ديماش نيۋ- يوركتە «دايديداۋ» ءانىن ورىنداعان ساتتە كورەرمەن ورىندارىنان تۇرىپ، بىرگە شىرقادى

نۇر- سۇلتان. قازاقپارات - ديماش قۇدايبەرگەننىڭ نيۋ- يوركتەگى كونسەرتى ۇلكەن انشلاگپەن ءوتتى.

 Barсlays center  ارەناسى قازاق ءانشىسىن ءسۇيىپ تىڭدايتىن جۇرتشىلىققا لىق تولى بولدى، دەپ حابارلايدى قازاقپارات dimashnews.com سايتىنا سىلتەمە جاساپ.

جينالعان جۇرتشىلىق ءانشىنىڭ ءار ءنومىرىن زور سۇيىسپەنشىلىكپەن قارسى الدى. ديماشتىڭ ءاربىر ءانى تولىققاندى شوۋعا اينالدى. ونىڭ رەپەرتۋارىندا ءتۇرلى تىلدەگى اندەر بولعانىمەن، تىڭدارماندى قازاق تىلىندە شىرقالعان كومپوزيتسيالار تەبىرەنتىپ، ديماشپەن بىرگە قوسا ورىندادى. جانكۇيەرلەردىڭ باسىم بولىگى د. قۇدايبەرگەننىڭ اندەرىن جاتقا بىلەدى. ولار قازاق تىلىندەگى ءان ءماتىنىن ءتۇسىنۋ ءۇشىن ءوز تىلدەرىنە اۋدارىپ ءتىپتى، قازاق ءتىلىن ۇيرەنىپ تە ءجۇر.

ديماش «دايديداۋ» ءانىن ورىنداعان ساتتە كورەرمەن ورىندارىنان تۇرىپ، بىرگە شىرقادى. كوزدەرىنە جاس العانداردىڭ دا قاتارى مول بولدى.

«كىشكەنتاي كەزىنەن «دايديداۋ» ءانىن بۇكىل الەم وزىمەن بىرگە ايتقانىن ارمانداعان ديماشتىڭ ارمانى ورىندالدى. نيۋ- يوركتىڭ Barсlays center  ارەناسىنا الەمنىڭ تۇكپىر- تۇكپىرىنەن جينالعان ادامدار قازاق ءانىن بىرگە شىرقادى»، - دەلىنگەن اقپاراتتا.

سونداي- اق جاس تالانت ءاربىر ءانىن ورىنداعان سايىن: «مەنىڭ وتانىم - قازاقستان!»، - دەي كەلە، جينالعان جۇرتشىلىقتى ەلىمىزگە كەلۋگە شاقىردى.

ديماش پەن مۋزىكانتتار ورىنداعان «اداي» كۇيى دە جانكۇيەرلەردى ءتانتى ەتتى. ال كونسەرت سوڭىندا «ەلىم مەنىڭ» ءانى ورىندالدى. الىپ ەكراننان قازاقستان تۋى جەلبىرەپ، قازاق جەرىنىڭ كوز تارتارلىق تۇمسا تابيعاتى نيۋ- يوركتىڭ Barсlays center ارەناسىنا جينالعانداردى تامسانتتى. جالپى د. قۇدايبەرگەن ورىنداعان بۇل ءان قازاق دالاسىنىڭ، قازاق جەرىنىڭ ناعىز ءانۇرانىنا اينالدى دەسەك تە بولادى.

ەسكە سالايىق، د. قۇدايبەرگەننىڭ 10 - جەلتوقساندا نيۋ- يوركتە وتكەن جەكە كونسەرتىنە الەمنىڭ 51 ەلىنەن جانكۇيەرلەر جينالدى. ولار ءانشىنى دجون كەننەدي اتىنداعى حالىقارالىق اۋەجايدان قازاقستاننىڭ تۋىمەن قارسى العان بولاتىن.

گرەممي سىيلىعىنىڭ يەگەرى، پەرۋلىك اتاقتى ءانشى ەۆا ايلان ديماش قۇدايبەرگەندى كورۋ ءۇشىن ءوز كونسەرتىن كەيىنگە شەگەرىپ، نيۋ- يورككە ۇشىپ كەلدى.

كونسەرت قازاقستاننىڭ ا ق ش- تاعى مادەنيەت كۇندەرى اياسىندا جانە ق ر مادەنيەت جانە سپورت مينيسترلىگىنىڭ قولداۋىمەن ۇيىمداستىرىلدى.

اۆتور مارلان جيەمباي