پارلامەنت پەداگوگ مارتەبەسىنە قاتىستى زاڭدى قابىلدادى

نۇر-سۇلتان. قازاقپارات - بۇگىن پارلامەنت سەناتىنىڭ جالپى وتىرىسىندا «پەداگوگ مارتەبەسى تۋرالى» زاڭ قابىلداندى، دەپ حابارلايدى قازاقپارات ءتىلشىسى.

«پەداگوگ مارتەبەسى تۋرالى» زاڭ جوباسى 21 باپتان تۇرادى جانە جارتى ميلليوننان استام ۇستازدىڭ جۇمىسىنا قاتىستى. جالپى، زاڭ جوباسى ءتورت باعىتتى قامتيدى. بىرىنشىدەن، ۇستازداردىڭ قۇقىقتارىن كەڭەيتۋ جانە وزىنە ءتان ەمەس جۇمىستاردان بوساتۋ، ولاردىڭ جۇكتەمەسىن ازايتۋ. ەكىنشىدەن، مۇعالىمنىڭ قىزمەتىنە قويىلاتىن تالاپتاردى كۇشەيتۋ. ۇشىنشىدەن، ماتەريالدىق ەمەس ىنتالاندىرۋ تەتىكتەرى، سونداي-اق تورتىنشىدەن، ماتەريالدى ىنتالاندىرۋ قادامدارى»، - دەدى ق ر ءبىلىم جانە عىلىم ءمينيسترى اسحات ايماعامبەتوۆ.

ونىڭ سوزىنە قاراعاندا، ءبىرىنشى باعىت - پەداگوگتاردىڭ قۇقىقتارى بويىنشا بىرنەشە نورما قاراستىرىلعان. ولاردىڭ بارلىعى ءمۇعالىمنىڭ جەكە دامۋىنا جانە وقۋ پروتسەسىن جەتىلدىرۋگە مۇمكىندىك بەرەدى. مۇعالىمدەردى ارتىق جۇمىسقا، ءوزىنىڭ قىزمەتىنە كىرمەيتىن جۇمىسقا تارتۋعا، شامادان تىس ەسەپ بەرۋگە، قاعازباستىلىققا، نەگىزسىز تەكسەرۋ جۇرگىزۋگە تىيىم سالۋ ارقىلى جۇكتەمەنى ازايتۋ بويىنشا جەكە نورمالار كوزدەلگەن.

«پەداگوگ مارتەبەسىن ارتتىرۋ ونىڭ قىزمەتىنە قويىلاتىن تالاپتاردى كۇشەيتۋدى قاجەت ەتەدى. وسى ورايدا زاڭ جوباسىنا سايكەس، پەداگوگيكالىق جۇمىسقا جىبەرىلمەيتىن سەبەپتەر دە كەڭەيتىلدى. بۇدان بولەك، مۇعالىمدەردىڭ ەتيكا ماسەلەلەرىنە دە كوڭىل اۋدارىلىپ وتىر. ءار ءبىلىم مەكەمەسىندە ادەپ بويىنشا كەڭەستەر ينستيتۋتى ەنگىزىلىپ، جۇمىس ىستەيدى»، - دەدى مينيستر.

ا. ايماعامبەتوۆتىڭ ايتۋىنشا، مۇعالىمدەردىڭ بالالارىنا بالاباقشاعا ءبىرىنشى كەزەكتە ورىن بەرۋ نورماسى قاراستىرىپ وتىر. بارلىق پەداگوگ قىزمەتكەرلەر الداعى ۋاقىتتا 56 كۇندىك دەمالىسقا شىعا باستايدى.

سونىمەن قاتار اۋىلدىق جەرلەردە جۇمىس ىستەيتىن پەداگوگتارعا جەكە تۇرعىن ءۇي قۇرىلىسى ءۇشىن جەر ۋچاسكەلەرىن الۋ ءۇشىن باسىمدىق بەرىلمەك. ءبىلىم بەرۋ ۇيىمدارىندا جۇمىس ىستەيتىن ەر ازاماتتاردى اسكەري قىزمەتكە شاقىرۋدى كەيىنگە قالدىرۋ نورماسى دا قاراستىرىلعان. بۇنىڭ الدىندا وسى نورما اۋىلدىق جەرگە قاتىستى بولسا، قازىرگى ۋاقىتتا بۇل نورما كەڭەيتىلىپ وتىر.

«مەملەكەت باسشىسىنىڭ تامىز كونفەرەنسياسىندا بەرگەن تاپسىرماسىنىڭ اياسىندا ءتورت جىل ىشىندە مۇعالىمدەردىڭ ەڭبەكاقىسى ەكى ەسە ارتادى. بۇل تۇرعىدان الداعى قاڭتار ايىنان باستاپ پەداگوگتاردىڭ جالاقىسى 25 پايىزعا وسەدى. دەپۋتاتتاردىڭ قولداۋىمەن وسى بەكىتىلگەن بيۋدجەتتە ءتيىستى قاراجات قاراستىرىلعان. ءبىز وسى جۇمىسقا قاڭتاردان باستاپ كىرىسۋگە دايىنبىز»، - دەدى اسحات ايماعامبەتوۆ.

بەلگىلى بولعانداي، وقۋ ورىندارىنىڭ مۇعالىمدەرىنە ماگيستر دارەجەسى ءۇشىن قوسىمشا اقى ەنگىزىلەدى.

ايتا كەتەيىك، سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە پەداگوگ مارتەبەسى، وقۋشى مەن مۇعالىمگە جۇكتەمەنى تومەندەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى دا ەكى وقىلىمدا قارالىپ، قابىلداندى.

اۆتور: رۋسلان عابباسوۆ