قيسايعان ءۇي سۇرىلەتىن بولسا، تۇرعىنداردىڭ جاعدايى نە بولماق - قالا اكىمىنىڭ جاۋابى
كەزدەسۋ بارىسىندا اكىم وسىنداعى 72 پاتەردىڭ تۇرعىندارىن كوشىرۋگە دايىن ەكەنىن جەتكىزگەن بولاتىن.
«شەشىم قابىلداندى. ءتيىستى قاۋلى شىعارىلىپ، قاراجات ءبولىنىپ جاتىر. باستاپقى كەزدە رۇقسات ەتسەڭىزدەر، سىزدەر ءۇشىن 72 پاتەر جالداپ بەرەمىز. «قاجەتى جوق، ءوزىمىز تابامىز» دەسەڭىزدەر، وندا پاتەر جالداعانىڭىز تۋرالى قۇجاتىڭىزدى كورسەتەسىز. ءبىز ونىڭ جالداۋ اقىسىن تولىقتاي تولەپ بەرەمىز. اقشا اۋدان اكىمدىگىنىڭ ەسەپشوتىنا تۇسەدى. ءبىرىنشى جۇمىس كۇنى – 18-جەلتوقسان. وعان دەيىنگى مەرەكە كۇندەرى سىزدەر اكىمدىككە اقشا اۋدارىلاتىن بانك كارتاسىنىڭ ءنومىرىن ۇسىنۋعا تيىسسىزدەر. بۇل شارۋانى نەعۇرلىم تەزىرەك تىندىرساق، سوعۇرلىم جاقسى»، - دەدى باقىتجان ساعىنتايەۆ.
اكىمنىڭ ايتۋىنشا، اتالمىش ءۇيدىڭ تاعدىرى ءتيىستى ساراپتامادان كەيىن بەلگىلى بولادى.
«ءبىر ايدان كەيىن ماماندار ءۇيدى قالپىنا كەلتىرۋگە بولادى دەسە، ءبىز ونى قالپىنا كەلتىرەمىز. بارلىق قىزمەتتەردى ىسكە قوسامىز. ال ەگەر ماماندار قورىتىندىسى ول ۇيدە تۇرۋعا بولمايتىنىن كورسەتسە، ءبىز ول نىساندى ءسۇرىپ تاستايمىز. بارلىق پاتەردىڭ يەلەرى اكىمدىك ەسەبىنەن جاڭا پاتەر الادى. كەلىسسەڭىزدەر، بۇل ىسكە بۇگىننەن باستاپ كىرىسەمىز»، - دەپ اتاپ ءوتتى شاھار باسشىسى.
ول، سونداي-اق، توناپ كەتپەس ءۇشىن ءۇيدى پوليتسەيلەر كۇزەتەتىنىن جەتكىزدى. ودان بولەك، باقىتجان ساعىنتايەۆ «زەردەلى» شاعىناۋدانىنداعى بارلىق ۇيلەر تەكسەرىلەتىنىن ايتىپ ءوتتى. ەگەر قانداي دا ءبىر اقاۋ تابىلسا، جاۋاپتى ادامدار جازالانادى.
ەسكە سالا كەتەيىك، 11-جەلتوقساندا الاتاۋ اۋدانىنداعى زەردەلى شاعىناۋدانىنىڭ تۇرعىندارى ءۇيىنىڭ قيسايعانىن ايتىپ، دابىل قاققان بولاتىن. ال قالالىق اكىمدىك ارنايى تەكسەرۋ ناتيجەسىندە تۇرعىنداردىڭ الاڭداۋىنا نەگىز جوق ەكەنىن ايتقان بولاتىن.