توقايەۆ: جاستاردىڭ دامۋىنا جاعداي جاساۋ - پرەزيدەنت رەتىندەگى باستى مىندەتتەرىمنىڭ ءبىرى
بۇل تۋرالى بۇگىن جاستار جىلىنىڭ جابىلۋ جانە ۆولەنتەر جىلىنىڭ اشىلۋ سالتاناتىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«بۇگىن ۇلان بايتاق ەلىمىزدىڭ تۇپكىر-تۇپكىرىنەن كەلگەن جاستار ەلوردا تورىندە، نۇر-سۇلتان قالاسىندا، حالقىمىزدىڭ قۇتتى مەكەنىندە باس قوسىپ وتىر. سىزدەرمەن تاۋەلسىزدىك كۇنى قارساڭىندا جۇزدەسىپ وتىرمىز. ءبىز ءۇشىن بۇدان اسقان قاستەرلى ءارى ماڭىزدى مەرەكە جوق. بارشاڭىزدى قۇتتىقتايمىن. تاۋەلسىزدىگىمىزدى نىعايتىپ، ەلىمىزدى ودان ارى وركەندەتۋ قازىرگى ۇرپاقتىڭ قاسيەتتى بورىشى. سوندىقتان ءبىز سىزدەرگە زور ءۇمىت ارتامىز. مەملەكەتىمىزدىڭ كەلەشەگى - وزدەرىڭىز. جاڭا عانا جاستاردىڭ ءبىر توپ وكىلى ءتۇرلى وزەكتى تاقىرىپتاردا جاقسى ءسوز سويلەدى. ۇتىمدى پىكىرلەر ايتتى. مەن بارشا جاستاردى ماقتان تۇتامىن»، - دەدى مەملەكەت باسشىسى.
قازاقستان پرەزيدەنتى بيىلعى جىلدىڭ ءمان-ماڭىزى ەرەكشە بولعانىن، ەلباسى نۇرسۇلتان نازاربايەۆتىڭ باستاماسىمەن بارشا ەل بولىپ، جاستار جىلىن وتكىزگەنىمىزدى ايتتى.
«ءبارىمىز ءبىلىمدى ءارى باسەكەگە قابىلەتتى ۇرپاق تاربيەلەۋ ىسىنە ايرىقشا ءمان بەرىپ وتىرمىز. جالپى، ەلىمىزدەگى باستامالاردىڭ بارلىعى جاس بۋىننىڭ جارقىن بولاشاعى ءۇشىن قولعا الىندى. جاستارىمىزدىڭ جان-جاقتى دامۋىنا جاعداي جاساۋ - مەنىڭ پرەزيدەنت رەتىندەگى باستى مىندەتتەرىمنىڭ ءبىرى. سوندىقتان وسى ماسەلە ءاردايىم مەنىڭ نازارىمدا بولادى. بۇگىنگى جاستار - ەلىمىزدى ەرتەڭى، ۇلتىمىزدىڭ بولاشاعى، مەملەكەتىمىزدىڭ مارتەبەسى»، - دەدى قاسىم-جومارت توقايەۆ.