قازاقستاننىڭ باستاماسىمەن بۇكىل الەمدىك شاحمات كۇنى بەلگىلەندى

نۇر-سۇلتان. قازاقپارات - بىرىككەن ۇلتتار ۇيىمىنىڭ باس اسسامبلەياسى 20- شىلدەنى بۇكىل الەمدىك شاحمات كۇنى دەپ جاريالادى، دەپ حابارلايدى قازاقپارات ب ۇ ۇ جاڭالىقتارى سايتىنا سىلتەمە جاساپ.

بۇل شەشىمگە قازاقستان، ارمەنيا، بەلارۋس، قىرعىزستان، رەسەي، تاجىكستان، تۇرىكمەنستان جانە وزبەكستان سەكىلدى ءبىرقاتار ەلدەردىڭ باستاماسى تۇرتكى بولدى.

شاحمات - ەڭ ەجەلگى ينتەللەكتۋالدى جانە مادەني ويىنداردىڭ ءبىرى سانالادى. وندا سپورت، عىلىمي وي جانە مادەنيەت ەلەمەنتتەرى ۇشتاسقان. وسىنى ەسكەرگەن ب ۇ ۇ باس اسسامبلەياسىنىڭ مۇشەلەرى بۇكىل الەم ەلدەرىنە الەمدىك شاحمات كۇنىن «ءتيىستى دەڭگەيدە» اتاپ ءوتۋدى ۇسىندى.

ب ۇ ۇ باس اسسامبلەياسى جاڭا رەزوليۋتسياسىنىڭ اۆتورلارى بۇكىل الەم شاحمات وينايتىنىن ەرەكشە اتاپ ءوتتى. ول ادىلدىكتى، ينتەگراتسيا مەن ءوزارا سىيلاستىقتى كوككە كوتەرەدى، حالىقتار مەن مەملەكەتتەر اراسىنداعى توزىمدىلىك پەن ءوزارا تۇسىنىستىك اتموسفەراسىنىڭ قالىپتاسۋىنا ىقپال ەتەدى.