الماتىداعى ۇشاق قۇلاعان اۋماققا ارنايى كوميسسيا ۇشىپ شىقتى

نۇر-سۇلتان. قازاقپارات - الماتىداعى ۇشاقتىڭ قۇلاعان اۋماققا ارنايى كوميسسيا ۇشىپ شىقتى. بۇل تۋرالى ازاماتتىق اۆياتسيا كوميتەتىنەن حابارلاندى.

كوميتەت تاراتقان اقپاراتتارعا قاراعاندا، بۇگىن، 2019-جىلعى 27- جەلتوقساندا ساعات 07:22  دە الماتى-نۇر-سۇلتان باعىتى بويىنشا بەك ەير اۋە كومپانياسىنىڭ №Z2100 رەيسى ۇشىپ كوتەرىلۋ كەزىندە بيىكتىكتەن ايىرىلىپ، بەتوندى قورشاۋدى سىندىرعان.

ەكى قاباتتى قۇرىلىسپەن قاقتىعىس بولدى. دەرەۋ قۇتقارۋ جۇمىستارى باستالدى، ءورت بولعان جوق. جولاۋشىلاردى جانە اۋە كەمەسىنىڭ ەكيپاجىن ەۆاكۋاتسيالاۋ جۇزەگە اسىرىلۋدا.

الماتىدا قۇلاعان ۇشاق ءىسى بويىنشا ق ر پرەمەر-ءمينيسترىنىڭ تاپسىرماسى بويىنشا پرەمەر-ءمينيستردىڭ ورىنباسارى باستاعان ۇكىمەتتىك كوميسسيا قۇرىلدى. كوميسسيا قۇرامىندا ق ر يندۋستريا جانە ينفراقۇرىلىمدىق دامۋ ءمينيسترى جانە باسقا دا مەملەكەتتىك ورگانداردىڭ وكىلدەرى بار.

كوميسسيا وقيعا ورنىنا ۇشىپ شىعادى. وقيعانىڭ ەگجەي-تەگجەيلى جاعدايلارى مەن سەبەپتەرى انىقتالادى. وقيعا ءمان-جايى انىقتالعانعا دەيىن وسى تيپتەگى ۇشاقتاردىڭ ۇشۋى ۋاقىتشا توقتاتىلدى. الدىن الا مالىمەتتەر بويىنشا، بورتتا 95 جولاۋشى، 5 ەكيپاج مۇشەسى بولعان.