اقتوبەدە وتكەن شىعارما جازۋ بايقاۋىندا ءۇندىستاندىق ستۋدەنت جۇلدە الدى

اقتوبە. قازاقپارات - اقتوبەدە پرەزيدەنتتىڭ «سىندارلى قوعامدىق ديالوگ - قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىن ناسيحاتتاۋعا ارنالعان بايقاۋ قورىتىندىلاندى، دەپ حابارلايدى قازاقپارات ءتىلشىسى قالا اكىمىنىڭ باسپا ءسوز قىزمەتىنە سىلتەمە جاساپ.

بايقاۋعا جوعارى وقۋ ورىندارى مەن ارناۋلى ورتا وقۋ ورىندارىنىڭ ستۋدەنتتەرى قاتىستى.

«الەم ءۇشىن ءبىلىم كەڭىستىگىنىڭ جاھاندانۋى ماڭىزدى ۇدەرىس. مەن ءوز جۇمىسىما قازاقستان پرەزيدەنتى جولداۋىنىڭ بىلىمگە باعىتتالعان تۇسىن ارقاۋ ەتتىم. شىعارمامدى جازىپ شىعۋ ءۇشىن ينتەرنەت ماتەريالدارىن كوپ وقىدىم. جولداۋدىڭ مازمۇنىن مەنىڭ عىلىمي جەتەكشىم ءتۇسىندىردى. جۇلدەلى ورىن الاتىنىما ءۇمىتتى بولعانىم راس. مەن قازىر ءوزىم ءبىلىم الىپ جۇرگەن قازاق ەلىنە شەكسىز رازىمىن»، — دەدى م. وسپانوۆ اتىنداعى ب ق م ۋ ستۋدەنتى دجاي كۋمار گارحۆال.

ول ۋنيۆەرسيتەتتىڭ جالپى مەديتسينا فاكۋلتەتىنىڭ ءۇشىنشى كۋرسىندا وقيدى. بايقاۋدا ەكىنشى ورىن الدى.

بارلىعى 34 شىعارما جازىلدى. باسىم بولىگى كوللەدج ستۋدەنتتەرىنىڭ تۋىندىسى. I ورىندى س. بايىشيەۆ اتىنداعى اقتوبە ۋنيۆەرسيتەتىنىڭ ستۋدەنتى جۇلدىز اقىلجانوۆا، Ⅱورىندى م. وسپانوۆ اتىنداعى ب ق م ۋ ستۋدەنتى دجاي كۋمار گارحۆال، Ⅲ ورىندى ق. جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ ستۋدەنتى ۆيكتوريا موحيبورودا الدى.

ال كوللەدج ستۋدەنتتەرى اراسىندا I ورىنعا اقتوبە ونەركاسىپتىك تەحنولوگيالار جانە باسقارۋ كوللەدجىنىڭ ستۋدەنتى ارۋجان شۇكىروۆا، Ⅱورىنعا اقتوبە ونەركاسىپتىك تەحنولوگيالار جانە باسقارۋ كوللەدجىنىڭ ستۋدەنتى ەۆگەني ترەتياك، Ⅲ ورىنعا اقتوبە بايلانىس جانە ەلەكتروتەحنيكا كوللەدجىنىڭ ستۋدەنتى مەيرامبەك سەيىلحان لايىق دەپ تانىلدى.

بارلىق جۇلدەگەرلەر قالا اكىمىنىڭ العىس حاتىمەن جانە پلانشەت، فوتواپپارات سياقتى باعالى سىيلىقتارمەن ماراپاتتالدى.