سيريادان قايتارىلعان قازاقستاندىقتار تۋرالى سپەكتاكلدىڭ پرەمەراسى ءوتتى

None
None
ورال. قازاقپارات - ح. بوكەيەۆا اتىنداعى باتىس قازاقستان وبلىستىق قازاق دراما تەاترىندا «جۋسان» پسيحولوگيالىق دراماسىنىڭ پرەمەراسى بولدى، دەپ حابارلايدى قازاقپارات ءتىلشىسى. 

بۇل - ەلباسى تاپسىرماسىنا سايكەس قازاقستان ازاماتتارىن سيريانىڭ قاقتىعىس ايماقتارىنان قايتارۋ بويىنشا جۇزەگە اسىرىلعان «جۋسان» وپەراتسياسى تۋرالى قويىلعان ەلىمىزدەگى العاشقى سپەكتاكل.

دراما اۆتورى - جاس اقىن، «سەمسەر» ادەبي سىيلىعىنىڭ يەگەرى مارلەن عيلىمحان. بۇل - ونىڭ وسى سالاداعى تىرناقالدى تۋىندىسى. ءوزىنىڭ ايتۋىنشا، شىعارمانى جازۋ ءبىر بولەك تە، ونىڭ ساحنالانۋى دا ەرەكشە بولادى. 

سپەكتاكلدى رەجيسسەر سامال ءابۋوۆ ساحنالاسا، سۋرەتشىسى - مۇرات مامبەتوۆ.

قويىلىم جات جەردەگى سوعىسقا بارىپ، ودان «جۋسان» وپەراتسياسى ناتيجەسىندە ەلگە ورالعانداردىڭ تاعدىرىن بەينەلەيدى: قاتىگەز دە قاراڭعى ومىرگە تاپ بولىپ، بىرەۋدىڭ قولىنداعى قولجاۋلىققا اينالىپ، سودان تەپەرىش كورگەن ادامدار. الدى وققا ۇشسا، ارتى تۇرمەگە قامالىپ جاتقان جاستار.

«جۋسان» وپەراتسياسىمەن ەلگە قايتقان قاراقات ەسىمدى جاس كەلىنشەكتى جۇلدىز مامەدوۆا سومداسا، قۇرالبەك قاتشايەۆ، سالاۋات تۇمەنوۆ، دارىن مۇحتاروۆ، قازاقستاننىڭ ەڭبەك سىڭىرگەن قايراتكەرى اسەل مامبەتوۆا، جىلقىباي جۇباتوۆ، نازگۇل باتانوۆا، اسىلجان جاكيندەر دە ءوز رولدەرىن بارىنشا نانىمدى الىپ شىعا بىلگەن.

ەڭ باستىسى، سپەكتاكل كورەرمەندەردى ويلاندىرادى، ابايسىزدا وت باسۋدان ساقتاندىرادى. «مۇنداي وتە كۇردەلى، وزەكتى تاقىرىپقا بارۋ وڭاي ەمەس، ساقتىقتى، ۇلكەن دايىندىقتى قاجەت ەتەدى. وسى ورايدا تەولوگ ماماندارمەن دە اقىلداستىق. كورەرمەندەردىڭ قابىلداۋى جامان ەمەس، جىلى پىكىرلەر ايتىلىپ جاتىر. الداعى ۋاقىتتا تەاترعا باسقا ەلدەردەن دە رەجيسسەرلار كەلىپ، ءوز سپەكتاكلدەرىن قويماقشى. مۇنداعى ماقسات - ولاردىڭ دا ءىس-تاجىريبەلەرىن، شەبەرلىكتەرىن كورە وتىرىپ، تەاتردى الەمدىك دەڭگەيگە قاراي كوتەرۋ»، - دەدى قازاقپارات تىلشىسىنە تەاتردىڭ باس رەجيسسەرى سامال ءابۋوۆ.

اۆتور: ەلجان ەرالى

سوڭعى جاڭالىقتار