تۇركىستاندا اجەتحانا كۇزەتپەگەنى ءۇشىن پوليتسيا ۇستاپ اكەتكەن مۇعالىمگە مينيستر اراشا ءتۇستى
تۇركىستان. قازاقپارات - تۇركىستاندا اجەتحانا كۇزەتپەگەنى ءۇشىن «جازىقتى» بولعان مۇعالىمگە ءبىلىم جانە عىلىم مينيسترى اسحات ايماعامبەتوۆ اراشا ءتۇستى، دەپ حابارلايدى قازاقپارات.
شىمكەنتتىك بلوگەر ايگۇل ورىنبەك Facebook پاراقشاسىندا تۇركىستانداعى ماعجان جۇمابايەۆ اتىنداعى №15-ورتا مەكتەپتىڭ مۇعالىمى «اجەتحانا كۇزەتپەگەنى ءۇشىن» ۇستالعانىن حابارلادى.
«مۇعالىمدەر شىرىلداپ كومەك سۇراپ جازىپتى. مۇعالىمدى «كەزەكشىلىكتە تۇرمادىڭ» دەپ قولىن قايىرىپ الىپ كەتكەن»، - دەپ جازدى ول.
ول سونداي-اق №15-مەكتەپ ديرەكتورى ك. ءابدىقادىروۆانىڭ حاتىن قوسا تىركەگەن. حاتتا ءبىلىم ورداسىندا 31 جىلدان بەرى ەڭبەك ەتىپ كەلە جاتقان ۇستاز باقىت كەۋكەنوۆتى قالالىق ىشكى ىستەر باسقارماسىنىڭ باستىعى، پوليتسيا پودپولكوۆنيگى دانيار مەيىرحان باستاعان ءبىر توپ پوليتسەي ۇستاپ اكەتكەنى جازىلعان. ديرەكتوردىڭ جازۋىنشا، مۇعالىم اياق كيىمىنەن سۋ وتكەن سوڭ سونى اۋىستىرۋ ءۇشىن مەكتەپ عيماراتىنا كىرگەن. الايدا پوليتسەيلەر مۇعالىمنىڭ قارسىلىق كورسەتكەنىنە قاراماستان قولىن قايىرىپ، بولىمشەگە اكەتىپ قالعان. بۇل جاعدايدى سول جەردەن ءوتىپ بارا جاتقان ۇستازدار مەن وقۋشىلار كورگەن. پوليتسيا بولعان وقيعا بويىنشا ارنايى حاتتاما تولتىرىپ، ايىپپۇل راسىمدەپ، تولەتكەن.
كەيىنىرەك باقىت كەۋكەنوۆتىڭ ۆيدەوسى الەۋمەتتىك جەلىدە تارادى.
وسىعان بايلانىستى بۇگىن ءبىلىم جانە عىلىم مينيسترى اسحات ايماعامبەتوۆ ۇستازعا اراشا ءتۇستى.
«تۇركىستان قالاسىنداعى №15-مەكتەپتىڭ مۇعالىمىنە قاتىستى ورىن العان وقيعاعا ۇقساس جاعدايعا مۇلدەم جول بەرىلمەۋى ءتيىس. ءبىلىم جانە عىلىم مينيسترلىگى تاراپىنان بۇل مۇعالىمدى قورعاۋ بويىنشا بارلىق قاجەتتى شارالار قابىلداناتىن بولادى. سونداي-اق، اتالعان وقيعاعا قاتىسى بار ادامداردى جاۋاپكەرشىلىككە تارتۋدى تالاپ ەتەتىن بولامىز. ونىڭ ىشىندە، مەكتەپ اكىمشىلىگى مەن ءبىلىم بولىمىنە دە قاتىستى. بالالاردىڭ قاۋىپسىزدىگىن قامتاماسىز ەتۋ - ىڭعايلى جانە ءقاۋىپسىز جاعداي جاساۋ ارقىلى جۇزەگە اسىرىلۋى ءتيىس دەپ سانايمىن. ەگەر وسىنداي فاكتىلەر قايتالاناتىن بولسا، قاتاڭ شارالار قولدانىلادى. ورىن العان جاعدايدىڭ سەبەپتەرىن جان- جاقتى ءتۇسىنۋ ءۇشىن مۇعالىممەن تەلەفون ارقىلى سويلەستىم. جاعداي مەنىڭ جەكە باقىلاۋىمدا»، - دەپ جازدى اسحات ايماعامبەتوۆ.
اۆتور: جانات قاپالبايەۆا