باس پروكۋراتۋرا قازاقستاندىقتارعا ۇندەۋ جولدادى

نۇر-سۇلتان. قازاقپارات – ق ر باس پروكۋرورىنىڭ ورىنباسارى بولات دەمبايەۆ قازاقستاندا ەكسترەميستىك دەپ تانىلعان ۇيىمنىڭ حالىقتى كەزەكتى زاڭسىز اكسيالارعا قاتىسۋعا شاقىرۋىنا وراي ۇندەۋ جاريالادى.

قازاقپارات ۇندەۋدىڭ تولىق ءماتىنىن جاريالايدى.

***

باس پروكۋراتۋرانىڭ تۇسىندىرۋىنە جانە اكىمشىلىك ىقپال ەتۋ شارالارىنا قاراماستان، جەكەلەگەن ادامدار، سونىڭ ىشىندە شەتەلدەن الەۋمەتتىك جەلىلەر ارقىلى حالىقتى الداعى مەرەكەلەردە زاڭسىز ميتينگىلەرگە قاتىسۋعا شاقىرۋدى جالعاستىرۋدا.

بۇل ادامدار «بەيبىت جينالىستار، ميتينگىلەر، شەرۋلەر، پيكەتتەر جانە دەمونستراتسيالار ۇيىمداستىرۋ مەن وتكىزۋ ءتارتىبى تۋرالى» زاڭنىڭ (بۇدان ءارى - زاڭ) تالاپتارىن ايقىن بۇزۋدا.

اتاپ ايتقاندا، جوسپارلانعان ميتينگ تۋرالى حابارلانعانعا دەيىن ۇيىمداستىرۋشىلار بەلگىلەنگەن كۇنگە دەيىن 10 كۇن بۇرىن جەرگىلىكتى اتقارۋشى ورگاندارعا جازباشا ءوتىنىش بەرمەگەن.

وندا ولار: ءىس-شارانىڭ ماقساتى، نىسانى، وتكىزىلۋ ورنىن نەمەسە قوزعالىس باعىتتارىن، ونىڭ باستالۋ جانە اياقتالۋ ۋاقىتىن، قاتىسۋشىلاردىڭ بولجامدى سانىن، ۇيىمداستىرۋشىلاردىڭ جانە قوعامدىق ءتارتىپتى ساقتاۋعا جاۋاپتى ادامداردىڭ ساۋالنامالىق دەرەكتەرىن كورسەتىلۋى ءتيىس بولاتىن.

بۇل مىندەتتى تالاپتار اكسيا قاتىسۋشىلارىنىڭ وزدەرىنىڭ، سونداي-اق باسقا دا ازاماتتاردىڭ قاۋىپسىزدىگىن قامتاماسىز ەتۋ ءۇشىن عانا باعىتتالعان.

سونىمەن قاتار، رۇقسات العانعا دەيىن ۇيىمداستىرۋشى مەن باسقا دا تۇلعالاردىڭ ميتينگ تۋرالى جاريالاۋعا، وعان قاتىسۋعا شاقىرۋعا، سونداي-اق وسى ماقساتتا پاراقشالار، پلاكاتتار جانە باسقا دا وسىنداي ماتەريالداردى دايىنداۋعا جانە تاراتۋعا قۇقىعى جوق ەكەنىنە نازار اۋدارامىز.

باسقاشا ايتقاندا، 16 -جەلتوقساندا زاڭسىز اكسيالاردى ۇيىمداستىرۋشىلاردىڭ ءىس- ارەكەتتەرىندە اكىمشىلىك قۇقىق بۇزۋشىلىق بەلگىلەرى بايقالادى (اكىمشىلىك قۇقىق بۇزۋشىلىق تۋرالى كودەكستىڭ 488-بابى - بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى زاڭنامانى بۇزۋ).

ەگەر بۇل ارەكەتتەر ازاماتتاردىڭ، ۇيىمداردىڭ، قوعامنىڭ نەمەسە مەملەكەتتىڭ قۇقىقتارى مەن زاڭدى مۇددەلەرىنە ەلەۋلى زيان كەلتىرسە، وندا قىلمىستىق جاۋاپتىلىق تۋىندايدى (قىلمىستىق كودەكستىڭ 400-بابى - سانكسيالانباعان اكسيانى ۇيىمداستىرۋ نە وعان قاتىسۋ، ەگەر ولار ەلەۋلى زالال كەلتىرسە).

اكىمشىلىك جانە قىلمىستىق- قۇقىقتىق شارالار وسىنداي اكسيالاردى قولدايتىن ادامدارعا قاتىستى دا بىردەي دارەجەدە قولدانىلاتىن بولادى.

وسىعان بايلانىستى، باس پروكۋراتۋرا ارانداتۋشىلىق جاساماۋعا، قولدانىستاعى زاڭنامانى مۇلتىكسىز ساقتاۋعا جانە زاڭسىز ميتينگىلەرگە قاتىسۋدان باس تارتۋعا شاقىرادى.