تۇركىستانعا ارنالعان قوس بايقاۋدىڭ جەڭىمپازدارى انىقتالدى

تۇركىستان. قازاقپارات - تۇركىستان وبلىسىندا «تۇركىستان - ەر تۇرىكتىڭ بەسىگى عوي...» رەسپۋبليكالىق ادەبي بايقاۋىنىڭ جانە «تۇركىستاندى بىرگە تۇلەتەيىك» شىعارماشىلىق بايقاۋىنىڭ جەڭىمپازدارى ماراپاتتالدى، دەپ حابارلايدى قازاقپارات.

اتالمىش بايقاۋلارعا رەسپۋبليكامىزدىڭ بارلىق وڭىرىنەن 100 دەن اسا قالامگەر مەن الەۋمەتتىك جەلى قولدانۋشىلارى قاتىسىپ، باعىن سىنادى.

ماراپاتتاۋ ءراسىمىن وبلىستىق قوعامدىق دامۋ باسقارماسىنىڭ باسشىسى دامير ءجۇنىسوۆ اشىپ بەردى. «مۇنداي بايقاۋلاردىڭ ءوتۋى - رۋحانيات سالاسىنا ۇلكەن سەرپىلىس الىپ كەلەدى. بايقاۋعا تۇسكەن تىڭ تۋىندىلار، ماڭىزدى مالىمەتتەر ارقىلى تۇركىستاننىڭ تاريحىن وسكەلەڭ ۇرپاققا جاڭاشا باعىتتا ناسيحاتتاي الامىز»، - دەگەن ول، قاتىسۋشىلارعا العىسىن ءبىلدىردى. 

تۇركى ەلدەرىنىڭ رۋحاني استاناسى، جاس وبلىس ورتالىعى - تۇركىستان قالاسىنىڭ تەرەڭ تاريحىن جىرلاۋ، شىعارماشىل جانداردىڭ تۋىندىسىنا سەرپىن بەرىپ، ولاردىڭ تىڭ دۇنيەلەرىن ناسيحاتتاۋ ماقساتىندا ۇيىمداستىرىلعان «تۇركىستان - ەر تۇرىكتىڭ بەسىگى عوي...» رەسپۋبليكالىق ادەبي بايقاۋى پوەزيا جانە پروزا جانرلارى بويىنشا ءوتتى.

قازىلار القاسىنىڭ شەشىمىمەن تاقىرىپتى تەرەڭىنەن تولعاپ، وتتى شىعارمالارىمەن ەرەكشەلەنگەن قىزىلوردا وبلىسىنىڭ تۋماسى تولىباي ابىلايەۆ باس جۇلدەگە يە بولدى. جۇلدەلى 1-ورىن قاراعاندى قالاسىنان قاتىسقان جانات جاڭقاش ۇلىنا بەرىلسە، تۇركىستاندىق باتىرحان سارسەنحان 2-ورىن، قوستاناي وبلىسىنان اقىلبەك شاياحمەت 3-ورىندى قانجىعاسىنا بايلادى. ماڭعىستاۋ وبلىسىنان اسىلبەك جاڭبىرباي، كوكشەتاۋلىق قۋانىش وسپان، نۇر-سۇلتان قالاسىنان قاتىسقان ولجاس قاسىم جانە تۇركىستان وبلىسىنان ايدار سەيدازىم مەن داۋرەن تىلەۋحانعا ىنتالاندىرۋ سىيلىقتارى تابىستالدى.

بايقاۋعا اقىن، ق ر ەڭبەك سىڭىرگەن قايراتكەرى قاسىمحان بەگمان، اقىن، قازاقستان جازۋشىلار وداعىنىڭ تۇركىستان وبلىستىق فيليالىنىڭ ءتوراعاسى الىبەك شەگەباي، بەلگىلى جازۋشى ەسقارا توقتاسىن قازىلىق ەتتى.

ال تۇركىستان قالاسىن دامىتۋدىڭ كەشەندى جوسپارلارى مەن وڭتايلى وزگەرىستەرىن كەڭ كولەمدە ناسيحاتتاۋ ماقساتىندا جاريالانعان «تۇركىستاندى بىرگە تۇلەتەيىك» شىعارماشىلىق بايقاۋىنا 20 دان اسا الەۋمەتتىك جەلى بەلسەندىلەرى قاتىسۋعا نيەت بىلدىرگەن بولاتىن. «ايقىن» گازەتىنىڭ تۇركىستان وبلىسىنداعى مەنشىكتى ءتىلشىسى تەلمان بەيسەن، بەلگىلى جۋرناليست باۋىرجان بەردىمۇراتوۆ، قالالىق «تۇركىستان» گازەتىنىڭ باس رەداكتورى مالىك ءالماحان قازىلىق جاساعان بايقاۋدىڭ «الەۋمەتتىك جەلىدەگى جاريالانىمدار» اتالىمى بويىنشا 1-ورىنعا بەلگىلى جۋرناليست، «يۋجنىي كازاحستان» گازەتىنىڭ باس رەداكتورىنىڭ ورىنباسارى قىزمەتىن اتقارعان، مارقۇم كەڭەسباي يسمايلوۆتىڭ جۇمىستارى لايىق دەپ تانىلىپ، جۇلدەسى ۇلى سەيدۋللا كەڭەسبەك ۇلىنا تابىستالدى. 2-ورىن يمانقۇلوۆا نەسىبەلى عايبۋللا قىزىنا، 3-ورىن شورابەكوۆا جانسايا ءابدىالى قىزىنا بۇيىردى. ال، ىنتالاندىرۋ سىيلىقتارىمەن داۋرەن بولىس، پريۆالوۆ ۆلاديمير ماراپاتتالدى. «You Tube كانالىنداعى يميدجدىك بەينە ءتۇسىرىلىم» اتالىمى بويىنشا 1-ورىن بەيبىت قازىبەكوۆكە بەرىلدى.