اسكەري قىزمەتشىلەر ارنايى دايىندىقتان ءوتىپ جاتىر

نۇر-سۇلتان. قازاقپارات - قازاقستاننىڭ قارۋلى كۇشتەرىندە بارلىق ساناتتاعى اسكەري قىزمەتشىلەر ءوز ماماندىعى بويىنشا دايىندىقتان ءوتىپ جاتىر.

بۇل جونىندە ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ قازاقپارات حابارلايدى.

نەگىزگى ماقسات - اسكەري قىزمەتشىلەردىڭ جەكە قۇرامىنىڭ فۋنكسيونالدىق مىندەتتەرىن، شتاتتىق قارۋ- جاراق پەن اسكەري تەحنيكانى زەردەلەۋدى، اتۋدى، شتاتتىق بايلانىس قۇرالدارىمەن جۇمىس ىستەۋدى جانە العاشقى مەديتسينالىق كومەك كورسەتۋدى ۇيرەتۋ. دارىستەر ءاربىر اسكەري ماماندىق بويىنشا جەكە وتكىزىلەدى.

اسكەري قىزمەتشىلەر وقۋ توبىنىڭ قۇرامىندا جۇمىس ىستەيدى. وقىتۋدى حالىقارالىق سايىس پەن وقۋ- جاتتىعۋعا قاتىسىپ، جۇلدەگەر اتانعان تاجىريبەلى اسكەري ماماندار، نۇسقاۋشىلار جۇرگىزەدى. 

ماسەلەن، تانك بولىمشەلەرىندە كوزدەۋشى- وپەراتور سياقتى ماماندار بار. ولار بەرىلگەن نىسانانى ءدال جانە ناقتى جويىپ، ەكيپاج قۇرامىندا ۇيلەسىمدى جۇمىس ىستەي الۋى ءتيىس.

«شىعىس» وڭىرلىك قولباسشىلىعىندا اسكەري قىزمەتشىلەرمەن وسى ماماندىق بويىنشا «تانك بياتلونى» اسكەري حالىقارالىق ويىندارىنىڭ قاتىسۋشىسى جانە بىرنەشە دۇركىن جۇلدەگەرى، كوزدەۋشى- وپەراتور، اعا سەرجانت دميتري الكەنوۆ جۇمىس ىستەيدى. 2017 -جىلى قازاقستاندىق تانكيستەر كومانداسى وسى ءىرى جارىستا ەكىنشى ورىن السا، ال 2019 -جىلى ءۇشىنشى ورىندى يەلەندى.

«ماماندىق بويىنشا دايىندىق كەزىندە ءبىز نىساناشى- وپەراتورلارعا زەڭبىرەكتەن اتۋ جانە ونىمەن قوسارلانعان پۋلەمەتتەن اتۋ ەرەجەلەرىن ۇيرەتۋىمىز كەرەك. نەگىزىنەن كوزدەۋشى- وپەراتوردىڭ ءىس- ارەكەتى ايتارلىقتاي فيزيكالىق جۇكتەمەمەن بايلانىستى. سونىمەن قاتار، ول تانك ەكيپاجىنىڭ مۇشەلەرىمەن تىكەلەي جانە تەحنيكالىق قۇرىلعىلاردىڭ كومەگىمەن تۇراقتى بايلانىستا بولۋى ءتيىس. بۇل قاسيەتتەردىڭ بارلىعى اسكەري قىزمەتشىنىڭ كاسىبيلىگىن ارتتىرۋ جانە ءوز ماماندىعى مەن ۇرىستاعى ماقساتىن دۇرىس ءتۇسىنۋ ءۇشىن قاجەت»، - دەپ اتاپ ءوتتى ول. «شىعىس» وڭىرلىك قولباسشىلىعى اسكەرلەرىنىڭ قولباسشىسى، پولكوۆنيك اسان ءجۇسىپوۆ اتاپ وتكەندەي، بۇگىنگى تاڭدا دايىندىقتان شامامەن 700 اسكەري قىزمەتشى وتۋدە. ولارعا 500 وقۋ توبى مەن 1100 دەن اسا تاجىريبەلى نۇسقاۋشى- سەرجانت تاڭداپ الىنىپ، وقۋ- ماتەريالدىق بازا، اسكەري تەحنيكا مەن وق-ءدارى بولىنگەن.

ەلىمىزدىڭ قارۋلى كۇشتەرىندە تەك ساۋاتتى، ءوز ءىسىن جەتىك بىلەتىن جوعارى بىلىكتى ماماندار قىزمەت ەتۋى ءتيىس. ول مەيلى سنايپەر، ۇشقىش نەمەسە تانكيست بولسىن. سوندىقتان اسكەري قىزمەتشىلەردىڭ جاۋىنگەرلىك دايارلىعىنىڭ جەكە ءتۇرى رەتىندە ارنايى دايىندىققا ەرەكشە كوڭىل بولىنەدى.