+7 (701) 759 90 19
USD 436.29 EUR 492.83
RUB 5.92 CNY 68.48
جاڭالىقتار

پاۆلوداردا قىتايلىق كومپانيامەن بىرلەسىپ تراكتور قۇراستىرىلادى

18 جەلتوقسان 11:56
:ءبولىسۋ
پاۆلوداردا قىتايلىق كومپانيامەن بىرلەسىپ تراكتور قۇراستىرىلادى

پاۆلودار. قازاقپارات - «KSW Agrotech» ج ش س قىتايلىق سەرىكتەسى - «Wan E» كومپانياسىمەن بىرلەسىپ اۋىل شارۋاشىلىعى تەحنيكاسىن قۇراستىرۋدى قولعا الماق، دەپ حابارلايدى قازاقپارات پاۆلودار وبلىسى اكىمىنىڭ باسپا ءسوز قىزمەتىنە سىلتەمە جاساپ.

پاۆلودارداعى «ينۆەستورلار ۇيىندە» كەلىسىمشارتقا قول قويۋ راسىمىنە پاۆلودار وبلىسى اكىمىنىڭ ورىنباسارى ارىستان قابىكەنوۆ قاتىستى. تراكتور پاۆلوداردىڭ بۇرىنعى اۆتوبازاسىندا قۇراستىرىلادى. تاياۋدا كاسىپورىنعا قىتايدان قۇراستىرۋ جەلىسى جەتكىزىلەدى. قۋاتتىلىعى 300 اتتىڭ كۇشىنە تەڭ كەلەتىن تەحنيكانىڭ العاشقى لەگىن 2020-جىلدىڭ كۇزگى جيىن-تەرىم جۇمىستارىنا دەيىن كوپشىلىككە تانىستىرۋ جوسپارلانعان.

«بۇل جوبانى ءۇش كەزەڭگە ءبولىپ، جۇزەگە اسىرۋدى جوسپارلاپ وتىرمىز. قازىرگى بازانىڭ قولدانىستاعى ينفراقۇرىلىمىن پايدالانا وتىرىپ، جىلىنا 3000 تراكتور قۇراستىرۋ قولعا الىنادى. جاڭادان 50 جۇمىس ورنى قۇرىلادى. ەگەر ءبارى جوسپار بويىنشا جۇرەتىن بولسا، 2021-جىلى «پاۆلودار» ارنايى ەكونوميكالىق ايماعىنىڭ اۋماعىنان الدەقايدا ۇلكەن كاسىپورىن سالۋدى باستايمىز. تيىسىنشە، 150 جۇمىس ورنى اشىلاتىن بولادى. بۇل كاسىپورىننىڭ قۋاتتىلىعى جىلىنا 30 مىڭ تەحنيكا قۇراستىرۋعا دەيىن جەتپەك. بولاشاقتا اتالعان ءوندىرىستى پاۆلودار وبلىسىندا ءبىرجولا دامىتىپ، مەتال بۇيىمدارى مەن اۋىل شارۋاشىلىعى تەحنيكالارىنا ارنالعان بولشەكتەردى شىعارماقپىز»، - دەيدى «KSW Agrotech» ج ش س باس ديرەكتورى رۇستەم يبراگيموۆ.

ينۆەستورلاردىڭ سوزىنشە، ولاردىڭ تراكتورلارى تەك قازاقستاندا عانا ەمەس، جاقىن شەت مەملەكەتتەردە دە سۇرانىسقا يە بولۋى كەرەك. ولاردىڭ باستى ارتىقشىلىعى - باعاسىندا. پاۆلودارلىق تراكتوردىڭ قۇنى شامامەن 130-150 مىڭ دوللار بولادى. ال ءدال وسىنداي امەريكالىق، ەۋروپالىق تەحنيكالار 500-700 مىڭ دوللار تۇرادى. ونىڭ ۇستىنە كاسىپورىن ءوز تراكتورلارىن ليزينگكە بەرۋگە جانە اۋىل شارۋاشىلىعى ونىمدەرىنە ايىرباستاۋعا ءازىر.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر

مۇراعات