رۋدنىيلىق پوليتسەيلەر جوعالعان جاس ءوسپىرىمدى تابۋ ءۇشىن درون پايدالاندى
قوستاناي. قازاقپارات - رۋدنىي قالاسىنىڭ پوليتسەيلەرى 28 -قاراشا كۇنى ءىز-ءتۇزسىز جوعالىپ كەتكەن دەنيس ماتۆەيەۆتى كەشە تاۋىپ الدى.
وقۋشىنى ىزدەۋ شارالارى تۋرالى رۋدنىي قالاسى پوليتسيا باسقارماسىنىڭ باستىعى ءالىم باجىقبايەۆ ايتىپ بەردى، دەپ حابارلايدى قازاقپارات ءتىلشىسى.
28 -قاراشا كۇنى رۋدنىي قالاسى پوليتسيا باسقارماسىنىڭ كەزەكشى بولىمىنە جەرگىلىكتى تۇرعىن وكسانا وگنيەۆا حابارلاسىپ,13 جاسار ۇلى دەنيس ماتۆەيەۆتىڭ جوعالىپ كەتكەنىن ايتقان. ول مەكتەپكە شىعىپ كەتىپ، سودان ۇيىنە ورالماعان.
«ىزدەستىرۋ وپەراتسياسىنا 200 دەن استام پوليتسيا قىزمەتكەرى، ەرىكتى جانە ورتكە قارسى قىزمەت وكىلدەرى قاتىستى. رۋدنىي قالاسىندا كۇن سايىن جاياۋ اسكەر مەن اۆتوپاترۋلدەر جۇمىس ىستەدى. پوليتسيا قىزمەتكەرلەرى 2500 دەن استام جەكە تۇرعىن ءۇي، 300 گە جۋىق شاتىرلى ۇيلەردى تەكسەردى. قۇدىقتار مەن جىلۋ تراسسالارى قارالدى. ىزدەستىرۋ جۇمىستارىنا درون تارتىلدى، ونىڭ كومەگىمەن توبىل وزەنىنىڭ ارناسى تەكسەرىلدى»، - دەدى ءالىم باجىقبايەۆ. بەلگىلى بولعانداي، دەنيس ماتۆەيەۆ ءتارتىپ ساقشىلارىنان ۇنەمى قاشىپ جۇرگەن.
سول سەبەپتى پوليتسەيلەر وقۋشىنى قىزمەتتىك كيىمسىز ىزدەگەن. جەدەل-ىزدەستىرۋ ءىس- شارالارىن جۇرگىزۋ بارىسىندا د. ماتۆەيەۆ رۋدنىي قالاسىنداعى جاقىن ماڭداعى يۋبيلەينىي اۋىلىنان تابىلدى.
«9 -جەلتوقساندا ساعات 18-00 شاماسىندا №2-ساياجايدىڭ كۇزەتشىسى پاۆەل اليمەنكو سول ماڭايدان ۇل بالانى بايقاعان. بۇل تۋرالى ول وسى ۋچاسكەگە قىزمەت كورسەتەتىن ۋچاسكەلىك پوليتسيا ينسپەكتورى ەسەنبولات ەسماعامبەتوۆكە حابارلادى. پوليتسەي بالانى رۋدنىي قالالىق پوليتسيا باسقارماسىنا جەتكىزدى»، - دەپ ءمالىم ەتتى ءا. باجىقبايەۆ.
بۇگىن پاۆەل كليمەنكو رۋدنىي قالاسىنىڭ پوليتسيا باستىعى اتىنان العىس حاتپەن ماراپاتتالدى، سونداي-اق وعان اقشالاي سىيلىق تابىس ەتىلدى. ۋچاسكەلىك پوليتسيا ينسپەكتورىنا دا العىس حات بەرىلدى.
اۆتور: قاسقىرباي قويشىمانوۆ