ۇلان-باتىردا قازاقستاننىڭ تاۋەلسىزدىك كۇنى تويلاندى
سالتاناتتى ءىس- شاراعا موڭعوليا ۇكىمەتىنىڭ مۇشەلەرى، پارلامەنت دەپۋتاتتارى، ۇلان-باتىردا اككرەديتتەلگەن شەتەل ديپلوماتيالىق وكىلدىكتەرى مەن حالىقارالىق ۇيىمداردىڭ باسشىلارى، كورنەكتى قوعامدىق قايراتكەرلەر، عىلىم مەن مادەنيەت قايراتكەرلەرى، سونداي-اق قازاق دياسپوراسىنىڭ جانە جەرگىلىكتى ب ا ق وكىلدەرى قاتىستى.
«شارانى اشقان ەلشى جالعاس ادىلبايەۆ قازاقستاننىڭ تاۋەلسىزدىك جىلدارىندا قول جەتكىزگەن جەتىستىكتەرى مەن ونىڭ باي مۇراسى جونىندە باياندادى. ەلشى سونداي-اق، قازاقستان ءوزىنىڭ كوپجاقتى جانە بەيبىت سىرتقى ساياساتىمەن، ساياسي تۇراقتىلىعىمەن، حالىقتار دوستىعىمەن جانە قارقىندى دامىپ جاتقان ەكونوميكاسىمەن الەمگە ايگىلى ەكەنىن اتاپ ءوتتى» دەلىنگەن حابارلامادا.
جالعاس ادىلبايەۆ ەكىجاقتى ىنتىماقتاستىقتىڭ دامۋىنا جاڭا سەرپىلىس بەرگەن موڭعوليانىڭ پرەمەر-ءمينيسترى ۋ. حۇرەلسۇحتىڭ قازاقستانعا رەسمي ساپارىن ەرەكشە اتاپ ءوتتى.
باس قوناق رەتىندە قاتىسقان موڭعوليانىڭ سىرتقى قاتىناستار ءمينيسترى د. تسوگتبااتار ءوز سوزىندە قازاقستاندىق-موڭعول قاتىناستارىنىڭ دامۋىنا جانە قازاقستاننىڭ حالىقارالىق ساحناداعى تىڭ باستامالارىنىڭ جۇزەگە اسىرىلۋىن جوعارى باعالادى. ءسوز سوڭىندا موڭعوليانىڭ سىرتقى ساياسات ۆەدومستۆوسىنىڭ باسشىسى ەكى مەملەكەتتىڭ اراسىنداعى قاتىناستاردىڭ ودان ءارى جان-جاقتى دامۋىنا سەنىم ءبىلدىردى.
مەيمانداردىڭ نازارىنا قازاقستان تۋرالى بەينەفيلم مەن فوتوكورمە، سونداي-اق قازاق دياسپوراسىنىڭ وكىلدەرى ورىنداۋىندا ۇلتتىق اۋەندەر ۇسىنىلدى.