مۇزداي قارۋلانىپ، «استانا بىزدىكى» دەپ ۆيدەوعا تۇسكەن جىگىت سوتقا تارتىلىپ جاتىر

نۇر-سۇلتان. قازاقپارات - ەلوردادا مۇزداي قارۋلانىپ، «استانا بىزدىكى» دەپ ۆيدەوعا تۇسكەن جاس جىگىتتىڭ سوتى باستالدى، دەپ حابارلايدى قازاقپارات ءتىلشىسى.

«سوتتا ايىپتالۋشىنىڭ جازاسىن اۋىستىرۋ تۋرالى ماتەريال قارالۋدا. ول بۇرىن سوتتى بولعان. كەيىن قىلمىستىق زاڭنامانى ىزگىلەندىرۋگە بايلانىستى بوساپ شىققان. ياعني، جازاسىنىڭ وتەلمەگەن بولىگى شارتتى جازاعا اۋىستىرىلعان. سوت تاراپىنان وعان تۇزەلۋگە مۇمكىندىك بەرىلگەن. سوعان قاراماستان، ول بوستاندىقتا ءجۇرىپ، قىلمىسقا جول بەرىپ وتىر (قارۋ ۇستاپ تارالعان ۆيدەو - اۆت.)»، - دەپ حابارلادى قازاقپارات تىلشىسىنە نۇر-سۇلتان قالاسى بايقوڭىر اۋداندىق 2№ سوتىنىڭ باسپا ءسوز قىزمەتىنەن.

اۋداندىق سوتتىڭ مالىمەتىنشە، سوڭعى جاسالعان زاڭبۇزۋشىلىق بويىنشا قىلمىستىق ءىس قوزعالىپ، تەرگەۋ امالدارى ءجۇرىپ جاتىر.

«بۇگىنگى سوتتا قارالىپ جاتقان ماسەلە - ونىڭ وتەلمەگەن جازاسىنىڭ بولىگىن مەيلىنشە قاتاڭ جازاعا اۋىستىرۋ. سوتتا وسىنداي ءوتىنىش قارالۋدا. ال ۆيدەوعا قاتىستى ءىس ماتەريالدارى سوتقا ءالى كەلىپ تۇسكەن جوق»، - دەپ حابارلادى سوتتان.

ەسكە سالا كەتسەك، ەلوردا ساقشىلارى «باقايشاعىنا دەيىن قارۋلانعان» جىگىتتىڭ كىم ەكەنىن انىقتاپ، كوپ وتپەي ۇستاعان بولاتىن.

ونىڭ الدىندا «استانا-سەرگەك» Instagram پاراقشاسىندا جاس جىگىتتىڭ قارۋ ۇستاپ، «استانا بىزدىكى» دەگەن ۆيدەوسى تارادى. ۆيدەودا جاس جىگىت بىرنەشە قارۋدى ۇستاپ، بىلاپىت سوزدەر ايتادى.