جازۋشىلار وداعىنىڭ تاريحىندا جۇزدەگەن تومعا جۇك بولاتىن تاعدىرلار شەجىرەسى جاتىر - قىرىمبەك كوشەربايەۆ
حالىقارالىق جيىنعا 8 ەلدەن جازۋشىلار وداعىنىڭ باسشىلارى، مۇشەلەرى كەلدى.
وتىرىس الدىندا قازاق مادەنيەتىنىڭ قارا شاڭىراعىنا اينالعان كيەلى وردانىڭ 85 جىلدىق تاريحىنان سىر شەرتەتىن بەينەروليك كورسەتىلدى.
قازاقتىڭ ءۇش بايتەرەگى ساكەن سەيفۋللين، بەيىمبەت مايلين، ءىلياس جانسۇگىروۆتىڭ 125 جىلدىعىن ارقاۋ ەتكەن سالتاناتتى جيىنعا ق ر مەملەكەتتىك حاتشىسى قىرىمبەك كوشەربايەۆ قاتىسىپ، بايانداما جاسادى.
«بيىل «قازاق ادەبيەتى» گازەتىنىڭ 85 جىلدىق مەرەي تويى. سونداي- اق، وسىناۋ قارا شاڭىراقتىڭ نەگىزىن قالاۋشىلار: قازاقتىڭ ءۇش بايتەرەگى ساكەن سەيفۋللين، ءىلياس جانسۇگىروۆ، بەيىمبەت مايليننىڭ تۋعانىنا بيىل 125 جىل تولىپ وتىر. قازاق ەلى قاشاندا جازۋشىلار قاۋىمداستىعىن جانىنا سۇيەۋ، رۋحىنا تىرەۋ سانايدى. ەجەلدەن ءسوز ونەرىن كيە تۇتقان قازاق وتكەن عاسىردىڭ باسىندا ءبىر ۇيىمعا ۇيىسقان اقىن- جازۋشىلار قاۋىمداستىعىندا ءدال وسىنداي ۇلكەن ءۇمىت ارتقان بولاتىن. 85 جىلدىق تاريحىندا ءسوز زەرگەرلەرى سول ءۇمىتتى ەل سەنىمىنىڭ تەمىر قازىعىنا اينالدىرا ءبىلدى. قازاقستان جازۋشىلار وداعىنىڭ ءبىر عاسىرعا جۋىق تاريحىن تاراتا زەرتتەيتىن بولساق، ودان قازاقتىڭ قيلى كەزەڭدەرىمەن تۇتاسىپ جاتقان جۇزدەگەن تومعا جۇك بولاتىن قىزىعىنان قاسىرەتى باسىم، تاۋقىمەتتى تاعدىرلاردىڭ شەجىرەسىن كورەمىز»، - دەدى قىرىمبەك كوشەربايەۆ.
«ونەر الدى - قىزىل ءتىل» دەمەكشى، حالقىمىزدىڭ ءقادىر تۇتقان ونەرىنىڭ ءبىرى - ادەبيەت ەكەنى راس»، - دەپ اتاپ ءوتتى ءوز سوزىندە الماتى اكىمى باقىتجان ساعىنتايەۆ. «بۇگىندە 800 دەن استام قالامگەردىڭ باسىن بىرىكتىرىپ وتىرعان كيەلى ۇيىم - جازۋشىلار وداعىنىڭ قۇرىلعانىنا 85 جىل تولدى. ساكەن سەيفۋللين ىرگەسىن قالاعان جازۋشىلار وداعىن ءار جىلدارى ءىلياس جانسۇگىروۆ، ءسابيت مۇقانوۆ، ءابدىلدا تاجىبايەۆ، عابيت مۇسىرەپوۆ، ءالي ءشارىپوۆ، ءانۋار ءالىمجانوۆ، ولجاس سۇلەيمەنوۆ، نۇرلان ورازالين باسقارعان. قازاق ءسوزى قيىن- قىستاۋ زامانداردى باسىنان وتكەردى. قازاق ءتىلى قارجى، سوت، ەكونوميكا سالاسىنان ىعىستىرىلىپ وگەي كۇي كەشكەنى انىق. تاپ سول كەزەڭدەردە قازاق ءتىلى پانا تاپقان جالعىز ۇيىم جازۋشىلار وداعى بولاتىن»، - دەدى قالا اكىمى.
ق ر جازۋشىلار وداعى باسقارماسىنىڭ ءتوراعاسى ۇلىقبەك ەسداۋلەت بايانداما جاساپ، اتالعان ۇيىمنىڭ وسى جىلدار ارالىعىندا جەتكەن جەتىستىكتەرىمەن قاتار، اتقارىلعان اۋقىمدى جۇمىستارىنا توقتالدى.
اۆتور: گۇلميرا عوسمانالي