قازاقستاننىڭ ەڭ العاشقى وليمپيادا التىنى وسلوداعى كورمەگە قويىلدى

وسلو. قازاقپارات - قازاقستاننىڭ وليمپيادادا جەڭىپ العان العاشقى التىنى وسلوداعى كورمەگە قويىلدى، دەپ حابارلايدى قازاقپارات نورۆەگياداعى قازاقستان ەلشىلىگىنە سىلتەمە جاساپ.

اتى اڭىزعا اينالعان ءۇش سپورتشى - ستەن ستەنسەن، ۆەگارد ۋلۆانگ جانە ۆلاديمير سميرنوۆ وسلوداعى حولمەنكوللەن تاۋ شاڭعىسى مۇراجايىندا «قازاقستان- نورۆەگيا: سپورت ديپلوماتياسى» اتتى كورمەنىڭ اشىلۋىنا قاتىستى.

1970-جىلدارى «مەدەۋ» مۇز ايدىنىندا بىرنەشە الەمدىك رەكورد قويعان نورۆەگيالىق كونكيشى ستەن ستەنسەن «مەنىڭ سپورت مانسابىمدا مەدەۋ مەن الماتىنىڭ ورنى ەرەكشە» دەپ اتاپ ءوتتى.

وليمپيادا ويىندارىندا الىس قاشىقتىقتا شاڭعى تەبۋدەن باقتالاستار - ۆەگارد ۋلۆانگ (نورۆەگيا) پەن ۆلاديمير سميرنوۆ (قازاقستان) سپورت، دوستىق جانە مادەنيەتارالىق بايلانىسقا قاتىستى پىكىر ءبىلدىردى.

«سپورتشى رەتىندە باستان كەشىرگەن كوپتەگەن اۋىر جارىستار مەن باسەكەگە قاراماستان، دوستىعىمىز ودان ءارى نىعايا تۇسۋدە»، - دەدى ۆ. ۋلۆانگ.

نورۆەگيادا «سميررە» دەگەن لاقاپ اتپەن بەلگىلى ۆلاديمير سميرنوۆ:

«مەن سپورتقا ارنالعان وسىناۋ كورمەگە قاتىسقانىما قۋانىشتىمىن. قازىرگى جاستاردىڭ كوپشىلىگى قازاقستان تۋرالى كوپ بىلە بەرمەگەندىكتەن، وسىنداي شارالار بۇل ەلمەن جانە ونىڭ مادەنيەتىمەن تانىسۋعا زور مۇمكىندىك بەرەدى»، - دەپ اتاپ ءوتتى.

16- جەلتوقساندا قازاقستان ءوز تاۋەلسىزدىگىنىڭ 28 جىلدىعىن اتاپ وتەدى، ال ۆلاديمير سميرنوۆ - تاۋەلسىز قازاقستاننىڭ تۇڭعىش وليمپيادا چەمپيونى. سوندىقتان دا «سميررەنىڭ» سەنبىدەگى حولمەنكوللەندەگى كورمەگە 1994-جىلى ليللەحاممەر ويىندارىندا جەڭىپ العان التىن مەدالىن اكەلۋى ۇلكەن سيمۆولدىق مانگە يە بولدى.

اتالمىش كورمە قازاقستاننىڭ نورۆەگياداعى ەلشىلىگى، قازاقستاننىڭ سپورت باسپا ءسوز اسسوتسياتسياسى جانە وسلوداعى حولمەنكوللەن تاۋ شاڭعىسى مۇراجايىنىڭ ۇيىمداستىرۋىمەن جانە قازاقستان رەسپۋبليكاسى تۇڭعىش پرەزيدەنتى - ەلباسى قورى، ق ر سىرتقى ىستەر مينيسترلىگى جانە «QazSport» ۇلتتىق سپورت ارناسىنىڭ قولداۋىمەن ءوتتى. ەكسپوزيتسيانى كورەرمەندەر 28- جەلتوقسانعا دەيىن ەكى اپتا بويى تاماشالاي الادى.

قازاقستان ەلشىسى ەركىن احىنجانوۆتىڭ ايتۋىنشا، «قازاقستان مەن نورۆەگيا اراسىنداعى سپورت بايلانىسى ءداستۇرلى ديپلوماتيا شەڭبەرىنەن اسىپ تۇسۋدە. بۇل قارىم-قاتىناس ەكى ەل اراسىندا ديپلوماتيالىق ىنتىماقتاستىق ورناعانعا دەيىن كوپ ۋاقىت بۇرىن باستالعان».

فوتوكورمە قازاقستان مەن نورۆەگيا سپورتشىلارىنىڭ جەتىستىكتەرى، قوس ەل سپورتشىلارىنىڭ جارىستارعا بىرگە قاتىسۋى تۋرالى باياندايدى. كورمەدە حوككەي، دوپتى حوككەي، فۋتبول جانە كۇرەس بويىنشا قازاقستان مەن نورۆەگيا قۇرامالارىنىڭ اراسىنداعى ەكىجاقتى ماتچتاردىڭ فوتوسۋرەتتەرى، سونىمەن قاتار قازاقستاندىق سپورتشىلاردىڭ نورۆەگياداعى جانە نورۆەگيالىق سپورتشىلاردىڭ قازاقستانداعى ويىندارى ۇسىنىلعان.

سپورت كيىمدەرى سىيلىق رەتىندە - ساياساتكەرلەرگە، ال ۇلتتىق كيىمدەر - كورنەكتى سپورتشىلارعا بەرىلەتىن «دجەرسي - ديپلوماتيا» جانە «شاپان - ديپلوماتيا» سەكىلدى سپورت ديپلوماتياسىنىڭ بىرنەشە ەرەكشە ۇلگىسى ۇسىنىلعان.

سونىمەن قاتار، كورمەدە حوككەي («بارىس»، «تورپەدو» جانە «سارى- ارقا»)، ۆەلوسيپەد («استانا»)، جەڭىل اتلەتيكا («التاي اتلەتيكس» كلۋبى) جانە فۋتبول («قايرات» پەن «استانا») سەكىلدى سپورت تۇرلەرىنەن قازاقستاندىق كاسىبي كلۋبتارىنىڭ اتريبۋتيكا جيناقتاماسى دا بار.