ورىس تەاترىندا «جاڭگىر حان» ساحنالاندى
«رۋحاني جاڭعىرۋ» باعدارلاماسى اياسىندا ورىس تىلىندە قويىلعان شىعارما تاۋەلسىزدىك كۇنىنە ارنالدى.
باتىس قازاقستاندىق ولكەتانۋشى جايساڭ اقباي جازعان تۋىندىنى تەاتردىڭ باس رەجيسسەرى وكسانا مالۋشا ساحنالادى. سۋرەتشىسى - ماكسيم بۋدايەۆ.
سپەكتاكل بارىسىندا تاقىرىپقا قاتىسى بار كەيبىر ماڭىزدى وقيعالاردى تەاتر ءارتىسى، ۆ. ەرماكوۆا اتىنداعى رەسەي سىيلىعىنىڭ لاۋرەاتى رۋسلان دجۋماحمەتوۆ ەسكە ءتۇسىرىپ، بايانداپ وتىردى.
ءبىر جاعىندا كوتەرىلىسكە شىققان يساتاي مەن ماحامبەت، جەلكە تۇسىنان پاتشا وتارلاۋشىلارى ءتونىپ، ەكى وتتىڭ ورتاسىندا قالسا دا، قولاستىنداعى ەلىن وتىرىقشىلىق پەن وركەنيەتكە، ءبىلىم الۋعا ۇندەپ، العا جەتەلەگەن جاڭگىر حاننىڭ بەينەسىن اناتوليي گروموۆ سومداسا، ونىڭ سۇيىكتى حانشاسى ءارى سەنىمدى سەرىگى فاتيما رولىندە ناتاليا كوپەەچكينا كورىندى. باسقا دا ارتىستەر قازاق تاريحىندا ورنى بار تۇلعالاردى ساحناعا الىپ شىعۋعا تىرىستى.
تاريحي وقيعالارعا نەگىزدەلگەن شىعارمانى ساحنالاۋ ءۇشىن رەجيسسەر مەن سۋرەتشى، ارتىستەر، جالپى تەاتر ۇجىمى بارىنشا ەڭبەكتەنگەن. دەگەنمەن ولقى سوعىپ جاتقان تۇستارى بولدى، يساتاي مەن ماحامبەتتىڭ، اقىن رولىندەگى ءارتىستىڭ كيىمدەرى دە كەلىڭكىرەمەيدى.
ەڭ باستىسى، 160 -جىلدىق تاريحى بار تەاتردىڭ قازاقتىڭ سوڭعى حاندارىنىڭ ءبىرى، كۇردەلى دە قايشىلىقتى تۇلعا جاڭگىرگە بەت بۇرۋى قۋانتتى.
اۆتور: ەلجان ەرالى