ەلىمىزدە ساتىلعان ءاربىر ەكىنشى اۆتوموبيل قازاقستاندا قۇراستىرىلعان - توقايەۆ

نۇر-سۇلتان. قازاقپارات - قازاقستاندا ساتىلعان ءاربىر ەكىنشى اۆتوموبيل وتاندىق كاسىپورىنداردا قۇراستىرىلعان.

بۇل تۋرالى بۇگىن ق ر پرەزيدەنتىنىڭ «التىن ساپا» سىيلىعىن تاپسىرۋ راسىمىندە مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.

«ءبىز ەلىمىزدىڭ باستى مەيرامى تاۋەلسىزدىك كۇنى قارساڭىندا جينالىپ وتىرمىز. تۇڭعىش پرەزيدەنتىمىز نۇرسۇلتان نازاربايەۆ ايتقانداي، تاۋەلسىزدىكتى جاريالاۋ ءبىر ماسەلە، ءبىراق مۇلدەم باسقاسى، بارىنشا ماڭىزدى ءارى ەڭ قيىنى - ونى ۇستاپ قالۋ. 28 جىلدىڭ ىشىندە ەلباسىنىڭ باسشىلىعىمەن كوپتەگەن جۇمىستار. يندۋستريالاندىرۋ ەل ەكونوميكاسى دامۋىنىڭ مىعىم كەرەگەسىن قالىپتاستىردى. بۇكىل ەلدە شامامەن 1300 جاڭا ونەركاسىپ ىسكە قوسىلدى. ناتيجەسىندە وندەۋ سەكتورىنداعى ءوندىرىس كولەمى سوڭعى 10 جىلدا 3 ەسەدەن استامعا ءوستى. وڭدەۋ ونەركاسىبىنە 34 ميلليارد دوللاردان استام تىكەلەي شەتەل ينۆەستيسياسى تارتىلدى. سەكتورداعى ەكسپورت كولەمى ۇشتەن بىرگە ارتتى جانە بۇگىندە 165 ميلليارد دوللاردى قۇرادى»، - دەدى قازاقستان پرەزيدەنتى.

مەملەكەت باسشىسى قازاقستاندا وندىرىلگەن ونىمدەردىڭ 120 دان استام ەلدىڭ نارىعىنا جەتكىزىلەتىندىگىن ايتتى. ورتالىق ازيا، ەاەو ەلدەرى، قىتاي جانە ەۋروپالىق نارىق قازاقستاندىق ونىمدەر جەتكىزىلەتىن نەگىزگى نارىققا اينالعاندىعىنا نازار اۋدارتتى.

«ۇكىمەتتىڭ دەرەگىنە سايكەس، سوڭعى 8 جىلدا ەكسپورتقا 85 جاڭا تاۋارلىق پوزيتسيا شىعارىلدى. يندۋسترياليزاتسيا الەمدىك داعدارىس كەزەڭىندە ەكونوميكامىزدىڭ دامۋىنا بايىپتى سەرپىن بەردى. ەكونوميكانىڭ كوپتەگەن سالالارى مەن سەكتورلارىندا بەيىن مەن قۇرىلىم بىرتىندەپ وزگەرىپ جاتىر. مەتتالۋرگيادا بولاتتان رەلس، ارقان، رادياتور سىندى دايىن بۇيىمدار ءوندىرىسى باستالدى. ەل ىشىندە اليۋمينيدى باستاپقى قايتا وڭدەۋ ارتتى»، - دەدى قاسىم-جومارت توقايەۆ.

ق ر پرەزيدەنتى ەلىمىزدىڭ الەمدىك تيتان وندىرۋشىلەر تىزبەسىنە قوسىلعاندىعىن اتاپ ءوتتى. بۇعان دەيىن شىعارىلماعان تيتان قۇيمالارى مەن قورىتپالارى جولعا قويىلعانىن ايتتى.

«اۆتوموبيل جاساۋدى دامىتۋعا جاعداي جاسالدى. بۇل سالاداعى ءوندىرىس كولەمىن 8 ەسە ارتتىرۋعا مۇمكىندىك بەردى. 2010 -جىلى قازاقستاندا 4 مىڭ اۆتوموبيل شىعارىلاتىن. وسى جىلدىڭ 10 ايىنىڭ قورىتىندىسىندا قۇراستىرىلعان ماشينالاردىڭ سانى 38 مىڭنان اسىپ ءتۇستى. بۇگىندە قازاقستاندا ساتىلعان ءاربىر ەكىنشى اۆتوموبيل وتاندىق كاسىپورىنداردا قۇراستىرىلعان»، - دەدى مەملەكەت باسشىسى.

اۆتور: مارلان جيەمباي