مەملەكەتتىك حاتشى ءبىرقاتار ازاماتقا مەملەكەتتىك ناگرادالاردى تاپسىردى

نۇر- سۇلتان. قازاقپارات - بۇگىن اقوردادا ق ر مەملەكەتتىك حاتشىسى قىرىمبەك كوشەربايەۆ ءبىرقاتار ازاماتقا مەملەكەتتىك ناگرادالاردى تاپسىردى، دەپ حابارلايدى قازاقپارات ءتىلشىسى.

«وتانىمىزدىڭ وسىناۋ قاسيەتتى مەرەكەسى قارساڭىندا جىل سايىن قازاقستاننىڭ جارقىن بولاشاعى جولىندا قاجىرلى ەڭبەگىمەن قالتقىسىز ەڭبەك ەتىپ جاتقان اسىل ازاماتتارىمىزدى مارتەبەلى مەملەكەتتىك ناگرادالارمەن ماراپاتتاۋ يگىلىكتى داستۇرگە اينالدى. ارينە، تاۋەلسىزدىكتىڭ ءمانى دە، ماڭىزى مەن ماعىناسى دا ايرىقشا. قازاق دەگەن حالىقتىڭ سان عاسىرعا جالعاسقان جانە قازىر عانا ىسكە اسقان ارمانى. دەربەس مەملەكەت قۇرۋ حالقىمىزدىڭ بايىرقالى بوستاندىققا، ەگەمەن ەلدىككە، ازات رۋحقا دەگەن ارپالىسىنىڭ ناقتى جەمىسى»، - دەدى مەملەكەتتىك حاتشى.

ونىڭ اتاپ وتۋىنشە، تاۋەلسىزدىكتى ورنىقتىرۋدا قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ وراسان زور كۇش- جىگەرى، تەرەڭ اقىل- پاراساتى، سىندارلى، سالماقتى ساياساتى جانە بارلىق قازاقستاندىقتاردىڭ بىرلىگى مەن جاسامپاز ەڭبەگى ايرىقشا ءرول اتقارعان. مەملەكەتتىك حاتشىنىڭ ايتۋىنشا، بۇگىنگى تاڭدا تاۋەلسىزدىكتى نىعايتۋداعى تاريحي جولدى جالعاستىرىپ كەلە جاتقان مەملەكەت باسشىسى قاسىم- جومارت توقايەۆ تا قازاقستاننىڭ تاياۋ جىلدارداعى قارقىندى دامۋ باعىتتارىن بەلگىلەپ، اتالعان مىندەتتەرى شەشۋدىڭ ناقتى جولدارىن كورسەتىپ بەرگەن.

«ءبىزدىڭ ماقسات - وسى كەلەلى مىندەتتەردى ءبارىمىز جۇمىلعان جۇدىرىقتاي بىرگە جۇزەگە اسىرىپ، تاۋەلسىزدىگىمىز جاڭا بەلەسكە كوتەرۋ، تاۋەلسىزدىگىمىزدى باياندى ەتۋ. بۇل ورايدا سىزدەر ءار سالاداعى ەڭبەكتەرىڭىزبەن مەملەكەتتىلىكتىڭ ىرگەسىن بەكەمدەۋگە، ەلىمىزدىڭ الەۋمەتتىك- ەكونوميكالىق قوعامدىق- ساياسي جانە مادەني- رۋحاني دامۋىنا، ساليقالى ۇلت، سالاۋاتتى ۇرپاق قالىپتاستىرۋ ىسىنە ەلەۋلى ۇلەس قوسىپ جۇرسىزدەر. سوندىقتان مەملەكەت باسشىسىمەن جارلىعىمەن سىزدەر تاۋەلسىز ەلىمىزدىڭ جوعارى مەملەكەتتىك ناگرادالارىمەن ماراپاتتالدىڭىزدار»، - دەدى قىرىمبەك كوشەربايەۆ.

وسىدان كەيىن مەملەكەتتىك حاتشى اقىن مارفۋعا ايتحوجاعا Ⅱ دارەجەلى «بارىس» وردەنىن، اقىن نەسىپبەك ايتقا Ⅲ دارەجەلى «بارىس» وردەنىن تاپسىردى. سونداي- اق ءبىر ءتوپ ونەر قايراتكەرى «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعىن الدى. ءبىر توپ عالىمعا قازاقستان رەسپۋبليكاسىنىڭ ءال- فارابي اتىنداعى عىلىم مەن تەحنيكا سالاسىنداعى 2019 -جىلعى مەملەكەتتىك سىيلىعى بەرىلدى.