+7 (701) 759 90 19
-5 °С : نۇر-سۇلتان
-6 °С : الماتى
USD 376.51 EUR 418.91
RUB 6.13 CNY 54.90
جاڭالىقتار

الماتى اكىمى جازۋشىلارعا قانداي قولداۋ كورسەتىلەتىنىن ايتتى

9 جەلتوقسان 18:34
:ءبولىسۋ
الماتى اكىمى جازۋشىلارعا قانداي قولداۋ كورسەتىلەتىنىن ايتتى

الماتى. قازاقپارات - الماتىدا قازاقستان جازۋشىلار وداعىنىڭ قۇرىلۋىنا جانە «قازاق ادەبيەتى» گازەتىنىڭ اشىلۋىنا 85 جىل تولۋىنا وراي وتكەن جيىندا قالا اكىمى باقىتجان ساعىنتايەۆ قالامگەرلەر قاۋىمىنا قانداي قولداۋ كورسەتىلەتىنىن ايتتى، دەپ حابارلايدى قازاقپارات ءتىلشىسى.

«جازۋشىلار وداعىنىڭ قاتپارلى تاريحى الماتىمەن تۇستاسىپ كەلەدى. 85 جىل بۇرىن بوي كوتەرگەن وداقتىڭ بىرنەشە بۋىنى الماتىدا قالىپتاسىپ، وسىندا تابىستى ەڭبەك ەتتى. سۇيىكتى قالامىز تۋرالى قالام تەربەمەگەن جازۋشى، تولعانباعان اقىن جوق دەسە بولادى. قازىر الماتىدا جازۋشىلار وداعىنىڭ 360 مۇشەسى تۇرادى. سول قالامگەرلەرمەن كەڭ كولەمدە دە، جەكە دە بىرنەشە مارتە جۇزدەسىپ پىكىر الماستىق» ، - دەدى شاھار باسشىسى باقىتجان ساعىنتايەۆ.

اكىمنىڭ ايتۋىنشا، قالا اكىمدىگى بەلگىلى شىعارماشىلىق وكىلدەرىنىڭ كەشتەرىن، كورمەلەرىن، مەرەيتويلارىن ۇيىمداستىرىپ كەلەدى.

«مۇمكىندىگىنە قاراي كىتاپتاردى دا شىعارىپ جاتىرمىز. بيىل زيالى قاۋىم وكىلدەرىمەن جۇمىس جاساۋدىڭ جاڭا جۇيەسىن ەنگىزدىك. وداقتىڭ تىكەلەي ۇسىنىسى بويىنشا 150 گرانت تاعايىندالدى. 90 گرانت ءوز يەلەرىنە جەتسە، قالعان 60 جىل سوڭىنا دەيىن تابىستالادى. الداعى جىلدارى ىرىكتەلگەن 20عا جۋىق اقىن- جازۋشىلاردىڭ كىتاپتارىنىڭ جارىق كورۋىنە قولداۋ كورسەتەمىز. بۇل باعىتتاعى جۇمىستار ءوز كەزەگىندە اقىن جازۋشى، دراماتۋرگ، سىنشىلاردىڭ قالامىزدىڭ، تۇتاستاي ەلىمىزدىڭ تىنىس تىرشىلىگىن سۋرەتتەيتىن ادەبي شىعارمالار جازۋىنا سەپتىگىن تيگىزەدى دەپ ويلايمىز. ەل رۋحانياتىنىڭ ورتالىعى سانالاتىن قالامىزدىڭ وركەنيەت جولىندا وزدەرىڭىزبەن ايانباي ەڭبەك ەتىپ، مادەنيەتىمىز بەن ادەبيەتىمىزدى دامىتۋ بارلىعىمىزدىڭ ورتاق مىندەتىمىز دەپ ەسەپتەيمىن» ، - دەدى باقىتجان ساعىنتايەۆ.

«ەگەمەن قازاقستان» گازەتىنىڭ باسقارما ءتوراعاسى دارحان قىدىرالى باس گازەتتىڭ قازاق قالامگەرلەرىنىڭ شىعارماشىلىعىن ناسيحاتتاۋدا قانداي جۇمىستار اتقارىلاتىنىن ايتتى.

«Egemen Qazaqstan» گازەتىنىڭ تيراجى 200 مىڭنان اساتىنىن وزدەرىڭىز بىلەسىزدەر. قازاق ادەبيەتىنىڭ قازىرگى جاس ادەبيەتشىلەرىنە قولداۋ كورسەتۋ ءۇشىن جاس قالامگەرلەردى، ەسىمى ەلگە بەلگىلى قالامگەرلەردى شىعارۋعا تىرىسامىز. وسى ماقساتتا ارنايى ادەبيەت، رۋحانيات بەتىن اشقانبىز. رۋحانيات بەتىندە مادەنيەتىمىزدىڭ ءار سالاسى تەاتر، كينو، پروزا، پوەزيا، دراماتۋرگيا تۋرالى ماقالا جاريالانادى. قازاق ادەبيەتىنىڭ قالامگەرلەرىنىڭ جۇمىسى شالعايداعى كەڭ وقىرماندارعا جەتۋ ءۇشىن وسىنداي جۇمىستار اتقارىلىپ جاتىر. جاقىندا « ءۇمىت» ، «ەڭ قىسقا اڭگىمە» دەگەن بايقاۋ وتكىزدىك. سايتتا تۇراقتى تۇردە جاس قالامگەرلەردىڭ تىرناقالدى تۋىندىلارىن جاريالاپ تۇرامىز. ساياسي- ەكونوميكالىق باسىلىم بولعانمەن قازاق ادەبيەتىنىڭ دامۋىنا ۇلەس قوسىپ وتىرمىز» ، - دەدى دارحان قىدىرالى.

ايتا كەتۋ كەرەك، بۇگىن الماتىدا اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا قازاقستان جازۋشىلار وداعىنىڭ قۇرىلۋىنا جانە «قازاق ادەبيەتى» گازەتىنىڭ اشىلۋىنا 85 جىل تولۋىنا وراي پلەنۋم وتىرىسى ءوتتى.


باستى سوزدەر: ايماق,
:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
كۇنسۇلتان وتارباي
كۇنسۇلتان وتارباي
954-049

مۇراعات