الەمدەگى ەت وڭدەۋ بويىنشا ەڭ الپاۋىت ەكى كومپانيانىڭ ءبىرى قازاقستانعا كەلە جاتىر

نۇر- سۇلتان. قازاقپارات - امەريكالىق «Tyson Foods» كومپانياسىنىڭ قازاقستاندا ەت وڭدەيتىن كەشەن سالاتىنى جايلى «اشىق ديالوگ» باعدارلاماسىندا ق ر اقپارات جانە قوعامدىق دامۋ ءمينيسترى داۋرەن ابايەۆ ايتىپ بەردى، دەپ حابارلايدى قازاقپارات ءتىلشىسى.

««Tyson Foods» كومپانياسى تۋرالى قانداي مالىمەتتى ءبىلۋ ماڭىزدى؟ ول - ەت ءوندىرىسى بويىنشا بۇكىل الەم بويىنشا ەڭ الپاۋىت ەكىنشى كومپانيا. «Tyson Foods» كورپوراتسياسىنىڭ وندىرىستىك كاسىپورىندارى تەك ءۇش مەملەكەتتە بار. ولار: ا ق ش، قىتاي جانە ءۇندىستان. ءبىز بۇل رەتتە ءتورتىنشى مەملەكەت بولىپ وتىرعانىمىزدى اتاپ ءوتۋ كەرەك. ولار قازاقستان اۋماعىندا زامانعا ساي ەت وڭدەيتىن، تاۋلىگىنە 2 مىڭ باس سويىلاتىن كەشەن سالۋدى كوزدەپ وتىر. جوبانىڭ ينۆەستيتسيالىق كولەمى - 500 ميلليون ا ق ش دوللارى شاماسىندا بولادى» ، - دەدى داۋرەن ابايەۆ «اشىق ديالوگ» باعدارلاماسىندا.

ءمينيستردىڭ ايتۋىنشا، وسىنداي ينۆەستوردىڭ ءبىزدىڭ ەلگە كەلىپ جاتقانى - بۇكىل الەمنىڭ ىسكەرلەر ورتاسى ءۇشىن ايتارلىقتاي ايقىن سيگنال سانالادى.

«كاسىپورىن ەكسپورتتىق باعىتتا جۇمىس جۇرگىزەدى. الىس- جاقىن شەتەلدەرگە ەت تاسىمالدايدى. ول ءۇشىن وسىندا - قازاقستاندا اۋقىمدى جۇمىس جۇرگىزىلگەنىن ايتا كەتۋ كەرەك. ءبىزدىڭ ماماندار ۆەتەرينارلىق تالاپتاردى بەكىتۋ باعىتىندا وراسان زور جۇمىس ىستەدى. ەڭ ءبىرىنشى كەزەكتە، ءبىزدىڭ مەملەكەتتى قۇس تۇماۋى مەن باسقا دا قاۋىپتى اۋرۋلاردان تازا اۋماق رەتىندە مويىنداتۋ كەرەك ەدى. بۇكىلالەمدىك بانكتىڭ ساراپشىلارى قازاقستاندى اۋىل شارۋاشىلىعىن دامىتا الاتىن مەملەكەتتەردىڭ بەستىگىنە ەنگىزەدى. «Tyson Foods» سەكىلدى كومپانيانىڭ قازاقستانعا كەلۋىنىڭ ماڭىزى وتە زور. ويتكەنى، بۇل تانىمال برەند، تەحنولوگيا مەن جۇمىس ورىندارى، سالىق تۇسىمدەرى» ، - دەدى ول.

ەسكە سالا كەتسەك، ق ر پرەمەر- ءمينيسترى اسقار ءماميننىڭ ا ق ش- قا جۇمىس ساپارى اياسىندا امەريكالىق اگروبيزنەس وكىلدەرىمەن قازاقستاندا ەت وڭدەۋ كاسىپورىندارىن جانە سۋارۋ جۇيەلەرى ءوندىرىسىن اشۋ تۋرالى ۋاعدالاستىقتارعا قول جەتكىزىلگەن بولاتىن.