يزرايل ءمينيسترى ەۆرەيلەرگە پانا بولعان قازاق حالقىنا العىس ايتتى
بۇل تۋرالى قازاقپارات ەلشىلىكتىڭ باسپا ءسوز قىزمەتىنە سىلتەمە جاساپ حابارلايدى.
«Dan Tel Aviv» قوناق ۇيىندە وتكەن كەشكە يزرايلدىڭ ەكولوگيا ءمينيسترى جانە يەرۋساليم جانە مۇرا جونىندەگى مينيستر زەيەۆ ەلكين، يەرۋساليم پاتريارحى تەوفيل III، ەكس-پرەمەر- ءمينيسترى ەحۋد ولمەرت، كنەسسەت دەپۋتاتتارى، باس سەفارد راۆۆينىنىڭ وكىلدەرى، يزرايلدە تىركەلگەن شەتەلدىك ديپلوماتيالىق ميسسيالاردىڭ باسشىلارى، جەرگىلىكتى ىسكەر، عىلىمي، مادەني جانە ب ا ق وكىلدەرى قاتىستى.
توتەنشە جانە وكىلەتتى ەلشى ساتىبالدى بۇرشاقوۆ ءوز سوزىندە قاتىسۋشىلارعا تۇڭعىش پرەزيدەنت - ەلباسى نۇرسۇلتان نازاربايەۆتىڭ سىرتقى ساياسي باستامالارىنىڭ ساباقتاستىعى، قازاقستانداعى ترانسفورماتسيا پروتسەستەرى، پرەزيدەنت قاسىم-جومارت توقايەۆ باستاماسىمەن جاريالانعان ساياسي، ەكونوميكالىق جانە الەۋمەتتىك رەفورمالار تۋرالى ايتىپ بەردى.
سونىمەن بىرگە، قازاقستان ديپلوماتى شاقىرىلعانداردى ەلىمىزدىڭ تاۋەلسىز دامۋ جىلدارىنداعى جەتىستىكتەرىمەن، مەملەكەتىمىزدىڭ حالىقارالىق ارەناداعى سىندارلى ساياساتىمەن، قازاقستان- يزرايل ىنتىماقتاستىعىنىڭ، ونىڭ ىشىندە اگروونەركاسىپتىك كەشەن، دەنساۋلىق ساقتاۋ، يننوۆاتسيالار، قولدانبالى زەرتتەۋلەر، تۋريزم، سۋ، ساندىق جانە قارجىلىق تەحنولوگيالار سالالارىنا قاتىستى پەرسپەكتيۆالارىمەن تانىستىردى.
سونداي-اق، قازاق ەلشىسى يزرايلدىكتەردى 2020 -جىلى ۇلى ابايدىڭ 175 جىلدىعى مەن ءال- فارابيدىڭ 1150 جىلدىعىن اتاپ ءوتۋ اياسىندا ۇيىمداستىرىلاتىن شارالارعا قاتىسۋعا شاقىردى.
مەرەكەنىڭ قۇرمەتتى قوناعى مينيستر ز. ەلكين ءوزىنىڭ قۇتتىقتاۋ سوزىندە ەكىجاقتى ساياسي، ساۋدا- ەكونوميكالىق جانە مادەني- گۋمانيتارلىق ىنتىماقتاستىقتىڭ ۇدەمەلى دامىپ جاتقاندىعىنا تەرەڭ قاناعاتتانۋشىلىق ءبىلدىردى. ەلكين مىرزا ەكىنشى دۇنيەجۇزىلىك سوعىس كەزىندە جەر اۋدارىلعان ەۆرەيلەرگە پانا بولعانى ءۇشىن قازاق حالقىنا ريزاشىلىعىن ءبىلدىرىپ جانە ولاردىڭ اراسىندا ءوزىنىڭ دە تۋعان- تۋىستارى بولعانىڭ ايتىپ تەبىرەندى.
سالتاناتتى كەشكە شاقىرىلعاندار قازاقتىڭ ءداستۇرلى قوناقجايلىعى، تاريحى جانە قازىرگى قازاقستان تۋرالى كىتاپ ەكسپوزيتسياسىمەن، سونىمەن قاتار كادەسىي ونىمدەرىمەن تانىستى.
قوناقتارعا ەلىمىزدىڭ كورىكتى جەرلەرى مەن ەڭ تانىمال تۋريستىك باعىتتارى تۋرالى بەينەروليكتەر كورسەتىلدى.
