ەلوردادا ءۇش ارىسقا ەسكەرتكىش ورناتىلىپ، جازۋشىلار ءۇيى اشىلدى
نۇر-سۇلتان. قازاقپارات - ەلوردادا تاۋەلسىزدىك كۇنى مەرەكەسى قارساڭىندا قازاق ادەبيەتىنىڭ الىپتارى ساكەن سەيفۋللين، ءىلياس جانسۇگىروۆ جانە بەيىمبەت مايلينگە ەسكەرتكىش ورناتىلدى.
بۇل تۋرالى قالا اكىمى التاي كولگىنوۆ Facebook-تەگى پاراقشاسىندا ءمالىم ەتتى، دەپ حابارلايدى قازاقپارات.
ايتا كەتەيىك، بيىل ءۇش ارىستىڭ تۋعانىنا 125 جىل تولىپ وتىر.
«ۇلتىمىزدىڭ تار جول تايعاق كەشكەن جىلدارىن رومانىنىڭ اتاۋىمەن استارلاپ جەتكىزىپ، قازاق اتاۋىن قۇجات جۇزىندە قايتارعان ساكەن سەيفۋللين مۇراسىنىڭ ءبىزدىڭ رۋحانياتىمىزدا الاتىن ورنى ەرەكشە. بۇگىندە قالامىزدا مۋزەيى جۇمىس ىستەيدى. ەندى مىنە ەسكەرتكىشى اشىلىپ وتىر.
بەيىمبەت مايلين ءوزىنىڭ جازۋشىلىعىمەن قاتار، ەلدى ساۋاتتىلىققا ۇندەپ، العاشقى «قازاق» گازەتىنە، «ايقاپ» جۋرنالىنا جانە باسقا دا باسىلىمدارعا تۇراقتى ماسەلەلەردى جازعان جۋرناليستىگىمەن دە كوپ ەڭبەك ءسىڭىردى. دراماتۋرگتىعى ءبىر توبە. اڭگىمەلەرى ءالى كۇنگە دەيىن وزەكتىلىگىن جويماي، جاس ۇرپاقتى تاربيەلەۋ ماسەلەسىندە پايدالانىلىپ كەلەدى. ءىلياس جانسۇگىروۆ - قازاق فولكلورىن دامىتقان تۇلعا. «كۇيشى»، «قۇلاگەر» پوەمالارى - تۇنعان تاريح. «ۇلى دالانىڭ جەتى قىرى» اتتى ماقالاداعى كەلەلى ويلاردىڭ نەگىزىندە دۇنيەگە كەلگەن بۇل تۋىندىنى كوپتىڭ قۋانىشى دەپ بىلەمىن. بۇل ەسكەرتكىش وتكەنگە قۇرمەت قانا ەمەس، تاريحىمىزعا قويىلعان بىرەگەي بەلگى، بولاشاققا دەگەن كامىل سەنىم. ازات ەلدىڭ استاناسى - نۇر- سۇلتان قالاسىنىڭ تورىندە تاعدىرى دا ءبىر، ءومىرى دە ۇقساس ۇلتىمىزدىڭ ۇلى پەرزەنتتەرىنە ارنالعان ەسكەرتكىشتىڭ تۇرۋى - زاڭدىلىق. جاس ۇرپاققا ۇلگى- ونەگە بولادى دەگەن ۇمىتتەمىن»، - دەدى ا. كولگىنوۆ.
سونداي-اق قالادا جازۋشىلار ءۇيى اشىلدى.
اتالمىش شارالارعا جازۋشىلار وداعىنىڭ ءتوراعاسى ۇلىقبەك ەسداۋلەت، اقىن-جازۋشىلار مارفۋعا ايتقوجينا، انەس ساراي، نەسىپبەك ايت ۇلى، جازۋشىلار وداعى قالالىق فيليالىنىڭ ءتوراعاسى داۋلەتكەرەي كاپ ۇلى، سونداي-اق جاس قالامگەرلەر قاتىستى.