قىزىلوردادا باسپاناسىز جالعىزباستى اناعا اۋىلداستارى ءۇي الىپ بەردى
ءبىر ۇل، ءبىر قىز تاربيەلەپ وتىرعان جالعىزباستى انا اينۇر ناۋانوۆا ۇزاق جىلدان بەرى باسپاناسىز قيىندىق كورىپ كەلە جاتقان ەدى. بۇل وتباسىنىڭ تۇرمىستىق احۋالىنان حاباردار جەرلەستەرى ورتاق بايلامعا كەلىپ، وعان قول ۇشىن سوزۋدى قۇپ كوردى. ناتيجەسىندە بارلىعى قارجىلاي كومەكتەسىپ، تاۋەلسىزدىك مەرەكەسى قارساڭىندا اتالمىش وتباسى باسپاناعا قول جەتكىزدى. قامقورلىق تانىتقان ازاماتتار قاتارىندا جەرگىلىكتى كاسىپكەرلەر، وزگە دە قارجىلى ازاماتتار، اۋىلدىڭ قاراپايىم تۇرعىندارى بار.
«اۋىل تۇرعىندارى وسىلايشا اۋىزبىرلىكتىڭ ۇلگىسىن كورسەتتى. قايىرىمدى جاندار تەك جاقسىلىق جاساۋمەن شەكتەلگەن جوق. وسكەلەڭ ۇرپاققا ۇلاعات سىيلايتىن ىزگىلىكتى ءىستى پاش ەتتى» ، - دەدى Nur Otan پارتياسى اۋداندىق فيليالى ءتوراعاسىنىڭ ءبىرىنشى ورىنباسارى قانشاگۇل مۇستافايەۆا.
اينۇر ناۋانوۆانىڭ قىزى جانەركە ارناۋلى وقۋ ورنىن ءتامامداپ، ءوز ماماندىعى بويىنشا ەڭبەك ەتىپ كەلەدى. ال ۇلى باعدات مەكتەپتە جەتىنشى سىنىپتا وقيدى.