تۇركىستاندا مۇعالىمدى ۇستاپ اكەتكەن پوليتسەي قىزمەتىنەن شەتتەتىلدى
«13-جەلتوقسان كۇنى تۇركىستان قالاسىنداعى ورتا مەكتەپ مۇعالىمىن پوليتسيا بولىمىنە جەتكىزۋ فاكتىسى بويىنشا ىشكى ىستەر مينيسترى ەرلان تۇرعىمبايەۆتىڭ بۇيرىعىمەن قالالىق پوليتسيا ءبولىمىنىڭ باسشىلىعىنا قاتىستى قىزمەتتىك تەكسەرۋ ءجۇرىپ جاتىر. تەرگەۋ كەزىندە ىشكى ىستەر ورگاندارى قىزمەتكەرلەرىنىڭ مۇعالىمگە قاتىستى ءىس-ارەكەتىنىڭ قانشالىقتى زاڭدىلىعىنا باعا بەرىلەدى. سونداي-اق، تۇركىستان قالاسى ىشكى ىستەر باسقارماسى باستىعىنىڭ لاۋازىمىن اسىرا پايدالانۋ فاكتىسىنىڭ بار-جوعى انىقتالادى» دەلىنگەن حابارلامادا.
وبلىستىق پوليتسيا دەپارتامەنتى باسشىسىنىڭ بۇيرىعىمەن تۇركىستان قالالىق پوليتسيا باسقارماسى باستىعى دانيار مەيىرحان قىزمەتتىك تەكسەرۋ اياقتالعانعا دەيىن قىزمەتىنەن شەتتەتىلدى.
ەسكە سالا كەتەيىك، تۇركىستاندا ماعجان جۇمابايەۆ اتىنداعى №15-ورتا مەكتەپتىڭ مۇعالىمى باقىت كەۋكەنوۆ «اجەتحانا كۇزەتپەگەنى ءۇشىن» جازىقتى بولعان ەدى. 31 جىلدىق ءوتىلى بار ۇستازدى قالالىق ىشكى ىستەر ءبولىمىنىڭ باستىعى، پوليتسيا پودپولكوۆنيگى دانيار مەيىرحان باستاعان ءبىر توپ پوليتسەي ۇستاپ اكەتكەن. مەكتەپ ديرەكتورى ك. ءابدىقادىروۆانىڭ جازۋىنشا، مۇعالىم اياق كيىمىنەن سۋ وتكەن سوڭ سونى اۋىستىرۋ ءۇشىن مەكتەپ عيماراتىنا كىرگەن. الايدا پوليتسەيلەر قارسىلىق كورسەتكەنىنە قاراماستان ۇستازدىڭ قولىن قايىرىپ، بولىمشەگە اكەتىپ قالعان.
كەيىن بۇل جاعدايدى ەستىگەن ءبىلىم جانە عىلىم مينيسترى اسحات ايماعامبەتوۆ مۇعالىمگە اراشا ءتۇستى.
بۇگىن مەكتەپ مۇعالىمىن «اجەتحانا كۇزەتپەگەنى ءۇشىن» ۇستاپ اكەتكەن قالالىق پوليتسيا ءبولىمىنىڭ باستىعى دانيار مەيىرحان ۇستازدان كەشىرىم سۇرادى.
فوتو: Facebook