ۇ ب ت تاپسىرۋ باسقاشا فورماتقا كوشىرىلەدى
بۇل تۋرالى بۇگىن ۇكىمەت وتىرىسىندا ق ر ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«جاس مامان» جوباسى بويىنشا 180 كوللەدجدىڭ ماتەريالدىق- تەحنيكالىق بازاسى جاڭارتىلادى. ول ءۇشىن بيۋدجەتتەن 58 ميلليارد تەڭگە قاراستىرىلدى. تەگىن كاسىبي تەحنيكالىق ءبىلىم باعدارلاماسىمەن جىل سايىن 100 مىڭ ستۋدەنتتى قامتيتىن بولامىز. ال دۋالدى وقۋمەن قامتىلعان ستۋدەنتتەردىڭ سانى 35 پايىزعا جەتەدى. كوللەدج ستۋدەنتتەرىن جۇمىسقا ورنالاستىرۋ كورسەتكىشى 60-تان 75 پايىزعا دەيىن جەتەتىن بولادى. جوعارى ءبىلىم باعدارلامالارىن كاسىبي ستاندارتتارعا نەگىزدەپ، 100 پايىز جاڭارتۋ مىندەتى تۇر. شەتەل ستۋدەنتتەرىنىڭ سانى جالپى كونتيگەنتتىڭ 10 پايىزىن قۇرايتىن بولادى. ءبىلىم گرانتتارىن ورتاشا العاندا 340-420 مىڭنان 900 مىڭ تەڭگەگە دەيىن ءوسىرۋ ارقىلى پروفەسسورلىق- وقىتۋشىلىق قۇرامنىڭ ەڭبەكاقىسىن كوتەرۋ، ۋنيۆەرسيتەتتەردىڭ ماتەريالدىق بازاسىن جاقسارتۋ قاراستىرىلىپ وتىر. بۇل كوپتەن كۇتكەن جاڭالىق. شىنى كەرەك 2011 -جىلدان باستاپ گرانت قۇنى جالپى وزگەرمەگەن. وسىعان بيۋدجەتتەن 244 ميلليون تەڭگە قاراستىرىلدى»، - دەدى 2025 -جىلعا دەيىن قازاقستاندا ءبىلىم مەن عىلىمدى دامىتۋدىڭ مەملەكەتتىك باعدارلاماسىن تانىستىرعان اسحات ايماعامبەتوۆ.
ونىڭ ايتۋىنشا، 10 ۋنيۆەرسيتەتتە اكادەميالىق باسىمدىق ورتالىقتارىن قۇرۋ ءۇشىن 21 ميلليارد تەڭگە ءبولىنىپ، 10 ۋنيۆەرسيتەت الەمنىڭ ۇزدىك 500 ۋنيۆەرسيتەتىنىڭ قاتارىنا كىرەتىن بولادى.
«بۇعان قوسا ۇبت تاپسىرۋ ەلەكتروندى فورماتقا كوشىرىلەدى. گرانتتاردىڭ بىرنەشە ءتۇرى ەنگىزىلىپ، جوعارى وقۋ ورنىنىڭ قولجەتىمدىلىگى، اشىقتىعى قامتاماسىز ەتىلدى. سونىمەن قاتار 2025 -جىلعا دەيىن 90 مىڭ ورىنعا ارنالعان جاتاقحانا الىنادى. پەداگوگيكا ماماندارىن دايىندايتىن ۋنيۆەرسيتەتتەر سانى بۇگىنگى كۇنى - 85. وسى ۋنيۆەرسيتەتتەر بويىنشا ءبىز قوسىمشا تالاپ قويىپ، ونىڭ سانىن الدەقايدا ازايتىپ، ماتەريالدىق بازاسىن نىعايتامىز. بىزگە پەداگوگتەردى دايىنداۋ وتە ماڭىزدى ماسەلە»، - دەدى مينيستر.
اۆتور: مارلان جيەمباي