ەلىمىزدە تەرروريزمدى قارجىلاندىرۋعا قارسى زاڭنامالار ماقۇلداندى

None
None
نۇر-سۇلتان. قازاقپارات - پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى، دەپ حابارلايدى قازاقپارات ءتىلشىسى.

«زاڭ جوباسىن ازىرلەۋ قاجەتتىگى 2021-2022 -جىلدارى قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس- قيمىل جونىندەگى ەۋرازيالىق توپتىڭ ءبىزدىڭ ەلدى باعالاۋىنىڭ ەكىنشى راۋندىنا دايىندالۋعا بايلانىستى تۋىنداپ وتىر»، - دەدى ق ر پرەمەر-ءمينيستردىڭ ءبىرىنشى ورىنباسارى - قارجى ءمينيسترى ءاليحان سمايىلوۆ.

زاڭ جوباسىنىڭ ماقساتتارىنا توقتالساق، بىرىنشىدەن، حالىقارالىق ستاندارتتاردى ەنگىزۋ جانە قارجى مونيتورينگى سالاسىندا ۇلتتىق جۇيەنى ودان ءارى جەتىلدىرۋ ەسكەرىلگەن.

«وسىعان بايلانىستى كليەنتتى تيىسىنشە تەكسەرۋ، ىشكى باقىلاۋ جۇرگىزۋ جانە كۇماندى وپەراتسيا تۋرالى حابارلاما جىبەرۋ سياقتى قارجى مونيتورينگى راسىمدەرىنە وزگەرىستەر ۇسىنىلادى. قارجى مونيتورينگى سالاسىنداعى ۋاكىلەتتى ورگانعا رەتتەۋشى مەملەكەتتىك ورگانى جوق قارجى مونيتورينگى سۋبەكتىلەرىنە قاتىستى اكىمشىلىك قۇقىق بۇزۋشىلىق تۋرالى حاتتامالاردى تولتىرۋعا قۇزىرەت بەرىلەدى. بلانكەتتىك نورمالاردى جويۋ ماقساتىندا قارجى مونيتورينگى سۋبەكتىلەرىنىڭ اكىمشىلىك قۇقىق بۇزۋشىلىقتار قۇرامى قايتا قارالدى، تاۋەكەلدەردى تالداۋ نەگىزىندە سانكسيالار ازايتىلدى»، - دەدى ول.

ونىڭ سوزىنە قاراعاندا، قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس- قيمىل سالاسىنداعى ۋاكىلەتتى ورگاندار ءۇشىن حالىقارالىق ءوزارا ءىس-قيمىل راسىمدەرى، ونىڭ ىشىندە قىلمىستىق اكتيۆتەردى ىزدەستىرۋ جانە قايتارۋ بويىنشا راسىمدەر رەگلامەنتتەلگەن.

«حالىقارالىق ستاندارتتاردى ىسكە اسىرۋ ماقساتىندا زاڭ جوباسىنا كوممەرتسيالىق ەمەس سەكتوردى تەرروريزمدى قارجىلاندىرۋ ماقساتىندا پايدالانۋدان قورعاۋعا بايلانىستى نوۆەللالار ەنگىزىلدى. تالاپتار ەرىكتى قارجىلىق جانە باسقا دا قايىرىمدىلىقتار ءۇشىن جۇگىنەتىن قايىرىمدىلىق ۇيىمدارى مەن ءدىني بىرلەستىكتەرگە قولدانىلاتىن بولادى. اقشانى جىلىستاتۋعا جانە تەرروريزمدى قارجىلاندىرۋعا قارسى ءىس-قيمىل ماسەلەلەرىنىڭ ماڭىزدىلىعىن ەسكەرە وتىرىپ، ۆەدومستۆوارالىق كەڭەس قۇرۋ ۇسىنىلادى. وندا اقشانى جىلىستاتۋ جانە تەرروريزمدى قارجىلاندىرۋ تاۋەكەلدەرىن ازايتۋعا باعىتتالعان شارالار ازىرلەنەتىن بولادى جانە شارالاردى ىسكە اسىرۋ ناتيجەلەرى قارالاتىن بولادى»، - دەدى ءاليحان سمايىلوۆ.

اۆتور: رۋسلان عابباسوۆ

سوڭعى جاڭالىقتار