موڭعوليالىق قانداسىمىز مالايزياداعى اۆتورالليدە الەم چەمپيونى اتاندى - شەتەلدەگى قازاق ءتىلدى ب ا ق-قا شولۋ

نۇر-سۇلتان. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

قازاقتىڭ ۇلتتىق شاڭعى سپورتىن ناسيحاتتاۋ شاراسى ءوتتى - تيانشاننەت

قازاقتىڭ ءداستۇرلى تەرى شاڭعىسىن قايتا جاڭعىرتۋ ماقساتىندا 15-جەلتوقسان كۇنى شىنجاڭنىڭ التاي ايماعى، كوكتوعاي اۋدانىنداعى شاڭعى الاڭىندا كەڭ كولەمدى سپورتتىق شارا وتكىزىلدى، دەپ حابارلايدى «تيانشاننەت» اقپاراتتىق پورتالى.

بۇل جولعى سپورتتىق شارا 2020 -جىلعا جوسپارلانعان مەملەكەت كولەمىندەگى سپورت ويىندارىنىڭ باستاماسى ەكەن.

اتالعان اقپارات كوزىنىڭ مالىمەتىنشە، التاي ايماعى «ادامزاتتىڭ شاڭعى تەبۋ وشاعى» دەپ اتالادى. وسى جولى قار شاڭعىلارىنىڭ ىشىندە تەرى شاڭعىسى باستى نازاردا بولعانىن جازادى قىتايلىق ب ا ق.

جەرگىلىكتى تۇرعىندار پايدالاناتىن تەرى شاڭعىسى ەڭ بايىرعى قار شاڭعىنىڭ ءبىر ءتۇرى. تەرىدەن جاسالعان قار شاڭعىسى قىسى ۇزاق، قارى قالىڭ التايدىڭ جەرگىلىكتى تۇرعىندارى ءۇشىن ەجەلدەن بەرى پايدالانىپ كەلە جاتقان قىستىق كولىك قۇرالى. تاۋلى جەردە كولىك قاتىناسى قولايسىز بولعاندىقتان، جەرگىلىكتى قازاقتار تەرى شاڭعىنى كەڭىنەن پايدالانعان. اڭشىلار مەن شارۋالاردىڭ نەگىزگى كولىگى وسى تەرى شاڭعىسى بولعان. شاڭعىنىڭ وزەگىن قايىڭ مەن قاراعاي اعاشىنان جاساپ، سىرتىن جىلقى سيراعىنىڭ تەرىسىمەن قاپتايدى. ورنىنان قوزعالىپ، ەكپىن الۋ ءۇشىن ءبىر تاياقتى عانا قولدانعان. باسقا قار شاڭعىعا قاراعاندا، تەرىدەن جاسالعان شاڭعىنىڭ وزىندىك ەرەكشەلىگى - ورگە شىققاندا تەرى جۇنىنە قارسى باعىتتا بولعاندىقتان، بيىكتەن ارتقا سىرعىپ كەتپەيدى. تاۋدان تومەن سىرعاناعاندا ءبىر باعىتتا جىعىلعان تەرى جۇنىنە باعىتتاس بولعاندىقتان، جىلدامدىعى باسقا قار شاڭعىلاردان تەز بولادى.

ەسكە سالا كەتەيىك، التايداعى بايىرعى قار شاڭعىسى بەينەلەنگەن جارتاس سۋرەتىن زەرتتەگەن عالىمدار، ونى 10 مىڭ جىلدىڭ الدىنداعى جادىگەر رەتىندە مويىنداعان. وسىدان كەيىن 2007 -جىلى «التاي تاۋى ەڭ بايىرعى قار شاڭعىسى مەكەنى» دەپ گيننەستىڭ رەكوردتار كىتابىنا ەنگىزىلدى.

Forbes Uzbekistan باسىلىمىنىڭ باسشىسى قازاقستاندىق بولادى - «ءو ز ا» اقپاراتتىق اگەنتتىگى

الەمدەگى ەڭ تانىمال ەكونوميكالىق- قارجى جايىنداعى مالىمەتتەر بويىنشا اقپارات تاراتاتىن امەريكا جۋرنالى «Forbes» وزبەكستاندا ءوز باسىلىمىن كەلەر 2020 -جىلدان باستاپ شىعارماق. Forbes Uzbekistan باسىلىمىنىڭ باس كەڭسەسى تاشكەنتتە ورنالاسىپ، جۋرنالدىڭ العاشقى نۇسقاسى ناۋرىز ايىندا كوپشىلىككە جول تارتادى، دەپ جازادى وزبەكستاننىڭ «ءو ز ا» مەملەكەتتىك اقپاراتتىق اگەنتتىگى.

اتاۋلى باسىلىم ءۇشىن رۇقساتنامانى قازاقستاندىق كاسىپكەر ارمانجان بايتاسوۆ العان. ول رەداكسيانىڭ باسشىسى «Forbes Kazakhstan» جۋرنالىنىڭ رەداكتورى اناستاسيا نوۆيكوۆا بولاتىنىن ءمالىم ەتتى.

«ءوزا» باسىلىمنىڭ مالىمەتىنە سۇيەنسەك، وزبەك ب ا ق- قا جاڭادان ەنگەلى تۇرعان اقپارات كوزى ەكى تىلدە - وزبەك جانە ورىس ءتىلدى جۋرنال مەن ۆەب- سايتىن ىسكە قوسۋدى جوسپارلاپ وتىر. قازىرگى ۋاقىتتا ونىڭ العاشقى نۇسقاسىن شىعارۋعا قىزۋ دايىندىق باستالىپ تا كەتتى. Forbes Uzbekistan-نىڭ نەگىزىن قالاۋشى ارمانجان بايتاسوۆ وزبەكستاندا Forbes Club-تى تىكەلەي ءوزى جۇرگىزبەك نيەتتە.

موڭعوليالىق قانداسىمىز مالايزيادا وتكەن اۆتورالليدە الەم چەمپيونى اتاندى - kaznews.mn

اۆتورالليدەن «RFC- Grand Final -2019» الەم چەمپيوناتى ءوتتى. مالايزيانىڭ نۋ ورماندارىندا 10 كۇنگە جالعاسىپ، مىڭداعان شاقىرىمدى قامتىعان جارىسقا موڭعوليا كومانداسىندا قانداسىمىز سابىرجان بايانحان ۇلى ونەر كورسەتتى. الەمنىڭ ەڭ مىقتى دەگەن كوماندالارى مەن سپورتشىلارىن ارتتا قالدىرعان س. بايانحان ۇلى الەم چەمپيونى اتاندى، دەپ حابارلايدى موڭعوليالىق ب ا ق.

اقپارات كوزىنىڭ مالىمەتىنە سۇيەنسەك، سابىرجان بايانحان ۇلى موڭعوليانىڭ ەردەنەت قالاسىندا تۇرادى. بۇل باسەكەگە موڭعوليادان العاش رەت وزدەرى قۇراستىرعان اۆتوكولىكپەن قاتىسقان. ايتا كەتكەن ءجون، كەزەكتى جولسىز جەردەگى اۆتورالليدەن ازيا چەمپيوناتى 2020 -جىلى موڭعوليادا وتەدى.

TRT ارناسىندا جاريالانعان قازاقستاننىڭ العاشقى تاۋەلسىزدىك حابارى - TRT

باۋىرلاس تۇركيا ەلى - قازاقستاننىڭ تاۋەلسىزدىگىن العاشقى بولىپ مويىنداعان ەل. قانداستاردان كەلگەن كوپتەن كۇتكەن حاباردى دا راديودان دا، تەلەديداردان دا الەمگە پاش ەتتى، دەپ جازادى تۇركيا راديو تەليەۆيزيا پورتالى.

«مىنە، سول تۇركيا تەلەراديو كورپوراتسياسى TRT ارناسىندا جاريالانعان قازاقستاننىڭ تاۋەلسىزدىك الۋى تۋرالى حابارىن كورىڭىزدەر» دەگەن ۆيدەواقپاراتىن جاريالايدى تۇركيالىق ب ا ق.

كورىنىس TRT مۇراعاتىنان الىنعان ەكەن.

مەكتەپ باعدارلاماسىنا جاڭا وقۋ ءپانى ەنگىزىلەدى - «ءو ز ا» اقپاراتتىق اگەنتتىگى

وزبەكستانداعى جالپى ورتا بىلىمدىك مەكەمەلەردە «تاربيە» ءپانى كەزەڭىمەن وقۋ باعدارلاماسىنا ەنگىزىلەتىن بولادى، دەپ حابارلايدى وزبەكستاننىڭ «ءو ز ا» مەملەكەتتىك اقپاراتتىق اگەنتتىگى.

اتالعان ب ا ق- تىڭ مالىمەتىنشە، مينيسترلەر كابينەتىنىڭ وسى جونىندەگى ءتيىستى قاۋلىسىنىڭ جوباسى تالقىلاۋعا جىبەرىلدى. وندا، مەكتەپ باعدارلاماسىنداعى «ادەپ»، «وتان سەزىمى»، «ۇلتتىق يدەيا مەن مادەنيەت نەگىزدەرى» جانە «الەم دىندەر تاريحى» اتتى پاندەر بىرىكتىرىلىپ تەك «تاربيە» ساباعى بولادى. 1-9-سىنىپتارعا ارنالعان بۇل ءپاندى 2020-2021 -جىلعى وقۋ باعدارلاماسىنا ەنگىزۋ كوزدەلىپ وتىر.

«اتالمىش باعدارلامانى وزبەكستان رەسپۋبليكاسى حالىقتىق ءبىلىم مينيسترلىگى «تاربيە» ءپانى بويىنشا جالپى مەملەكەتتىك ءبىلىم بەرۋ ستاندارتى مەن وقۋ ادىستەمەسىن دايىنداپ ەنگىزەدى. جوبا بويىنشا 2020-2021 وقۋ جىلىندا 1-9 سىنىپتاردىڭ، ال 2021-2022 وقۋ جىلىنان باستاپ 10-11 سىنىپتارعا «تاربيە» ساباعىن وقىتۋ ءۇشىن مۋلتيمەديالىق قوسىمشالار مەن وقۋ- ادىستەمەلىك كەشەندەرگە تاپسىرىس جاسالاتىن بولادى»، - دەپ تۇيىندەيدى uza.uz.

اۆتور: بەيسەن سۇلتان ۇلى