ديماش الەمدىك ۇزدىك ورىنداۋشىلار اراسىندا ءۇشىنشى ورىن يەلەندى

نۇر-سۇلتان. قازاقپارات – ديماش قۇدايبەرگەن الەمدەگى اداجيو البينوني ءانىن ۇزدىك ورىندايتىن انشىلەردىڭ ءبىرى اتاندى.

تىڭدارمانداردىڭ اشىق داۋىس بەرۋ ناتيجەسى بويىنشا قازاقستاندىق ءۇشىنشى ورىننان كورىندى دەپ حابارلايدى KAZ. NUR. KZ.

25 جاستاعى ديماش قۇدايبەرگەن الەم بويىنشا «Adagio» ءانىن ۇزدىك ورىنداۋشىلار قاتارىنان كورىنىپ، بۇل رەيتينگتە «قولا جۇلدەنى» يەلەندى. اشىق داۋىس بەرۋ 25- قاراشا مەن 25- جەلتوقسان ارالىعىندا Adagio.World سايتىندا جۇرگىزىلدى.

وسىلايشا، Adagio World نۇسقاسى بويىنشا ءبىرىنشى ورىندى رەسەيلىك وپەرا ءانشىسى سەرگەي دۋدينسكي، ال ەكىنشى ورىندى تانىمال فرانسۋز ءانشىسى لارا فابيانعا بۇيىردى.

اتالعان كونكۋرستا حوسە كاررەراس، ۆيتاس جانە باسقا دا الەمگە ايگىلى جۇلدىزدار باق سىناعان. جالپى، بۇل نوميناتسيادا 15 تانىمال ءارتىس اراسىندا تاڭداۋ جۇرگىزىلدى.

ديماشقا 402 مىڭنان استام داۋىس بەرىلگەن. ال سەرگەي دۋدينسكييگە - 414 مىڭ جانە لارا فابيان - 408 مىڭ داۋىس جيناپتى.

بۇعان دەيىن ديماش قۇدايبەرگەن قىتايدا وتكەن «I am Singer» حالىقارالىق بايقاۋىندا «Adagio» ءانىن ورىنداپ، سول اينالىمدا ءبىرىنشى ورىندى يەلەنگەن بولاتىن. سول كەزدە فرانسۋز ءانشىسى لارا فابيان ونىڭ تالانتى مەن ەرەكشە داۋسىنا ءتانتى بولعانىن جەتكىزگەن ەدى.

ايتا كەتەيىك، ەرەكشە داۋىس يەسى - قازاقستاندىق ديماش قۇدايبەرگەن نيۋ-يوركتەگى العاشقى جەكە ءان كەشىن انشلاگپەن وتكىزدى. ونىڭ «Arnau tour ENVOY» دەپ اتالاتىن شوۋ كونسەرتىنە عالامشاردىڭ تۇكپىر-تۇكپىرىنەن جانكۇيەرلەر جينالدى. تىڭدارمان قاۋىم ەرەكشە دارىن يەسىن ءۇش ساعات بويى تابيعي جاندى داۋىستا تىڭداعان.

سونداي-اق جەلىدە ديماش قۇدايبەرگەننىڭ باعاسى شامامەن 390 مىڭ دوللار تۇراتىن ساعات تاعاتىنى جايلى مالىمەت پايدا بولدى. الەۋمەتتىك جەلىدە جاريالانعان اقپاراتقا ساي ديماش قۇدايبەرگەن اسا سيرەك كەزدەسەتىن قىزعىلت التىن ءتۇستى Astronomia Solar Zodiac ساعاتىن تاعىپ ءجۇر.