نۇر وتان پارتياسى قانداستاردىڭ ماسەلەسىن شەشۋگە اتسالىسپاق

None
None
نۇر-سۇلتان. قازاقپارات - Nur Otan پارتياسى تاريحي وتانىنا ورالعان قانداستاردىڭ ماسەلەسىن شەشۋگە ۇلەس قوسادى، دەپ حابارلايدى قازاقپارات «وتانداستار قورىنىڭ» باسپا ءسوز قىزمەتىنە سىلتەمە جاساپ.

11 -جەلتوقسان كۇنى نۇر-سۇلتان قالاسىندا «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك پەن «وتانداستار قورى» ك ە ا ق پرەزيدەنتى نۇرتاي ابىقايەۆ جانە دۇنيەجۇزى قازاقتارى قاۋىمداستىعى ءتوراعاسىنىڭ ءبىرىنشى ورىنباسارى زاۋىتبەك تۇرىسبەكوۆ ءوزارا ىنتىماقتاستىق جونىندەگى مەموراندۋمعا قول قويدى.

وسى حاتتاماعا سايكەس، «Nur Otan» پارتياسى مەن «وتانداستار قورى» جانە دۇنيەجۇزى قازاقتارى قاۋىمداستىعى ارىپتەستىك قاتىناستى ورىستەتىپ، بىرلەسكەن جوبالاردى جۇزەگە اسىرادى.

«الداعى ۋاقىتتا «Nur Otan» پارتياسىنىڭ قوعامدىق قابىلداۋلارى مەن «وتانداستار قورىنىڭ» وتانداستاردى اقپاراتتىق قولداۋ ورتالىعى اراسىنداعى ۇيلەستىرۋ جۇمىستارىن جەتىلدىرە ءتۇسۋ كوزدەلىپ وتىر. اقپاراتتىق قولداۋ ورتالىعىنىڭ قۇرامىنا ءبىرىڭعاي بايلانىس ورتالىعى مەن فرونت وفيستەر كىرەدى. قوردىڭ ءبىرىڭعاي بايلانىس ورتالىعى مەن قوعامدىق قابىلداۋى قانداستارعا قاجەتتى نورماتيۆتى- قۇقىقتىق اكتىلەر بويىنشا اقپاراتتىق جانە كونسۋلتاتيۆتىك كەڭەس بەرىپ، تۋىنداعان ماسەلەلەردىڭ وڭ شەشىلۋىنە ناقتى قولداۋ كورسەتەدى.

فرونت-وفيستەر دۇنيەجۇزى قازاقتارى قاۋىمداستىعىمەن بىرلەسىپ، قولعا الىنعان جوبا. كولل ورتالىقتىڭ اشىلعان كۇنى 22 -ساۋىردەن بەرى 2640 قانداسىمىز قوڭىراۋ شالىپ، حابارلاستى. فرونت-وفيستەرگە 1587 قانداسىمىز قابىلداۋعا كەلگەن. وندا قانداستارىمىز ق ر ازاماتتىعىن الۋ، كورسەتىلەتىن مەملەكەتتىك قولداۋ شارالارى، ق ر تۇرۋعا رۇقسات بەرەتىن ىقتيار حات، ورالمان مارتەبەسىن الۋ، شەتتەگى قازاق دياسپوراسىمەن بايلانىستى نىعايتۋ ماسەلەلەرىن كوتەرگەن. بۇل ماسەلەلەردىڭ بارلىعى دەرلىك اقپاراتتىق بايلانىس ورتالىعىنىڭ تىكەلەي ىقپالىمەن ءتيىستى مەكەمەلەر ارقىلى جەدەل شەشىمىن تاپتى» دەلىنگەن حابارلامادا.

الداعى ۋاقىتتا وسى قىزمەتتى ودان ءارى ءتيىمدى ەتۋ ءۇشىن «Nur Otan» پارتياسىنىڭ وڭىرلەردەگى قوعامدىق قابىلداۋىمەن بىرلەسىپ جۇمىس جۇرگىزۋ ماسەلەلەرى قاراستىرىلماق. پارتيانىڭ قوعامدىق كوميسسيالارى مەن كەڭەستەرى ارقىلى جەرگىلىكتى اكىمشىلىكتەردىڭ قانداستار كوتەرگەن ماسەلەلەردى وڭتايلى شەشۋىنە كومەكتەسۋگە، ىقپال ەتۋگە بولادى. بۇل قانداستارعا كورسەتىلەتىن كومەكتىڭ ساپاسىن جوعارى دەڭگەيگە كوتەرە تۇسپەك.

«Nur Otan» پارتياسىنىڭ وبلىس ورتالىقتارى مەن قالالاردا، اۋدان ورتالىقتارىندا فيليالدارى بەلسەندى جۇمىس ىستەيدى.

بۇعان قوسا «نۇر وتان» پارتياسىنىڭ قوعامدىق ساياسي ينستيتۋتى، «جاس وتان» جاستار قاناتى، ساياسي مەنەدجمەنت مەكتەبى، NUR Media حولدينگى - وزىندىك تاجىريبەسى قالىپتاسقان قۇرىلىمدار. ولاردىڭ جۇرتشىلىقپەن كەزدەسەتىن جان-جاقتى باعىتتاعى جيىندار مەن كەزدەسۋلەر، كونفەرەنسيالار وتكىزەتىن، پىكىر الماساتىن ءتۇرلى الاڭدارى مەن ساراپتامالىق تالداۋ ورتالىقتارى بار.

«وتانداستار قورى» ەكىجاقتى ىنتىماقتاستىقتى دامىتا وتىرىپ، وسى الاڭداردى قانداستارىمىزدىڭ ماسەلەلەرىن تالقىلاۋعا، شەشۋگە ءتيىمدى پايدالانۋعا مۇددەلىلىك تانىتىپ وتىر.

سوڭعى جاڭالىقتار