الماتى وبلىسىنداعى شەنەۋنىكتەردىڭ توبەلەسى: قىلمىستىق ءىس قوزعالدى

None
None
تالدىقورعان. قازاقپارات - الماتى وبلىسىنداعى شەنەۋنىكتەردىڭ توبەلەسىنە قاتىستى تىڭ دەرەكتەر جاريالاندى، دەپ حابارلايدى قازاقپارات ءتىلشىسى.

الماتى وبلىسى جامبىل اۋدانى اكىمىنىڭ اپپارات باسشىسى ا. نۇرپەيىسوۆتىڭ رەسمي تاراتقان اقپاراتىنا قاراعاندا، شۋلى وقيعاعا قاتىستى قىلمىستىق ءىس قوزعالىپ، تەرگەۋ شارالارى جۇرگىزىلۋدە.

«ۇزىناعاش اۋىلىنداعى «ميراس» ساۋدا ورتالىعىندا ورنالاسقان «بەلىە روزى» مەيرامحاناسىندا اۋداندىق مادەنيەت ءۇيىنىڭ زاڭگەرى ي. بەيسەبايەۆ پەن اكىمنىڭ ورىنباسارى ا. ابدىبايەۆ، اۋداندىق ساۋلەت جانە قالا قۇرىلىسى ءبولىمىنىڭ باس مامانى ق. ۇسەنبايەۆ اراسىندا توبەلەس ورىن العان. توبەلەس بارىسىندا ا. ابديەۆ پەن ق. ۇسەنبايەۆ بىرلەسە وتىرىپ ي. بەيسەبايەۆقا شابۋىل جاسادى. اۋدان اكىمدىگىندە وسى تەكسەرۋ بويىنشا جۇمىس كوميسسيا توبى قۇرىلدى. توبەلەسكە قاتىسۋشىلار ا. ابديبايەۆ پەن ق. ۇسەنبايەۆتان ورىن العان وقيعا تۋرالى تۇسىنىكتەمە الىندى. وسىعان بايلانىستى، ي. بەيسەبايەۆ اۋداندىق اۋرۋحانادا، تۇسىنىكتەمە الۋعا مۇمكىن بولمادى. تەكسەرۋ جۇمىستىڭ ناتيجەسى بويىنشا باس مامان ق. ۇسەنبايەۆ اۋداندىق ساۋلەت جانە قالا قۇرىلىسى ءبولىمىنىڭ بۇيرىعىمەن قىزمەتىنەن بوساتىلدى. ي. بەيسەبايەۆقا قاتىستى شارالار اۋرۋحانادان شىققاننان كەيىن قابىلدانادى. توبەلەس فاكتىسى بويىنشا قىلمىستىق ءىس قوزعالدى، تەرگەۋ شارالارى جۇرگىزىلۋدە. ا. ابديبايەۆ تەرگەۋ اياقتالعانشا وتىرعان لاۋازىمىنان بوساتىلدى»، - دەدى ا. نۇرپەيىسوۆ.

ەسكە سالساق، الماتى وبلىسى جامبىل اۋدانى اكىمى ورىنباسارىنىڭ مەيرامحاناداعى توبەلەسى الەۋمەتتىك جەلىنى شۋلاتقانى جانە وسى وقيعاعا قاتىستى وبلىس اكىمىنىڭ باسپا ءسوز حاتشىسى عالىمۇرات جۇكەلدىڭ تۇسىنىكتەمە بەرگەنى تۋرالى حابارلاعان بولاتىنبىز.

سوڭعى جاڭالىقتار