ديپلوممەن «اۋىلعا» باعدارلاماسىنىڭ ناتيجەلەرى قانداي؟
بۇل تۋرالى قازاقپارات ۇلتىق ەكونوميكا مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.
«ديپلوممەن اۋىلعا» باعدارلاماسى 2009-جىلعى 1- شىلدەدە ىسكە قوسىلدى. اۋىلدىق اۋماقتاردىڭ كادرلىق الەۋەتىن الەۋمەتتىك سالا جانە اگروونەركاسىپتىك كەشەن ماماندارى سەكىلدى قاجەتتى رەسۋرسپەن كۇشەيتۋ ماقساتىن كوزدەيدى.
جوبا ىسكە اسىرىلعان كۇننەن باستاپ، 60 مىڭنان استام مامان 7,4 ميلليارد تەڭگە سوماسىنداعى كوتەرمە جاردەماقىعا يە بولدى. 27,5 مىڭنان اسا مامان تۇرعىن ءۇي الۋ ءۇشىن 70,6 ميلليارد تەڭگە سوماسىندا بيۋجەتتىك كرەديت الدى.
«2019-جىلعى 1- جەلتوقسانداعى جاعداي بويىنشا، 4128 مامانعا تۇرعىن ءۇي الۋ ءۇشىن جالپى سوماسى 14,7 ميلليارد تەڭگە بيۋجەتتىك كرەديت بەرىلدى. ال 7565 مامانعا جالپى سوماسى 1,5 ميلليارد تەڭگە كوتەرمە جاردەماقى بەرىلگەن. ماماندىقتارعا كەلسەك، ءبىلىم بەرۋ سالاسى كوپ سۇرانىسقا يە، وعان 42745 ادام (71,2 پايىز) تارتىلعان. ەكىنشى ورىندا - دەنساۋلىق ساقتاۋ سالاسى. ونى 12705 ادام (21,2 پايىز) تاڭداعان. ودان ءارى اگروونەركاسىپتىك كەشەن ماماندىعىندا 1665 ادام (2,8 پايىز) جانە مادەني سالادا 1604 (2,7 پايىز) ادام بار. سۇرانىس بويىنشا سوڭعى ورىنداعى سپورت سالاسىنا 863 (1,4 پايىز) ادام جانە الەۋمەتتىك قامسىزداندىرۋ سالاسىنا 483 (0,8 پايىز) ادام بارعان. بۇگىنگى كۇنى جالپى قاتىسۋشىنىڭ 74 پايىزى - ايەلدەر» - دەلىنگەن حابارلامادا.
جالپى باعدارلاما مامانداردىڭ اۋىلدىق ەلدى مەكەندەرگە كوپتەپ كەلۋىنە جول اشتى. جوبا ىسكە اسىرىلعانعا دەيىن جىل سايىن اۋىلدارعا 3300 دەي مامان كەلسە، جوبا ىسكە قوسىلعان ۋاقىتتان باستاپ، بۇل كورسەتكىش جىل سايىن 6000 مامانعا ارتقان.