوۆ ەلىمىزدەگى قىلمىس احۋالى تۋرالى، سونداي-اق قىلمىستىق، قىلمىستىق- پروتسەستىك زاڭنامانى جەتىلدىرۋ بويىنشا ق ر زاڭىنىڭ نەگىزگى نوۆەللالارى تۋرالى ايتىپ بەردى، دەپ حابارلايدى قازاقپارات ءتىلشىسى.

اتالعان زاڭعا ق ر پرەزيدەنتى 2019 -جىلدىڭ 28-جەلتوقسانىندا قول قويدى.

«جاڭا زاڭ بويىنشا قىلمىستىق كودەكستىڭ 188-1-بابى ەنگىزىلەدى، وندا مال ۇرلىعى ءۇشىن جازانىڭ ەڭ ۇزاق مەرزىمى - 12 جىلعا دەيىن باس بوستاندىعىنان ايىرۋ قاراستىرىلعان. ياعني، مال ۇرلىعى اۋىر قىلمىستار قاتارىنا اۋىستىرىلادى، وندا قايتالانعان قىلمىستار ءۇشىن تاتۋلاسۋ بولمايدى. قىلمىستىق توپ قۇرامىندا جانە اسا ءىرى كولەمدە جاسالعان قىلمىس ءۇشىن جازا كۇشەيتىلىپ، 12 جىلعا دەيىن باس بوستاندىعىنان ايىرۋ جازاسى كوزدەلەدى»، - دەدى مارات احمەتجانوۆ ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

باس پروكۋرور ورىنباسارى مال ۇرلىعى ماسەلەسىنە پرەزيدەنتتىڭ ەرەكشە نازار اۋدارعانىن جەتكىزدى.

«كوپتەگەن پۋنكت بويىنشا مال ۇرلىعىن اۋىر قىلمىس ساناتىنا جاتقىزۋعا بولادى. جاعدايدى سارالاي كەلە، مال ۇرلىعىنىڭ جەكە كاسىپكە اينالعانىن، وعان كوپتەگەن ادامداردىڭ قاتىساتىنىن كوردىك»، - دەدى م. احمەتجانوۆ.

اۆتور: ايجان سەرىكجان قىزى