قاڭتاردان باستاپ كىرىسى تومەن ازاماتتارعا قارىز بەرۋگە تىيىم سالىنادى
بۇل جايىندا ءماجىلىس دەپۋتاتتارىنىڭ رەسمي ساۋالىنا وراي قر ۇلتتىق بانكى ءتوراعاسى ەربولات دوسايەۆتىڭ بەرگەن جاۋابىندا ايتىلعان، دەپ حابارلايدى قازاقپارات ءتىلشىسى.
ۇلتتىق بانك ءتوراعاسىنىڭ اتاپ وتۋىنشە، سوڭعى جىلدارى بايقالعان تۇتىنۋشىلىق كرەديتتەۋدىڭ قارقىندى ءوسۋى بۇگىنگى كۇنى باياۋلادى. تۇتىنۋشىلىق كرەديتتەۋدىڭ كەپىلسىز سەگمەنتىندەگى بەرەشەكتىڭ ءوسۋى 2017-2018 -جىلدارى جىلىنا سايكەسىنشە 31 جانە 28 پايىزدى قۇرادى. اعىمداعى جىلدىڭ 10 ايىندا كەپىلسىز تۇتىنۋشىلىق قارىز پورتفەلىنىڭ ءوسۋى نەبارى 8 پايىز بولدى. وسى كەزەڭ ىشىندە قازاقستاندىقتاردىڭ ورتاشا ايلىق جالاقىسى 16 پايىزعا ءوستى. بۇل كەپىلسىز قارىزدار بويىنشا بەرەشەكتىڭ وسۋىنەن ەكى ەسە كوپ. جەكە تۇلعالاردى كرەديتتەۋ نارىعىنىڭ شاماسى بويىنشا قازاقستان بورىش دەڭگەيى تومەن ەلدەردىڭ قاتارىنا جاتادى. تۇتىنۋشىلىق قارىزدار پورتفەلىنىڭ ج ءى ءو-گە قاتىناسى شامامەن 9,2 پايىزدى قۇرايدى. رەسەيدە بۇل كورسەتكىش 14,3، پولشادا – 30 عا جۋىق، گەرمانيادا – 40 تان استام، ا ق ش-تا - 85 پايىزدان استامعا تەڭ»، - دەدى ەربولات دوسايەۆ.
ۇلتتىق بانك ازاماتتاردىڭ شامادان تىس كرەديتتەلۋىنىڭ الدىن الۋ جانە تۇتىنۋشىلىق كرەديتتەۋدىڭ وڭتايلى ءوسۋ قارقىنىن قامتاماسىز ەتۋ ءۇشىن رەتتەۋ شارالارىن ىسكە اسىرۋدا ەكەن. «اعىمداعى جىلعى 3-شىلدەدە قازاقستان رەسپۋبليكاسىنىڭ پرەزيدەنتى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قارجى نارىعىن رەتتەۋ مەن دامىتۋ، ميكروقارجىلىق قىزمەت جانە سالىق سالۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى. ول 2020 -جىلعى 1-قاڭتاردان باستاپ حالىققا قارىز بەرەتىن بارلىق زاڭدى تۇلعالارعا قاتىستى رەتتەۋ مەن قاداعالاۋدى ەنگىزۋدى كوزدەيدى»، - دەپ ءتۇسىندىردى بانك باسشىسى.
ونىڭ ايتۋىنشا، بارلىق كرەديتتەۋ سۋبەكتىلەرى رەتتەلەتىن ءبىر ايادا جۇمىس ىستەيتىن جانە قارىز شارتتارىنىڭ تالاپتارىنا قويىلاتىن تالاپتار، شەكتى سىياقى مولشەرلەمەلەرى، كرەديتتىك بيۋروعا اقپارات بەرۋ، بورىشتىق جۇكتەمە كوەففيتسيەنتىنىڭ ساقتالۋى جانە باسقالارى سياقتى قارىز الۋشىلاردى قورعاۋ جونىندەگى تالاپتاردىڭ تولىق اياسىن ساقتايتىن بولادى.
«بۇل رەتتە 2020 -جىلعى 1-قاڭتاردان باستاپ قارىز الۋشىلاردىڭ بورىشتىق جۇكتەمەسىن ەسەپتەۋ تاسىلدەرى وزگەرتىلدى - كىرىسى ەڭ تومەن كۇنكورىس دەڭگەيىنەن تومەن ازاماتتارعا قارىز بەرۋگە تىيىم سالۋ ەنگىزىلدى، سونداي-اق بانكتەردىڭ مەنشىكتى كاپيتالىنىڭ جەتكىلىكتىلىگىنە قويىلاتىن تالاپتار كۇشەيتىلدى، بۇل بانكتەردىڭ كەپىلسىز تۇتىنۋشىلىق قارىزداردى، اسىرەسە كىرىسى تومەن ازاماتتارعا بەرۋىنە ەكونوميكالىق ىنتاسىن تومەندەتەدى. سونىمەن قاتار، 90 كۇننەن اسا مەرزىمى وتكەن بەرەشەگى بار جەكە تۇلعالاردىڭ بارلىق كەپىلسىز تۇتىنۋشىلىق قارىزدارى بويىنشا تۇراقسىزدىق ايىبى مەن كوميسسيالاردى ەسەپتەۋگە تىيىم سالۋ جونىندە زاڭنامالىق اكتىلەرگە تۇزەتۋلەر ازىرلەندى. وسى ارقىلى كەپىلسىز تۇتىنۋشىلىق قارىزدار بويىنشا بەرەشەكتىڭ ۇزدىكسىز ءوسۋى شەكتەلەتىن بولادى»، - دەدى ول.
اۆتور: مارلان جيەمباي