ەلوردادا «دارىن» جاستار مەملەكەتتىك سىيلىعىنىڭ لاۋرەاتتارى ماراپاتتالدى
نۇر-سۇلتان. قازاقپارات - ەلوردادا قازاقستان رەسپۋبليكاسى ۇكىمەتىنىڭ «دارىن» مەملەكەتتىك جاستار سىيلىعىنىڭ لاۋرەاتتارىن سالتاناتتى ماراپاتتاۋ ءراسىمى ءوتتى، دەپ حابارلايدى قازاقپارات.
«دارىن» مەملەكەتتىك جاستار سىيلىعى جەمىستى عىلىمي، شىعارماشىلىق، قوعامدىق جۇمىستارىنا، سونداي- اق جوعارى سپورتتىق جەتىستىكتەرىنە دارىندى جاستاردى مەملەكەتتىك قولداۋ ماقساتىندا جىل سايىن تاعايىندالادى.
لاۋرەاتتارعا ماراپاتتاردى قازاقستان رەسپۋبليكاسى پرەمەر-ءمينيسترىنىڭ ورىنباسارى بەردىبەك ساپاربايەۆ، اقپارات جانە قوعامدىق دامۋ ءمينيسترى داۋرەن ابايەۆ، ءبىلىم جانە عىلىم ءمينيسترى اسحات ايماعامبەتوۆ، ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ، قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارى نۇرلان ءالىمجانوۆ پەن ولگا شيشيگينا جانە باسقا دا كورنەكتى مادەنيەت، جۋرناليستيكا جانە ونەر قايراتكەرلەرى تابىستادى.
«مەملەكەتتىڭ بولاشاعى، ءۇمىتى - جاستار. 28 جىل ىشىندە قازاقستانداعى جاستارعا قانداي جاقسىلىق، جاعداي جاسالعانىن كۇندەلىكتى ومىردەن، باسپا سوزدەن جاقسى بىلەسىزدەر. ەلىمىزدىڭ تۇڭعىش پرەزيدەنتى نۇرسۇلتان ءابىش ۇلى بيىلعى جىلدى «جاستار جىلى» دەپ اتاۋى بەكەردەن بەكەر ەمەس. بيىلدىڭ وزىندە 2 ميلليونعا جۋىق جاس مەملەكەتتىڭ قولداۋىنا يە بولىپ وتىر. جول كارتاسى بويىنشا 500 ميلليارد تەڭگە جاستارعا شاكىرتاقى، گرانت، جاتاقحانا، نەسيە بەرۋگە ارنالدى. مەملەكەت باسشىسى قاسىم-جومارت كەمەل ۇلى وسى جاستار جىلىن ارى قاراي جالعاستىرۋ ءۇشىن كەلەسى جىلدى «ەرىكتىلەر جىلى» دەپ اتادى»، - دەدى ق ر پرەمەر-ءمينيسترىنىڭ ورىنباسارى بەردىبەك ساپاربايەۆ «الەۋمەتتىك قىزمەت» نوميناتسياسىنداعى جەڭىمپازداردى قۇتتىقتاۋ بارىسىندا.
«دارىن» سىيلىعى 10 نوميناتسيا بويىنشا بەرىلەدى.
«قوعامدىق قىزمەت» نوميناتسياسى بويىنشا «قازاقستان رەسپۋبليكاسىنىڭ ەتنوسپورت اسسوتسياتسياسىنىڭ» باس حاتشىسى نۇرسۇلتان يبراگيموۆ، «قازاقستان ستۋدەنتتەر اليانسى» رەسپۋبليكالىق ستۋدەنتتەر قوزعالىسى» ق ب پرەزيدەنتى ءىلياس تۇستىكبايەۆ جەڭىمپاز اتاندى.
«جۋرناليستيكا» نوميناتسياسى بويىنشا ماراپاتتى ءبىرقاتار دەرەكتى دوكۋمەنتالدى فيلمدەردىڭ اۆتورى مىرزابەك ءتۇسىپوۆ، جۋرناليستەر اراسىنداعى رەسپۋبليكالىق بايقاۋلاردىڭ جۇلدەگەرى ايبەك تاسقاليەۆ الدى.
«عىلىم» نوميناتسياسى بويىنشا عالىم فيزيكتەر- ونەرتاپقىشتار نۇرلان قانات جانە ەراسىل ەرلان ۇلى ماراپاتتالدى.
«تەاتر جانە كينو» نوميناتسياسى بويىنشا م. اۋەزوۆ اتىنداعى مەملەكەتتىك اكادەميالىق دراما تەاترى اكتەرى وتەپبەرگەن ايان، ق. قۋانىشبايەۆ قازاق مۋزىكالىق-دراما تەاترىنىڭ اكتريساسى التىنگۇل ەربول قىزى ماراپاتتالدى.
«سپورت» نوميناتسياسى بويىنشا ءتورت قۇرلىق چەمپيوناتىنىڭ كۇمىس جۇلدەگەرى، مانەرلەپ سىرعاناۋدان 2019-قىسقى ۋنيۆەرسيادانىڭ كۇمىس جۇلدەگەرى ەليزابەت تۇرسىنبايەۆا، الەم چەمپيوناتىنىڭ ەكى دۇركىن كۇمىس جۇلدەگەرى (2017، 2019)، ازيا چەمپيوناتىنىڭ ەكى دۇركىن كۇمىس جۇلدەگەرى (2017، 2019)، قازاقستان رەسپۋبليكاسى قۇراماسىنىڭ كاپيتانى قامشىبەك قوڭقابايەۆ ماراپاتتالدى.
«كلاسسيكالىق مۋزىكا» نوميناتسياسى بويىنشا ءتۇرلى مۋزىكالىق بايقاۋلاردىڭ بىرنەشە مارتە لاۋرەاتتارى، كومپوزيتورلار دانارا مۇساحان جانە ازىمبەك قالدىبەك ۇلى جامبايەۆ ماراپاتتالدى.
«حالىق شىعارماشىلىعى» نوميناتسياسى بويىنشا ايتىسكەر سۇلتانحان مەيىربەك، ع. قۇرمانعاليەۆ اتىنداعى وبلىستىق فيلارمونياسى» مەملەكەتتىك كوممۋنالدىق قازىنالىق كاسىپورنىنىڭ ءارتىسى، ديريجەرى جاراس ساتىبالديەۆ ماراپاتتالدى.
«ادەبيەت» نوميناتسياسى بويىنشا ولەڭدەرى تۇرىك، ءازىربايجان، يسپان جانە باسقا تىلدەرگە اۋدارىلعان اقىن - جادىرا بايبۇلانوۆا، پوەزيا كونكۋرستارىنىڭ جەڭىمپازى، ءبىرقاتار كىتاپتاردى قازاق تىلىنە اۋدارۋشى اۆتور بەكزات سماعۇلوۆ ماراپاتتالدى.
«ديزاين جانە بەينەلەۋ ونەرى» نوميناتسياسى بويىنشا باس ديزاينەر، «ءجۇزباي ديزاين» ديرەكتورى، قازاق ءسان قاۋىمداستىعىنى پرەزيدەنتى ايجان ءجۇزباي، ءمۇسىنشى سكۋلپتور مۇسىرەپ سىرىم ماراپاتتالدى.
«ەسترادا» نوميناتسياسى بويىنشا «سلاۆيان بازار - 2019» حالىقارالىق فەستيۆالىنىڭ گران- پري يەگەرى ءادىلحان ماكين، «قازاقكونتسەرت» مەملەكەتتىك كونتسەرتتىك ۇيىمىنىڭ ءسوليستى، كونفەرانسە مارات تورەحان ۇلى ءايتىمباي ماراپاتتالدى.
سىيلىققا 29 جاسقا دەيىنگى قازاقستان رەسپۋبليكاسىنىڭ ازاماتتارى حالىقارالىق جانە رەسپۋبليكالىق بايقاۋلاردىڭ، فەستيۆالدار مەن كورمەلەردىڭ لاۋرەاتتارى، رەسپۋبليكالىق جانە حالىقارالىق دەڭگەيدەگى سپورتتىق جارىستاردىڭ جەڭىمپازدارى مەن جۇلدەگەرلەرى، سونىمەن قاتار قىزمەتى يننوۆاتسيالى، ءتيىستى سالانىڭ جانە تۇتاس قوعامنىڭ دامۋىنا ىقپال ەتەتىن ازاماتتار ۇمىتكەر بولا الادى.
2017 -جىلدان باستاپ قوعامدىق دامۋ مينيسترلىكتىڭ باستاماسىمەن سىيلىق جىل سايىن بەرىلەدى. 2018 -جىلى سىيلىق كولەمىن ءۇش ەسەگە ۇلعايتۋ ماسەلەسى شەشىلىپ، ءار نوميناتسيا بويىنشا سىيلىق كولەمى 600 مىڭ تەڭگە بولدى.
ايتا كەتەيىك، ۇمىتكەرلەردىڭ وتىنىمدەرى 2019 -جىلعى 16 -مامىردان 10 -تامىزعا دەيىن قابىلداندى. وتىنىمدەردى كونكۋرستىق كوميسسيا قارادى. كوميسسيا قۇرامىنا بەلگىلى مادەنيەت جانە ونەر قايراتكەرلەرى، عالىمدار، جازۋشىلار، پارلامەنت دەپۋتاتتارى مەن قوعام قايراتكەرلەرى كىرگەن.
اۆتور: زارينا قاھارمان