عالىمدار الكوگول قاتەرلى ىسىكتىڭ پايدا بولۋ قاۋپىن ارتتىراتىنىن دالەلدەدى

نۇر-سۇلتان. قازاقپارات – الكوگولدى از مولشەردە تۇتىنۋدىڭ ءوزى قاتەرلى ىسىكتىڭ پايدا بولۋ قاۋپىن ارتتىرادى.

جاپونيا مەن ا ق ش- تىڭ بىرلەسكەن عىلىمي توبى وسىنداي شەشىمگە كەلدى دەپ حابارلايدى KAZ. NUR. KZ ريا نوۆوستي-گە سىلتەمە جاساپ.

عالىمدار جاپونياداعى 33 اۋرۋحانانىڭ 2005-2016-جىلدار ارالىعىنداعى كلينيكالىق مالىمەتتەرىن زەرتتەپ شىقتى.

ولار جالپى ونكولوگيالىق اۋرۋلارعا شالدىققان 63,2 مىڭ ناۋقاستىڭ جانە وسىنشاما دەنى ساۋ ەرىكتىلەردىڭ دەنساۋلىعىنا بايلانىستى مالىمەتتەردى ساراپتامادان وتكىزدى. زەرتتەۋگە قاتىسقانداردىڭ بارلىعى قانداي مولشەردە جانە قانشا ۋاقىت بويى الكوگولدى ىشىمدىك ىشكەندەرىن ايتىپ بەرگەن.

ناتيجەسىندە الكوگولدى ىشىمدىك ىشپەيتىن ادامداردىڭ قاتەرلى ىسىككە شالدىعۋ قاۋپى تومەن بولىپ شىققان. ال ىشىمدىكتى از نەمەسە ورتاشا مولشەردە تۇتىناتىنداردىڭ ونكولوگيالىق دەرتكە شالدىعۋ قاۋپى ەلەۋلى تۇردە جوعارى ەكەنى انىقتالدى.

وسىلايشا، ون جىل بويى كۇنىنە ءبىر نەمەسە بەس جىل بويى كۇنىنە ەكى الكوگولدى سۋسىن ءىشۋ تىك ىشەك، اسقازان، كەۋدە، پروستاتا نەمەسە وڭەشتىڭ قاتەرلى ىسىگىنە جانە باسقا دا ونكولوگيالىق اۋرۋلارعا شالدىعۋ قاۋپىن 5 پايىزعا ارتتىراتىنى بەلگىلى بولدى.

«بۇگىنگى تاڭدا قاتەرلى ىسىك اۋرۋلارىنىڭ كەڭ تارالۋىنا بايلانىستى الكوگولدىڭ اتالعان دەرتتى قوزدىرۋ قاۋپىن بارىنشا ناسيحاتتاۋ قاجەت»، - دەپ مالىمدەدى توكيو ۋنيۆەرسيتەتىنىڭ مەديتسينا عىلىمدارىنىڭ دوكتورى ماساەشي زايتسۋ.