قازاقستاندىق جاس ءانشىنىڭ جاڭا بەينەبايانى جارىق كوردى

الماتى. قازاقپارات - قازاقستاندىق جاس ءانشى دانەليا تولەشوۆانىڭ تىڭدارمان كوپتەن كۇتكەن كليپى جەلىدە جاريالاندى، دەپ حابارلايدى قازاقپارات.

ءانشىنىڭ PR- ديرەكتورى تاتيانا سينەنكو بەينەباياننىڭ شاكەن ايمانوۆ اتىنداعى كينوستۋديادا تۇسىرىلگەنىن جانە ونىڭ قازان ايىندا دايىن بولعانىن ءمالىم ەتتى. الايدا ءانشى مەن ونىڭ رەجيسسەرلىك توبى كليپتى جاريالاۋدى كەشىكتىرە تۇرعاندى ءجون كورگەن.

«ءبىز كەستەدەن ءسال ارتتا قالىپ، كليپتى جاريالاۋدى كەشىكتىرىپ الدىق. سەبەبى، ونى ەرەكشە قىلىپ شىعارعىمىز كەلدى. ءتۇسىرۋ توبىن تاڭداۋدا جولىمىز بولدى، ولار ءوز ءىسىنىڭ تاجىريبەلى ماماندارى ەكەن. ءار تۇستى مۇقيات قاراپ شىقتى: جارىقتىڭ دۇرىس ءتۇسۋى، دىبىس، جارىق كوررەكتسياسى. مەن جۇمىسقا ريزامىن، كورەرمەنگە دە ۇنايدى دەپ سەنەمىن»، - دەدى دانەليا تولەشوۆا.

«Don’t Cha» - بۇل جاس ءانشىنىڭ العاشقى اۆتورلىق ءانى.

كليپ دانەليا تولەشوۆانىڭ Youtube كانالىندا جاريالاندى.