تاۋەلسىزدىك كۇنىن كىم قالاي قارسى الادى؟
«قازاقپارات» حالىقارالىق اقپارات اگەنتتىگىنىڭ ءتىلشىسى ءارتۇرلى سالاداعى قوعام بەلسەندىلەرىنەن بۇل كۇندى قالاي اتاپ وتەتىنىن سۇرادى.
قۋانىش سۇلتانوۆ، پارلامەنت ءماجىلىسىنىڭ دەپۋتاتى:
- تاۋەلسىزدىك كۇنى - ءبىزدىڭ وتباسى ءۇشىن ەڭ قاسيەتتى، ەڭ ۇلكەن مەرەكە. بۇل كۇنى تاڭەرتەڭ ويانعان نەمەرەلەرىم ماعان ءانۇران ايتىپ بەرەدى. وسىلايشا مەرەكەلىك كوڭىل-كۇي سىيلاپ، وزدەرى دە بۇل مەرەكەنىڭ ماڭىزىن تۇسىنەدى.
مەنىڭ ويىمشا، ءار ادام وسىلاي ىستەسە تاۋەلسىزدىك كۇنى وتباسىلىق مەرەكەگە اينالادى.
بەرىك ءابدىعالي ۇلى، ۇلىتاۋ اۋدانىنىڭ اكىمى:
- مەن بۇل كۇنى رەسمي ءىس-شارالارعا قاتىسامىن. وتباسى مۇشەلەرىن مەرەكەمەن قۇتتىقتايمىن، ءبىراق ۇلكەن داستارحان جايىپ وتىرامىز دەپ ايتا المايمىن.
تاۋەلسىزدىك كۇنى - مەملەكەتتىك دەڭگەيدەگى مەرەكە. ول تۋعان كۇن، مەرەيتوي، جاڭا جىل، ناۋرىز مەرەكەسى سياقتى وتباسىلىق مەرەكەگە اينالعان جوق. مەملەكەتتىك مەرەكەنىڭ دارەجەسى بولەك. مۇندا ەڭ باستىسى - مەملەكەتتىك قۇندىلىقتاردى ارداقتاۋ. ارينە، بۇل كۇندى ءبارى اتاپ ءوتىپ، ۇلىقتاۋ كەرەك، ءبىراق ءبارىبىر جاقىن ارادا وتباسىلىق مەرەكە بولا المايدى. «وتان - وتباسىنان باستالادى»، سوندىقتان بۇل مەرەكە وتباسىندا دا اتالىپ وتكەنى دۇرىس. دەگەنمەن، مەملەكەتتىك قۇندىلىقتارعا قىزىقپايتىن وتباسىلار، وكىنىشكە قاراي، ءالى كوپ .
راسۋل جۇما ۇلى، ساياساتكەر:
- تاۋەلسىزدىك كۇنى - قاتارداعى مەرەكە ەمەس. بۇل كۇن جاي عانا دەمالىس كۇنى ەمەس، ءار قازاق ماقتان تۇتاتىن، ماڭىزىن تۇسىنۋگە ۇمتىلاتىن كۇن. ءوز باسىم بۇل كۇنى بالالارىممەن بىرگە ورتالىق الاڭداعى تاۋەلسىزدىك مونۋمەنتىنە گۇل شوعىن قويىپ، ءىلتيپاتىمدى بىلدىرەمىن. بۇل - تاۋەلسىزدىك كۇنى قالاي كەلگەنىن ەسكە الىپ، باعالايتىن كۇن. سول كۇنى وتاندىق تەلەارنالاردان تاۋەلسىزدىك كۇنىنىڭ قۇرمەتىنە كورسەتىلەتىن دەرەكتى فيلمدەردى تاماشالايمىز.
بۇل كۇن - كەشەندى يدەولوگيامەن، ۇلتتىق سانا-سەزىمدى قالىپتاستىرۋمەن تىكەلەي بايلانىستاعى مەيرام، سول سەبەپتى مەكتەپ تابالدىرىعىنان باستاپ وسى كۇننىڭ ماڭىزىن كەڭ كولەمدە ناسيحاتتاۋىمىز كەرەك.
قاراقات ءابىلدينا، ءانشى:
- تاۋەلسىزدىك كۇنى وتباسىندا بولسىن، قاي جەردە بولسىن - كەڭ كولەمدە اتالىپ ءوتۋى كەرەك. ءوزىم بالالارىما بۇل كۇننىڭ وڭايلىقپەن كەلمەگەنىن، اتا-بابامىزدىڭ توگىلگەن قانى، كوز جاسىمەن كەلگەن قاستەرلى كۇن ەكەنىن ايتىپ وتىرام. بۇل - ءاربىر اتا-انانىڭ مىندەتى.
تاۋەلسىزدىك كۇنىنە وراي ءانشى رەتىندە رەپەرتۋارىمىزدى جاڭارتىپ، ەل- جەردى سۇيۋگە قاتىستى ءان جازامىز. ءانشى بولا تۇرا تاۋەلسىزدىك كۇنىن ۇلىقتاپ، وتانىڭنىڭ قاسيەتىن ءتۇسىنىپ، انگە قوسپاۋ مۇمكىن ەمەس.
مەنىڭ مەكتەبىم جاڭا جىلدى تويلامايدى. وقۋشىلاردىڭ پاتريوتتىق سەزىمىن وياتۋ ءۇشىن مەرەكە قارساڭىندا «تاۋەلسىز ەلدىڭ ۇرپاعىمىز» اتتى كونسەرت وتكىزىپ، تاۋەلسىزدىك كۇنىنە قاتىستى ءان ايتىپ، پوەزيا وقىپ، بالالار بار ونەرىن ورتاعا سالادى. تاۋەلسىزدىكتى ماقتانىشپەن جىرلاۋ كەرەك ەكەنىن جاس ۇرپاقتىڭ ساناسىنا سىڭىرسەك، وسىنىڭ ءبارى بالالاردىڭ جادىندا جاتتالىپ قالادى. بۇل - تاۋەلسىزدىك مەرەكەسىن اتاپ وتۋگە قوسقان مەنىڭ ۇلەسىم.