الەمدەگى ەڭ ءبىرتۇرلى ماماندىقتار

نۇر-سۇلتان. قازاقپارات – مەديتسينا سالاسىندا ماماندىقتاردىڭ ءتۇر-ءتۇرى بار.

اۋرۋعا قاراي دارىگەردىڭ ماماندانۋى دا وزگەرە بەرەتىنى تۇسىنىكتى عوي.

الايدا، ەل ەستىمەگەن دە ماماندىقتار بار ەكەن. ولاردىڭ ءبىرسىپىراسىنا شولۋ جاساپ، اتقاراتىن مىندەتتەرى نەدە ەكەنىنە ءۇڭىلىپ كورەيىك.

اس اروماتيزاتورلارى جونىندەگى مامان

«مۇنداي ماماندىق يەسى مەديتسينادا نە ىستەپ ءجۇر؟ ول تاماق ونەركاسىبىندە جۇمىس ىستەۋى ءتيىس قوي» دەرسىز. ءتۇسىندىرىپ بەرەيىك. ءتۇرلى كامپيتتەر، تاتتىلەر مەن ىشىمدىكتەردىڭ ءدامىن تاتىپ كورەتىندەردى دەگۋستاتور دەپ اتايدى. دەگۋستاتسيامەن شۇعىلدانىپ ءجۇرىپ دوكتورلىق اتاق الۋعا دا بولادى ەكەن. ءدام سەزگىش فارماتسيەۆتتەر - جاساندى اروماتيزاتورلاردى قاجەتتى باعىتتا وزگەرتەتىن عىلىمي قىزمەتكەرلەر. مۇنداي ماماندارعا مەديتسينادا دا سۇرانىس بار، سەبەبى ءدامى اشى ءدارىنى قابىلداۋ كەيبىر ادامدارعا قيىندىق تۋعىزادى. سونداي-اق، تەرى، شاشتىڭ جاعدايىن جاقسارتۋعا ارنالعان ونىمدەردى شىعاراردا دا وسىنداي مامانعا قاجەتتىلىك پايدا بولادى. سەبەبى ءونىم حوش ءيىستى بولسا - تۇتىنۋشىنى تارتادى، ال مۇڭكىگەن جاعىمسىز ءيىس پاتسيەنتتى باسقا ونىمگە كوشۋگە يتەرمەلەۋى ىقتيمال. امەريكادا اس اروماتيزاتورلارى جونىندەگى مامان اجەپتاۋىر جالاقى الادى - جىلىنا ورتا ەسەپپەن 54 مىڭ دوللار.

كوشپەلى ەكسفۋزيونيست

جۇرتتىڭ ءبىرازى ۆامپيردەن، ياعني قانىشەرلەردەن قورقاتىنى راس. تەك فيلمدەگى كەيىپكەرلەر بولسا دا، ۆامپير اتاۋلىسىن ەستىگەندە ادامداردىڭ كوبىندە قورقىنىش سەزىمى پايدا بولاتىنى جاسىرىن ەمەس. ەكسفۋزيونيستتىڭ دە جۇمىسى سول ءۆامپيردىڭ ارەكەتىنە ۇقساس - قان شىعارۋ. ولار ورگانداردى الماستىرۋ وپەراتسيالارىندا نەمەسە قاننىڭ ءوزىن قۇيۋ كەزىندە شاقىرتىلادى.

ادەتتە مۇنداي مامانداردىڭ تۇراقتى وتىراتىن جۇمىس ورنى بولمايدى، ولار شاقىرتۋمەن كەلەدى. ەكسفۋزيونيست جۇمىسىنىڭ ماڭىزدى بولىگى - قاننان، شپريتستەن قورقاتىن پاتسيەنتتەردىڭ كوڭىلىن جايلاپ، تىنىشتاندىرۋ. امەريكادا مۇنداي مامانداردىڭ جىلدىق تابىسى 40 مىڭ دوللاردى قۇرايدى.

پوليسومنوگرافيا تەحنولوگى

بۇل ماماننىڭ مىندەتى - ادامنىڭ ۇيىقتاعان جانە سەرگەك كەزدەگى جاعدايىن باقىلاۋ، جازبالار جۇرگىزىپ، مالىمەتتەردى تالداۋ. باسقاشا ايتقاندا، ۇيىقتاپ جاتقان ادامعا قاراپ وتىرعانى ءۇشىن اقشا الادى. ءبىراق، بۇل ماڭىزد ىجۇمىس. بۇل تەحنولوگتار پوليسومنوگرافيالىق قۇرىلعىلارمەن جۇمىس ىستەپ، ۇيىقىنىڭ ءبولىنۋ سەبەپتەرىن انىقتايدى. وسى ءادىس ارقىلى قورىلداپ ۇيىقتايتىن ادامدى ەمدەۋگە اتسالىسادى.

ەمىزۋشى

نەگىزى، ەمىزۋشىنىڭ قىزمەتى وتكەن عاسىرلاردا ەرەكشە سۇرانىسقا يە بولعان. بۇل ءۇردىس تەك 18-عاسىردا ۇلىبريتانيادا ەمىزۋ ارقىلى سيفيليس تاراعان سوڭ جويىلا باستادى. ايتكەنمەن، بۇگىنگى تاڭداعى 21-عاسىردا دا وسى كاسىپكە دەگەن سۇرانىس جوق ەمەس. الەمنىڭ كوپتەگەن پەرزەنتحانالارىندا ءسۇتى شىقپاي قالعان جاس انالار نارەستەسىنە جاساندى تاماقتان گورى تابيعي ءسۇت بەرگەندى قالايدى. بالا ەمىزۋ دە بيزنەسكە اينالعان زامان- اي!

تاجىريبە جۇرگىزىلەتىن ادام

يا، بۇل دا ءوز الدىنا جەكە كاسىپ. ول ءۇشىن ارنايى مەديتسينالىق ماماندىق الۋدىڭ قاجەتى جوق. كەز كەلگەن ادام مەديتسينالىق تاجىريبەلەرگە قاتىسا الادى. سول ءۇشىن وعان اقشا تولەنەدى. مەديتسيناعا دا مۇنداي ازاماتتار كەرەك. باستىسى - دەنى ساۋ، ءتۇرلى سىناقتارعا قاتىسۋعا دايىن ادام بولسا بولعانى. ارينە، تاجىريبەنىڭ نەمەن تىنارىن قاتىسۋشى دا، دارىگەرلەر دە كوپ رەتتە بىلمەيدى. دەنساۋلىعىنا جاعۋى دا، جاقپاۋى دا مۇمكىن.

جىلان ساۋىنشىسى

ساۋىنشى - بۇرىننان كەلە جاتقان ماماندىق. ءبىراق، سيىر ساۋعاندى بىلەمىز دە، جىلان ساۋىنشىسى تۋرالى ەستۋىڭىز بار ما؟ سيىردان ءسۇت ساۋسا، جىلاننان ۋ الىنادى. ەكىنىڭ ءبىرىنىڭ قولىنان كەلە بەرمەيتىن ءىس ەكەنىن مويىندايىق. مۇنداي كاسىپ يەلەرى زەرتحانالاردا جۇمىس ىستەيدى. ولار ءتۇرلى فارماتسيەۆتيكالىق كومپانيالار ءۇشىن ءدارى-دارمەكتىڭ جاڭا تۇرلەرىن شىعارۋعا تالپىنادى. ماسەلەن، قاننىڭ ۇيۋىن تەزدەتەتىن جانە گيپەرتونياعا قارسى توسقاۋىل بولاتىن جاڭا دارىلىك پرەپاراتتار جىلان ساۋىنشىلارىنىڭ كومەگىمە جاسالدى. ميكروسكوپيالىق دوزاداعى ۋدىڭ پايدالى ەكەنى انىقتالعان. جالپى، جىلاندى ساۋعان وڭاي ەمەس. اسىرەسە، بۇل ءقاۋىپتى جىرتقىشتىڭ اۋزىن اشۋدىڭ ءوزى قيىن تىرلىك. بۇدان كەيىن ونىڭ ۋلى تىستەرىن ارنايى ىدىسقا شانشۋ كەرەك. قالاي بولعاندا دا، الىپ وتىرعان جالاقىسىن اقتايتىن ءىس.

كاسىبي يىسكەۋشى

ادامدارعا قاراعاندا، جانۋارلاردىڭ يىسكەۋ قابىلەتى اناعۇرلىم مىقتى ەكەنى بەلگىلى. ءبىراق، جانۋار نەنى سەزىپ، نەنى سەزبەي تۇرعانىن، بولماسا ءيىستىڭ جاعىمدى نە جاعىمسىز ەكەنىن تولىققاندى سيپاتتاپ بەرە المايدى عوي. سوندىقتان، مەديكتەر كاسىبي يىسكەۋشىلەردىڭ قىزمەتىنە ءجيى جۇگىنەدى. بۇل جۇمىستى تاعى «نازالدىق ونەر» دەپ تە اتايدى. بۇل كاسىپتىڭ ەڭ تانىمال وكىلى - امەريكاندىق دجوردج ولجريچ. ول ا ق ش-تىڭ عارىش اگەنتتىگى - NASA- دا 30 -جىلدان بەرى جۇمىس ىستەيدى. وسى ۋاقىت ىشىندە ول 770 عارىشتىق ميسسيانى يىسكەپ «شىعارىپ سالعان».

اسپانعا شاتل راكەتالارىنىڭ ءارقايسىسىن جىبەرەردەن بۇرىن ولدريچ كەمەنىڭ ىشىنە، ونداعى بارلىق زاتتاردى قۇشىرلانا يىسكەي باستايدى. ونىڭ ءمانىسى مىنادا: عارىشتا كەمەنىڭ تەرەزەسىن اشىپ، ءىشىن جەلدەتۋگە مۇمكىندىك بولمايدى. سوندىقتان، عارىشكەرلەردىڭ جۇمىسىنا جاعىمسىز يىسپەن كەدەرگى كەلتىرەتىن زاتتىڭ بار-جوعىن الدىن- الا انىقتاۋ قاجەت. ءولدريچتىڭ ميسسياسى وسى. ونىڭ ايتۋىنشا، عارىشتا زاتتاردىڭ ءيىسى وزگەرەدى. «جاعىمسىز ءيىس عارىشكەردىڭ ناۋقاستانۋىنا سەبەپ بولۋى مۇمكىن. بۇل جايلى ورىستاردان سۇراڭدار. ولار مۇڭكىگەن ءيىستىڭ كەسىرىنەن 1976 -جىلى عارىشتىق ميسسياسىن توقتاتۋعا ءماجبۇر بولعان»، دەيدى NASA- نىڭ باس يىسكەۋشىسى.

جىلقى ستوماتولوگى

ستوماتولوگتىڭ كابينەتىنە جىلقىنىڭ كەلۋىن ەلەستەتىپ كورىڭىزشى. كۇلكىلى بولىپ كورىنگەنىمەن، اتتىڭ ءتىسىن ەمدەيتىن دارىگەرلەر دە بار ەكەن. بۇل ماماندار اتقورالاردى ارالاپ، جىلقى تىستەرىنىڭ ساۋ بولۋىن قاداعالايدى. ادامدى ەمدەگەن سياقتى ول دا جىلقىلاردىڭ ءتىسىن تازالايدى، قۇرتتاعان تىستەرىن جۇلادى. بۇل كاسىپتى مەڭگەرۋ ءۇشىن ۆەتەرينارلىق- ستوماتولوگيالىق دايىندىقتان ءوتۋ قاجەت.